Jobu 22
22
Elifazi ulapa Jobu kaambo kazibi zyaandeene akumwaambila kuti asanduke alelekwe a-Leza
1Wakaamba lino Elifazi mu-Temani wakati,
2 #
Job 35:6-8; Int 16:2 Sa muntu inga ulaba alugwasyo kuli-Leza?
Sena muntu musongo taligwasyi mwini?
3Singuzuzyoonse ujana mpindu sa kubululami bwako?
Buluzi bwanzila zyako bumuletelanzi?
4Ulakupubwidanzi akaambo kaluzumino lwako,
Akukubeteka?
5Bubi bwako tabuli bupati sena?
Azilubizyo zyako nzinji.
6Nkaambo wakapa kubeenzinyoko,
Akubweza zisyomyo zyazyakusama zyabo
Kuti beende acinswe.
7 #
Job 31:16,17 Wakakasya bakatede maanzi aakunywa;
Waima bafwide nzala zyakulya,
8Kuti bantu balaanguzu bavube nyika,
Abali ampuwo bakale mulinjiyo.
9Pele wakatanda bamukabafu aminwe buyo,
Akupenzya bamucaala.
10Nkekaambo aka ulizingulukidwe tukole,
Akuyoosegwa cakulubuluka,
11Awalo mumuni wako waba mudima;
Ayebo wavumbwa amaanzi manji.
12 #
Is 66:1
Leza tali mujulu lyamajulu,
Akulanga nyenyeezi zili mulindilyo sena?
13Nekubaboobo ulaamba kuti,
Leza uliziinzi?
Inga ulalela sena kuzwa mumudima uusia mbi?
14 #
Int 139:12
Uleenda atala amubalo wakujulu,
Tatuboni nkaambo kamayoba.
15 #
Matl 6:11-13
Nkooku nkoyeeya sena,
Mbobakayeeya bantu babi beensiku?
16Bakafwambaana kufwa
Nebakakukululwa akupaya kwamaanzi;
17Abo bakaamba kuli-Leza kuti, Kozwa kulindiswe;
Alimwi kuti, Singuzuzyoonse inga ulakonzya kutucitilanzi?
18 #
Int 17:13,14 Anukuti ngonguwe wakazuzya maanda aabo azintu zibotu;
Pele, (mbe amba webo) babi mbobayeeya ncintu cili kulaale kulindime!
19 #
Int 107:42
Bantu babo tu bakatangala kubona mamanino aabo,
Abatajisi mulandu bakabasaalizya
20Kaboompolola kuti, Batulwanya bazimanisigwa,
Alimwi neebasia ciyooumpwa amulilo.
21 #
Is 27:5
Koliyanzanya a-Leza, ulibatamike,
Elyo kuyakuba bubotu kulinduwe.
22 #
Int 119:11; Jer 15:16 Kozumina indayo zyakwe,
Majwi aakwe kaakala mumoyo wako,
23Kuti kosanduka cakulibombya kuli-Singuzuzyoonse,
Akutanda bubi kulaale amunzi wako;
24Kuti kosowa ngolida yako,
Akuwaala mumulonga ngolida yako ya-Ofiri,
25Lino Singuzuzyoonse uyooba ngolida yako,
Ansiliva yako abuvubi bwako.
26Elyo Singuzuzyoonse uyooba lukondo lwako,
Ayebo inga ulalungama kuli-Leza;
27Nokomba uyookuvwiila,
Elyo inga ulazuzya zisyomezyo zyako kulinguwe.
28 #
Tus 16:3
Ncolibambila ciyookwimikilwa,
Izuba liyookumunikila nzila zyako,
29Nkaambo ulabombya balisumpula,
Pele ulagwasya babombede.
30Ulavuna batajisi mulandu,
Ulabafutula nkaambo kalusalalo lwamaanza aabo.
Currently Selected:
Jobu 22: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.