Isaya 7
7
Rezini a-Peka mbubakalwisya cisi ca-Juda
1 #
2 Bam 16:5; 2 Mak 28:5-6 Mumazuba aa-Ahazi mwana wa-Jotamu mwana wa-Uziya mwami waJuda, kwakasika Rezini mwami wa-Aramu a-Peka mwana wa-Remaliya mwami wa-Israyeli kuzoolwisya Jerusalemu, pele bakakacilwa kuuzunda. 2Elyo luzubo lwa-Davida lwakaambilwa kuti, Ba-Aramu balitangene mulongo aba-Efraimu, Nkabela moyo wakwe amyoyo yabantu bakwe yakakankama mbubonya mbuli misamu yamusokwe mbiizungaana nuunga muuwo.
3 #
2 Bam 18:17; Is 36:2 Mpoonya awo Jehova wakaambila Isaya kuti, Koya ukacinge Ahazi, uwe a-Searijasubu mwanaako, kumagolelo aamufolo waziba lyakujulu kumugwagwa wamuunda wabasikusanzya. 4Lino uleelede kumwaambila kuti, Cenjela! Umuna! Utayoowi! Moyo wako utawizuki nkaambo kazeezi zifumpu zyobile zyazisisi zisunta, Utayoowi bukali bwa-Rezini abwabaAramu abwamwana wa-Remaliya. 5Ba-Aramu bavwiya makani mabi aakukubisizya, abalo ba-Efraimu amwana wa-Remaliya. Bati, 6Katuya, tukalwisye cisi ca-Juda, tukacisaale akucipwaya, elyo tuyoobika mwami umbi mukati kaco, nkukuti mwana wa-Tabeeli. 7Pele mbuboobu mbwaamba Mwami Jehova. Makani taakooyoocitwa obo pe. Taakooyooba. 8#2 Sam 8:6Nkaambo mutwe wa-Aramu ngu-Damasko, amutwe wa-Damasko ngu-Rezini. Myaka iili makumi aali musanu alimwi aisanu niitana kumana, ba-Efraimu balapwayigwa, tabakooyooba limbi cisi. 9Mutwe wa-Efraimu nguSamariya, amutwe wa-Samariya ngumwana wa-Remaliya. Na mwakaka kuzumina, ncobeni tamukooyooimisigwa.
Imanueli: Leza uli aswe
10Lino Jehova wakaambila Ahazi lwabili kuti, 11Kokumbila citondezyo kuli-Jehova Leza wako, Kokumbila citondezyo camubulondo bwamaanzi niciba cakujulu kujulu. 12Pele Ahazi wakavuwa kuti, Nsikookumbili pe. Nsikoesunkisya Jehova. 13Elyo wakati, Amuswiilile nuluzubo lwa-Davida, Sa kukataazya bantu takumulami? Sa mulayanda kukataazya Leza wangu alakwe? 14#Mt 1:23; Lk 1:35; Is 9:6; 1 Tim 3:16Lino Mwami mwini ulamupa citondezyo. Amubone! Musimbi uyoomita, uyoozyala mwana mulombe, uyoomuulika izina lya-Imanueli. 15Uyoolya buci amabisi naazookula akuziba kukaka bubi akusala bubotu. 16#2 Bam 15:30Nkaambo naacitana kuziba kukaka bubi akusala bubotu, nyika njoyoowa bami bayo bobile iyoosaalwa. 17#2 Mak 28:19; Neh 9:32; Is 8:7,8; 1 Bam 12:16Jehova uyoosisya kulinduwe akubantu bako akuluzubo lwauso mazuba aatana kusika kuzwa kuciindi eciya cisi ca-Efraimu nicakaandaanisigwa acisi ca-Juda. Uyoosisya mwami wa-Asuri.
Mapenzi aaciza
18Lino mubuzuba obo Jehova uyoosibila luuka luli kumagolelo aamilonga ya-Egepita anzuki zili mucisi ca-Asuri. 19Nkabela zyoonse ziyoosika, ziyookala muminkuni iitakwe bantu amumpako zyamandomba amumaunga amumani oonse.
20 #
2 Bam 16:7; Is 10:5,6; Jer 27:6,7 Mubuzuba obo Mwami uyoosakuzya lunyoolo lubbadelelwa luli mutala lyamulonga, nkukuti mwami wa-Asuri, mutwe aboya bwamumaulu. Acalo cilezu coonse luyoocimana.
21Mubuzuba obo muntu uyooembela impwizi yaŋombe ambelele zyobile, 22Nkabela nkaambo kamukupa munji nguzikamwa uyoolya mabisi. Nkaambo boonse bantu bacisyeede munyika bayoolya mabisi abuci.
23Mubuzuba obo masena oonse aakajisi misaansa iili cuulu iiulwa mali aansiliva aali cuulu ayooba amaunga amitubetube buyo. 24Muntu asika nkuko uyooletelela mivwi abuta, nkaambo nyika yoonse iyoozula maunga amitubetube. 25Azilundu zyoonse izyakalimidwe maamba, tokooyoosika limbi kulinzizyo nkaambo kakuyoowa maunga amitubetube. Ziyooba zyakweembelela iŋombe akulyataulwa imbelele.
Currently Selected:
Isaya 7: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.