Zekariya 8
8
Twaambo tumwi twa-Zekariya
1Lino ijwi lya-Jehova wamakamu lyakasika, lyakati, 2#Nah 1:2Mbuboobu mbwaamba Jehova wamakamu. Ndasungwaalila Zioni busungu bupati. Ndamusungwaalila cakukalala loko. 3#Is 1:21; 2:2,3; Int 48:1,2; Jer 31:23Mbuboobu mbwaamba Jehova. Njooboola ku-Zioni akukala mukati ka-Jerusalemu, nkabela Jerusalemu uyooambwa kuti munzi wabuswini, cilundu ca-Jehova wamakamu, cilundu cisalala, 4#1 Sam 2:31; Is 65:20Mbuboobu mbwaamba Jehova wamakamu. Kuyooba limbi banene abacembele bakala mumigwagwa ya-Jerusalemu, umwi aumwi uyoojata mufunko mujanza lyakwe nkaambo kakucembaala. 5Alimwi migwagwa yamunzi iyoozula balombe abasimbi basebana mulinjiyo. 6#My 11:23; Job 42:2; Lk 1:37; Rom 4:21Mbuboobu mbwaamba Jehova wamakamu. Na eci cilagambya mumeso aabantu basyeede kumazuba ano, sa nkukwaamba kuti cilagambya mumeso aangu? mbwaamba Jehova wamakamu. 7Mbuboobu mbwaamba Jehova wamakamu. Nzoofutula bantu bangu bamunyika yakujwe abamunyika yakumbo. 8#Lev 25:17; Jer 4:2; Ezk 11:20; Zek 13:9; Ciy 21:3Lino njoobaleta kuti bakale mu-Jerusalemu, nkabela bayooba bantu bangu, ambebo njooba Leza wabo, mubuswini amubululami.
9 #
Hag 2:4,18; Ezr 5:1,2 Mbuboobu mbwaamba Jehova wamakamu. Amuyumye maanza aanu, inywe nomumvwide ano mazuba majwi aya aazwa mumulomo wabasinsimi, kuzwa kubuzuba intalisyo yaŋanda ya-Jehova wamakamu niyakatalika kubikwa, intempele niyakatalika kuyakwa. 10Nkaambo mumazuba aakamana katakwe cakuvola camuntu niciba cakuvola camunyama, aboonse ibakazwa muŋanda na kunjila muŋanda bakabula luumuno kulibasinkondo-nyina, nkaambo ndakalwanya umwi aumwi kumweenzinyina. 11Lino nsikooyoocitila bantu aba basyeede mbuli mbundakacita mumazuba aakamana pe, mbwaamba Jehova wamakamu. 12#Is 61:7; Mt 6:33; 1 Tim 4:8Nkaambo kuyoobyalwa imbuto yaluumuno, Musaansa uyooenzya micelo yawo, anyika iyooyungizya zilyo, amajulu ayoolosya lume, nkabela njooabila aba bantu basyeede zintu ezi zyoonse. 13#Jer 42:18; Matl 12:2; Dt 20:3,4; Ef 6:10Lino mbuli mbumwakaba cisampauzyo akati kabamasi, luzubo lwa-Juda aluzubo lwa-Israyeli, lino njoomufutula kuti mube cilongezyo, Mutayoowi pe. Amuyumye maanza aanu.
14 #
2 Mak 36:16
Nkaambo mbuboobu mbwaamba Jehova wamakamu. Mbubonya mbundakakanza kumucitila bubi, bamauso nibakandikalazya, mbwaamba Jehova wamakamu, akutaleka bukali, 15#Jer 31:38lino mumazuba ano ndakanza kucitila Jerusalemu aluzubo lwa-Juda bubotu. Mutayoowi pe. 16#Tus 12:19; Ef 4:25Nzeezi incito nzimweelede kucita, Amwaambe lusinizyo umwi aumwi kumweenzi nyina, Imbeta nzimubeteka kuminzi yanu zibe zyabuswini azyaluu-muno. 17#Tus 3:29; 6:16Mutayeeyi bubi umwi aumwi kumweenzinyina mumyoyo yanu, alimwi mutayandi zikonkezyo zyakubeja. Nkaambo nzezintu ezi nzensulide, mbwaamba Jehova.
18Lino ijwi lya-Jehova wamakamu lyakandisikila, lyakati, 19#Jer 52:6; 41:1; Is 35:10Mbuboobu mbwaamba Jehova wamakamu. Kuliimya kwamwezi wane, akuliimya kwamwezi wasanu, akuliimya kwamwezi wamusanu aibili, akuliimya kwamwezi wakumi, zyoonse ziyoobeda luzubo lwa-Juda ziindi zyakukondwa akusekelela amapobwe mabotu. Lino amuyandisye buswini aluumuno.
20Mbuboobu mbwaamba Jehova wamakamu. Kuyoosika misyobo misyobo abantu baminzi minji. 21Bantu bamunzi umwi bayootamba beenzinyina bakumunzi umbi kuti, Katuya tukatontozye busyu bwa-Jehova, akuyandaula Jehova wamakamu. Atweende anywe toonse. 22Elyo misyobo minji anzubo ziyumu ziyooboola kukuyandaula Jehova wamakamu muJerusalemu akukutontozya busyu bwa-Jehova.
23Mbuboobu mbwaamba Jehova wamakamu. Mumazuba ayo bantu bali ikumi bazwa kumisyobo yoonse akumyaambo yoonse bayoojata cikobela camuntu mu-Juda, bayooti, Atweende anywebo, nkaambo twamvwa kuti Leza mpali akati kanu.
Currently Selected:
Zekariya 8: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.