Jeremiya 7
7
Bululami bulike mbobubotezya Leza, Kupaila kwakuntempele takugwasyi na bantu baceenda muzibi
1Ngaaya makani aakasika kuli-Jeremiya kuzwa kuli-Jehova. Wakaambilwa kuti, 2#Jer 19:2,3; 26:2Ima mumulyango waŋanda ya-Jehova, ukambauke nkuko majwi aya aakuti, Amuswiilile ijwi lya-Jehova nyoonse nuba-Juda nomunjila mumilyango eyi kuzookomba Jehova. 3Mbuboobu mbwaamba Jehova wamakamu Leza wa-Israyeli, Amubotye inzila zyanu ancito zyanu, elyo njoomukazika mpoonya ano. 4#1 Sam 4:4; Mik 3:11Mutasyomi majwi aakubeja buyo aakuti, Njeeyi intempele ya-Jehova, njeeyi intempele ya-Jehova, njeeyi intempele ya-Jehova!
5Nkaambo na mwabotya loko inzila zya nu ancito zyanu, na ncobeni mwabetekana kabotu umwi aumwi amweenzinyina, 6#Dt 6:14; 8:19; Jer 13:10na mwaleka kupenzya beenzu abamucaala abamukabafu nanka kutila mpoonya ano bulowa bwabaabo batakwe milandu, alimwi na mwaleka kutobela baleza bambi bamubisizya, 7#Dt 4:40elyo njoomukazika mpoonya ano, munyika eyo njiyonya njindakapa bamausowanu kuti baivube lyoonse kukabe kutamani.
8Ncobeni mulasyoma majwi aakubeja aatagwasyi. 9#1 Bam 18:21; Hos 4:1; Kul 20:3Na mulabba akujaya akucita bumambe akukonka cakubeja akutentela Baala tununkilizyo akuya butobela baleza bambi mbemutezi, 10#Ezk 23:39sa ncibotu kuza akwiimikila kubusyu bwangu omuno muŋanda iiambwa muzina lyangu akwaamba kuti, Twafutulwa, lino tulakonzya kunoocicita zisesemyo ezi zyoonse? 11#Is 56:7; Joh 2:24; Mt 21:13; Mk 11:17; Lk 19:46Sa iŋanda eyi iiambwa muzina lyangu lyasanduka kuba ikoba lyababbi mumeso aanu? Ncobeni mebo ndibwene, ndicibwene! mbwaamba Jehova. 12#Dt 12:11; 1 Sam 4:10; Jos 18:1; Int 78:60; Jer 26:6Kamuya kubusena bwangu bwaku-Sile, nkundakataanguna kukazika izina lyangu, mukabone ncindakabucitila nkaambo kazibi zyabantu bangu baIsrayeli. 13#2 Mak 36:15; Tus 1:24; Is 65:12Lino mbuli mbumucitide zintu ezi zyoonse, mbwaamba Jehova, alimwi nindakafuma kumwaambila mwakakaka kuswiilila, alimwi nindakamwiita teemwakavuwa, 14#Int 78:60ncobeni njoocitila iŋanda iiambwa muzina lyangu, njimusyoma, abusena mbundakapa bamausowanu, mbubonya mbundakacitila Silo. 15#2 Bam 17:23Nkabela njoomusoowa kuzwa kumeso aangu, mbubonya mbundakasoowa banabakwanu boonse, nkokuti lunyungu loonse lwa-Efraimu.
16 #
Kul 32:10; Jer 15:1 Lino webo, utakombeli bantu aba, utabacitili lukwiilo na cikombyo, nikuba kubakombelezezya, nkaambo nsikooyookuswiilila pe. 17Sa tobwene mbubacita muminzi ya-Juda amumigwagwa yaku-Jerusalemu? 18#Jer 44:17-19Bana balatebba inkuni, bamawisi baladukula mulilo, abanakazi balakanda busu, kuti bajikile namalelo wakujulu zibunge, akutilila mizimu myeenzu zipaizyo zyakunywa, kuti bandikalazye. 19#Jer 17:27; 1 Kor 10:22Ma! Sa ncobeni balandikalazya? mbwaamba Jehova. Sa tabalikataazyi beni akulyuusya insoni? 20Lino mbuboobu mbwaamba Mwami Jehova. Ncobenibukali bwangu buyoosya buyootilwa mpoonya ano, buyootililwa bantu abanyama, misamu yamusokwe amicelo yanyika yoonse. Buyoopya akutazimika,
21 #
Is 1:11; Jer 6:20; Am 5:21 Mbuboobu mbwaamba Jehova wamakamu, Leza wa-Israyeli, Amubike zituuzyo zyanu azipaizyo zyanu zyoonse antoomwe, mukalye nyama nubeni. 22#1 Sam 15:22; Int 51:16Nkaambo mubuzuba obo nindakagwisya bamausowanu munyika ya-Egepita, teendakabaambila nikuba kubalailila ijwi niliba lyomwe lyazituuzyo na lyazipaizyo. 23#Kul 15:26; 19:5; Lev 26:3,12; Dt 6:3; Jer 11:4,7Pe, makani ngendakabalailila ngaaya, Ndakati, Amuswiilile ijwi lyangu, lino njooba Leza wanu, anywebo muyooba bantu bangu. Amweende munzila zyoonse nzindamulailila, kuti mujane coolwe. 24#Dt 29:19Pele tabakwe nibakaswiilila nikuba kucenjeka matwi aabo pe, bakacili kuya bweenda mumiyeeyo yabo beni amuzinguni zyamyoyo yabo mibi. Bakapiluka munsi, teebakaya kunembo pe. 25#Neh 9:30; Jer 25:4Kuzwa kubuzuba obo bamausowanu nibakazwa munyika ya-Egepita mane kusikila kubuzuba obuno, ndabatumina balanda bangu boonse basinsimi. Mazuba oonse ndakali kufuma kubatuma. 26#Neh 9:17Nekubaboobo teebakandiswiilila nikuba kucenjeka matwi aabo pe, bakali kuyumya insingo zyabo akucita bubi akwiinda bamawisi.
27 #
Ezk 2:7
Uyoobaambila majwi aya oonse, pele tabakooyooswiilila. Uyoobaita, pele tabakooyoovuwa. 28Lino uyoobaambila kuti, Ngooyu musyobo iwakakaka kumvwa ijwi lya-Jehova Leza wawo akutazumina kulayigwa. Lusinizyo lwanyonyooka, lwakosoka kuzwa kumilomo yabo.
Zibi zyaba-Juda zilaleta lufu
29 #
Job 1:20; Is 15:2; Jer 16:6; Ef 2:3 Kogela masusu aako akwaasoowa, Imba lwiimbo lwakulila atala lyabalubulansuki, nkaambo Jehova wakaka, watanda bana mbaakalalila. 30#2 Bam 21:4; 2 Mak 33:4Nkaambo bana ba-Juda bacita bubi mumeso aangu, mbwaamba Jehova. Babika zisesemyo zyabo muŋanda iiambwa muzina lyangu kuti baisofwaazye. 31#Dt 17:3; Lev 18:21; 2 Bam 23:10; Jer 32:35Alimwi baliyakide zipaililo zya-Tofeti mukuti lyamwana wa-Hinomu, kuti batente bana babo balombe abasimbi mumulilo, cintu ncindatakabalailila nikuba kuciyeeya. 32#2 Bam 23:10Nkaambo kako mumazuba aaboola, mbwaamba Jehova, takukooyooambwa kuti, ngu-Tofeti nanka ikuti lyamwana waHinomu. Liyooambwa kuti ndikuti lyabujayi, nkabela omo mu-Tofeti banooyoozika mane mukaate. 33Mitunta yabantu aba iyooba zilyo zyabayuni bakujulu azyabanyama baansi. Taakwe uunooyoobayamina. 34#Hos 2:11; Lev 26:33; Jer 16:9; 25:10; Ciy 18:23Lino muminzi ya-Juda amumigwagwa yamu-Jerusalemu njoolesya ijwi lyabuse-kelezi ajwi lyakukondwa, ijwi lyasibwiinga ajwi lyanabwiinga, nkaambo nyika iyooba inkanda buyo.
Currently Selected:
Jeremiya 7: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.