 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

ࢩَلَادٜ عَلَتْ ڢَجِرِ شُبْ، رٜوْࢡٜ غٛ نجٜحِ حَا يٜنَاندٜ، ࢡٜنجَحْرِ عُورْلٜ طٜ ࢡٜتَاسْکُنٛ؞ ࢡٜتَوِ حَيْرٜ مَࢡُّنٛوندٜ يٜنَاندٜ غٛ، طٛنْ تَلِّ حَا سٜرَ؞ ࢡٜنَسْتِ، عَمَّا ࢡٜتَوَايْ ࢡَنْدُ جَوْمِرَاوٛ عِيسَى؞ ندٜ ࢡٜطٛنْ شَکْلِ دٛوْ طُمْ کٛ لَاتِ، ندَا وٛرْࢡٜ طِطٛ مبَنغَنِ ࢡٜ، ࢡٜطٛنْ ࢡٛرْنِ لِمْشٜ طٜلْکَنْطٜ؞ رٜوْࢡٜ غٛ کُلْتٛرِ، کِݠِّ غٜىٰسٜ مُوطُمْعٜنْ، عَمَّا وٛرْࢡٜ مَنْ مبِعِ‏: «کٛنِ طَࢡِّتِتّٛنْ غٜىٰتٛ شَکَ مَايْࢡٜ؟ عٛوَلَاطٛنْ حَا طٛ، عٛعُمِّتَکٜ؞ شِڢْتٛرٜ کٛ عٛوِعْنٛ عٛنْ يَاکٜ عٛطٛنّٛ لٜسْدِ غَلِيلِ‏: دٛولٜ ࢡِي-نٜطّٛ حٛکّٜ حَا جُوطٜ حَکّٜعٜنْ، عٛࢡِلٜ حَا لٜغَّلْ غَاڢَانغَلْ، عٛعُمِّتٛ ࢩَلَادٜ تَتَࢡْرٜ؞»
ندٜنْ ࢡٜشِڢْتٛرِ بٛلّٜ عِيسَى؞ ࢡٜعَشِّ يٜنَاندٜ، ࢡٜنجٜحِ عَنْدِنْغٛ کُوجٜ طٜعٜ ڢُو حَا ݠُکَرَعٜنْ سَݠّٛ عٜ نغٛعٛ عٜ يِمْࢡٜ وٛطْࢡٜ ڢُو؞ کَمْࢡٜ نغٛنِ‏: مَرِيَمَ مٛ مَغْدَلَ عٜ يٛوَنَّ عٜ مَرِيَمَ دَادَ يَاکُبَ عٜ رٜوْࢡٜ وٛطْࢡٜ وٛنْدُࢡٜ بٜى مَࢡّٜ؞ ݠُکَرَعٜنْ ندَارِ حَالَ رٜوْࢡٜ بَنَ مٜىٰرٜىٰحَ، ࢡٜنُطِّنَايْ ࢡٜ؞ عَمَّا ݠِيٜرْ عُمِّ، دٛغِّ، يٜحِ حَا يٜنَاندٜ؞ عٛيُرْنِ، عٛيِعَايْ کٛو طُمٜ، سٜيْ لٜݠِّ حَا لٜسْدِ؞ ندٜنْ عٛحٛوتِ، عٛحَيْطِنِ دٛوْ کٛ لَاتِ؞


ࢩَنْدٜ مَنْ ندٜنْ ݠُکَرَعٜنْ طِطٛ طٛنّٛ نجَحَ حَا وُرٛ وِعٜتٜىٰنغٛ عٜمَّوُسْ، کِلٛمٜىٰتِرْ سَݠّٛ عٜ غٛعٛ بٜى عُرُسَلِيمَ؞ ࢡٜطٛنّٛ نغٜىٰوْتَ دٛوْ کٛ لَاتِ طٛ ڢُو؞ ندٜ ࢡٜطٛنْ نغٜىٰوْتِدَ حَکُّندٜ مَࢡّٜ، عِيسَى بٜى حٛورٜ مُمْ ࢡَدِتِ، طٛنْ يَحْدَ بٜى مَࢡّٜ؞ ࢡٜنغِعِمٛ، عَمَّا وٛودِ کٛ حَطِ ࢡٜ عَنْدِتِتْغٛ مٛ؞ عِيسَى ࢨَمِ ࢡٜ‏: «دٛوْ طُمٜ نغٜىٰوْتٛتٛنْ ندٜرْ يَحْدُ مٛنْ؟» ندٜنْ ࢡٜندَرِ، ࢡٜ سُنِيࢡٜ؞ غٛوتٛ مَࢡّٜ بِعٜتٜىٰطٛ کٜلٜيٛݠَسْ جَابِمٛ‏: «عَنْ ڢٜىٰرٜ مَ وٛنِ کٛطٛ ندٜرْ عُرُسَلِيمَ طٛ مٛ عَنْدَا کٛ لَاتِ بَلْطٜ طٜعٜ نَ؟» عٛࢨَمِ ࢡٜ‏: «طُمٜ لَاتِ؟» ࢡٜنجَابِمٛ‏: «کٛ لَاتِ دٛوْ عِيسَى، مٛ نَسَرَتُ، اَلنَّبِيجٛ بَاوْطٛ ندٜرْ کُوطٜ عٜ بٛلّٜ يٜىٰسٛ اَللَّه عٜ يٜىٰسٛ عُمَّاتٛورٜ ڢُو، نٛ مَوْࢡٜ لِمَنْعٜنْ عَمِنْ عٜ مَوْࢡٜ عَمِنْ زَمْبٛرِمٛ، نغَمْ عٛحِيتٜ کِيتَ مَايْدٜ؞ ࢡٜࢡِلِمٛ دٛوْ لٜغَّلْ غَاڢَانغَلْ؞ مِنْ تَمِّنٛ کَنغْکٛ رِمْطِنْتَنٛ إِسْرَاءِيلَ؞ عَمَّا بٜى مَاجُمْ ڢُو، حَنْدٜ ࢩَلَادٜ تَتَࢡْرٜ کٛ کُوجٜ طٜعٜ لَاتٛرِ؞ ڢَحِنْ رٜوْࢡٜ وٛطْࢡٜ شَکَ عَمِنْ کَيْطِنِ مِنْ، نغَمْ حَنْدٜ سُبَحَ ࢡٜنجٜحِ حَا يٜنَاندٜ، ࢡٜتَوَايْ ࢡَنْدُ مَاکٛ؞ ࢡٜنغَرْتِ، ࢡٜمبِعِ مِنْ مَلَاعِکَعٜنْ مبَنغَنِ ࢡٜ، مبِعِ ࢡٜ عٛ غٜىٰتٛ؞ وٛطْࢡٜ شَکَ عَمِنْ نجٜحِ حَا يٜنَاندٜ، تَوِ کُوجٜ مَنْ بَنَ رٜوْࢡٜ مبِعِ نٛنْ، عَمَّا کَنغْکٛ، ࢡٜنغِعَايْ مٛ؞»
ندٜنْ عِيسَى وِعِ ࢡٜ‏: «حٜيْ عٛنٛنْ سٛويَ-ڢَامُعٜنْ، نٜىٰࢡَ-ࢡٜرْطٜعٜنْ حَا نُطِّنْغٛ کٛ اَلنَّبِعٜنْ مبِعِ ڢُو‏! نَا دٛولٜ اَلْمَسِيحُ تٛرّٛرٛ کُوجٜ طٜعٜ ڢُو حِدّٜکٛ عٛنَسْتَ تٜدُّنغَلْ مَاکٛ نَ؟» عٛڢُطِّرِ دِغَ دٜڢْتٜ مُوسَى حَا دٜڢْتٜ اَلنَّبِعٜنْ ڢُو، عٛڢَامْتِنِ ࢡٜ کٛ وِنْدَ ندٜرْ دٜڢْتٜ دٛوْ مَاکٛ ڢُو؞
ندٜ ࢡٜࢡَدَکٜ وُرٛ نغٛ ࢡٜنجَحَتَ، عٛوَطِ بَنَ عٛسَالٛتٛ؞ عَمَّا ࢡٜࢡِلِّمٛ بٜى وِعْغٛ‏: «جٛوطٛدَ بٜى عَمِنْ، نغَمْ حِيرِ، جٜمَّ ࢡَدَکٜ؞» عٛنَسْتِ نغَمْ وٜىٰرْدُغٛ بٜى مَࢡّٜ؞ ندٜ عٛجٛوطِ بٜى مَࢡّٜ حَا عٛࢩَامَ، عٛحٛوعِ تَمْسٜىٰرٜ، عٛبَرْکِطِنِ ندٜ، عٛيٜوِ ندٜ، عٛحٛکِّ ࢡٜ؞ ندٜنْ غِتٜ مَࢡّٜ مَࢡِّتِ، ࢡٜعَنْدِتِمٛ، عَمَّا عٛمَجِّتِ غِتٜ مَࢡّٜ؞ ࢡٜمبِعْمبِعْتِرِ شَکَ مَࢡّٜ‏: «ࢡٜرْطٜ مٜىٰطٜنْ نغُلَايْ ندٜرْ مٜىٰطٜنْ ندٜ عٛوٛلْوَنِ عٜنْ حَا لَاوٛلْ، عٛڢَامْتِنِ عٜنْ کٛ وِنْدَ ندٜرْ دٜڢْتٜ غٛ نَ؟»
ندٜرْ وَکَّتِ مَنْ ندٜنْ ࢡٜعُمِّ، ࢡٜلٛرْتِ حَا عُرُسَلِيمَ، ࢡٜتَوْتِ ݠُکَرَعٜنْ سَݠّٛ عٜ غٛعٛ عٜ وٛنْدُࢡٜ بٜى مُمْعٜنْ طٛنْ مٛوࢡْتِ، ࢡٜطٛنْ مبِعَ‏: «ڢَکَتْ جَوْمِرَاوٛ عُمِّتَکٜ، عٛوَنغَنِ سِمٛنْ بٛو؞» کَمْࢡٜ بٛو ࢡٜنغٜشِّ ࢡٜ کٛ تَوِ ࢡٜ حَا لَاوٛلْ، نٛ ࢡٜعَنْدِتِرِ عِيسَى وَکَّتِ عٛسٜنْدِ تَمْسٜىٰرٜ بٛو؞


يَاکٜ ندٜ ࢡٜطٛنْ مبٛلْوَ حَالَ مَنْ، عِيسَى بٜى حٛورٜ مُمْ وَنغِ، دَرِ شَکَ مَࢡّٜ، وِعِ ࢡٜ‏: «سَلَامَنْ لَاتَنٛ عٛنْ؞» ݠُکَرَعٜنْ کٜىٰوِ کُلْتٛرٜىٰنغٛلْ، ࢡٜتَمِّ ࢡٜنغِعِ غِنَّوٛلْ؞ عَمَّا عٛوِعِ ࢡٜ‏: «نغَمْ طُمٜ عٛنْ طٛنْ شَکْلِ؟ نغَمْ طُمٜ سٜکُيٜ حٜىٰوِ ࢡٜرْطٜ مٛوطٛنْ؟ ندَارٜ جُوطٜ عَمْ عٜ کٛسْطٜ عَمْ، طُمْ مِنْ؞ مٜىٰمٜىٰطَمْ، ندَارٜ، نغَمْ رُوحُ وَلَا کُسٜلْ عٜ عِعٜ بَنَ نغِعٛتٛنْ مِمَرِ؞» ندٜ عٛوِعِ ࢡٜ طُمْ، عٛحٛلِّ ࢡٜ جُوطٜ مَاکٛ عٜ کٛسْطٜ مَاکٛ؞ ندٜرْ سٜيٛ عٜ حَيْطِنَارٜ مَࢡّٜ، ࢡٜمبَاوَايْ نُطِّنْغٛ تَوٛنْ؞ ندٜنْ عٛوِعِ ࢡٜ‏: «عٛنْ نغٛودِ ࢩَامْدُ حَا طٛ نَ؟» ࢡٜنغَدَّنِمٛ تَࢨْرٜ لِينغُ شَعَانغُ؞ عٛحٛوعِ طُمْ، عٛࢩَامِ يٜىٰسٛ مَࢡّٜ؞ ندٜنْ عٛوِعِ‏: «طُمْ کٛ مبِعْنٛ مِ عٛنْ يَاکٜ مِ طٛنّٛ بٜى مٛوطٛنْ تَوٛنْ‏: دٛولٜ کٛ وِنْدَ دٛوْ عَمْ ندٜرْ تَوْرٜىٰتَ مُوسَى عٜ دٜڢْتٜ اَلنَّبِعٜنْ عٜ جَبُورَ ڢُو حٜبِّتِنٜ؞» ندٜنْ عٛمَࢡِّتَنِ ࢡٜ ڢَامُ حَا ࢡٜݠَامَ دٜڢْتٜ، عٛوِعِ ࢡٜ‏: «بَنَ نِي طُمْ وِنْدَ‏: اَلْمَسِيحُ تٛرّٛتٛ، عٛعُمِّتِتّٛ دِغَ مَايْدٜ ࢩَلَادٜ تَتَࢡْرٜ، بٜى عِنْدٜ مَاکٛ ࢡٜنغَازِنَنْ يِمْࢡٜ عُمَّاتٛوجٜ ڢُو حَا ࢡٜتُوبَ عٜ ࢡٜکٜࢡَ يَاڢُيٜ حَکّٜىٰجِ، طُمْ ڢُطَّ حَا عُرُسَلِيمَ؞ عٛنٛنْ نغٛنِ سٜىٰدٛوࢡٜ کُوجٜ طٜعٜ؞ ندَا، مِنٜلْدَنَنْ عٛنْ مٛ بَابِرَاوٛ عَمْ عِينِ؞ نجٛوطٜ ندٜرْ بٜرْنِوٛلْ حَا تٛ عٛنْ کٜࢡِ بَاوْطٜ عِوْطٜ دِغَ دٛوْ؞»


عِيسَى يَحْرِ ࢡٜ يَاسِ بٜرْنِوٛلْ، حٜىٰدِ بَيْتَنِيَ؞ عٛࢡَنغْتِ جُوطٜ مَاکٛ، عٛبَرْکِطِنِ ࢡٜ؞ يَاکٜ عٛطٛنْ بَرْکِطِنَ ࢡٜ، عٛسٜنْدِرِ بٜى مَࢡّٜ، عٛعٜىٰنغِ حَا عَسَمَ؞ کَمْࢡٜ بٛو، ࢡٜشُجِدَنِمٛ، ࢡَاوٛ مَنْ ࢡٜکٛوتِ حَا عُرُسَلِيمَ بٜى سٜيٛ مَنغٛ؞ ࢡٜتٛکِّ يَحُغٛ حَيْکَلِيرُ تُمْ، نغَمْ مَنغْتُغٛ اَللَّه؞

Escucha a لُکَ 24