Isaya 5
5
Cikozyano camuunda wamasaansa
1 #
Mt 21:33; Mk 12:1; Lk 20:9; Int 80:8 Lino njiimbe makani aamuyandwi wangu. Njiimbe lwiimbo lwamuyandwi wangu lwakwaamba makani aamuunda wakwe wamasaansa. Muyandwi wangu kajisi muunda wamasaansa mukalundu ikali avu ibotu. 2#Dt 32:6Elyo wakalima-lima, wagwisya mabwe, wazikila musaansa mubotu loko, alimwi wakayaka ingazi, akusya idindi lyakusinina masaansa. Lino wakali kulangila kuti uzyale micelo, pele wakazyala micelo yamusokwe buyo. 3#Rom 3:4Nubantu bakede mu-Jerusalemu abantu boonse ba-Juda, amubeteke makani aangu amakani aamuunda wangu wamasaansa. 4Sa kwakasyaala cintu niciba cimwi ncindakabula kucitila muunda wangu? Ino nkaambonzi, ciindi eco nindakali kusyoma kuti ulazyala masaansa, wakazyala masaansa aamusokwe buyo? 5Amuswiilile, nkamulwiide ncinti citile muunda wangu, Njoogwisya lubaya lwawo, elyo uyooligwa; njoomwaya bulambo bwawo, elyo uyoolyataulwa. 6Njoousaala. Taukooyoosonzolwa nikuba kusagwidwa. Kuyooboneka myuunga amitubetube buyo mulinguwo. Alimwi njoolailila mayoba kuti aleke kuwisya imvula alinguwo. 7Nkaambo muunda wamasaansa wa-Jehova wamakamu nduzubo lwa-Israyeli, abalo bantu ba-Juda musamu wakwe mubotu, Wakali kulangila lubeta, pele wakajana kupenzya buyo; wakali kulangila bululami, pele wakajana kulila buyo.
Majwi aa “Maawe”
8 #
Mik 2:2
Maawe kulibaabo baswaananya iŋanda kuŋandanyina akubika muunda kumuundanyina mane taakwe busena busyaala, aboobo mulakala amulike mukati kanyika. 9Nkaambo kako Jehova wamakamu wakakonka mumatwi aangu, wati, Ncobeni maanda manji ayoosaalwa. Maanda mapati mabotu ayoobula bantu bakede mumo. 10#Lev 27:16Nkaambo muunda uulimwa basune bali ikumi uyoozyala cisuwo comwe buyo. Zyeelesyo zili ikumi zyambuto zilazyala ceelesyo comwe buyo.
11 #
Tus 23:29,30 Maawe kulibaabo bafuma cifumo kuti batobele bukoko, alimwi balamuka kuleka mangolezya mane bukoko bwabakola. 12#Am 6:5; Job 34:27; Hos 4:11Kagoma anyeele anamalwa akantimbwa awaini, zyoonse zilajanwa mumapobwe aabo, pele tababiki myoyo yabo kumilimo ya-Jehova, ancito zyamaanza aakwe tabaziboni. 13#Is 1:3,7; Hos 4:6; Lk 19:44; Rom 1:28; 2 Pet 3:5Nciceeco bantu bangu ncibatolelwa mubuzike nkaambo kakubula luzibo, Balemu babo bafwa inzala, ababuleya bawizuka nkaambo kanyotwa. 14Nkaambo kako cikalilo cabafwa calikomezya, caasamuna mulomo waco cakuteelekeka, nkabela bulemu bwabo alupyopyongano lwabo abuvubi bwabo ayooyo uusekelela, zyoonse zilaselukila mulincico. 15Muntu mutengwana ulakotama, alakwe mupati ulalibombya, aalo meso aabasikulisumpula alafwiinsigwa, 16pele Jehova wamakamu ulalemekwa mukubeteka, Leza uusalala ulasalazigwa mubululami. 17Lino tubelele tuyoocela mumani aabo, aalo masena aasaalidwe aabaneneede tupongo tuyooalya.
18Maawe kulibaabo bakwela milandu antambo zyabuyo, azibi balazikwezya intambo zyanola. 19#Is 66:5; Jer 17:5; Am 5:18; 2 Pet 3:3Balaamba kuti, Abindane akufwambya milimo yakwe, kuti twiibone. Makanze aa-Musalazi wa-Israyeli aswene kufwaafwi, aze, kuti tuzibe mbwaabede!
20Maawe kulibaabo baamba kuti bubotu mbubi, bubi mbubotu; babika mumuni mucibaka camudima amudima mucibaka camumuni; babika kulula mucibaka cabunono abunono mucibaka cakulula.
21Maawe kulibaabo balipa busongo mumeso aabo beni, alimwi balayeeya kuti tuli bacenjede.
22Maawe kulibaabo bali anguzu zyakunywa waini, abasinguzu bavwelanya zya kunywa zikola. 23Mbombabo balulamika sizibi kuti balye makulo, abululami bwamululami balamunyanzya mbubo. 24#2 Bam 17:14; Lk 7:30; Joh 12:48Nkaambo kako, mbubonya mbuli mabangabanga mbwaalya zisikosiko, abuungu mbubuwa mukati kamulilo, mbubonya obo muyanda wabo uyooba mbuli bubozi, amalubaluba aabo ayoomwaika mbuli lusuko. Nkaambo basampaula mulao wa-Jehova wamakamu, alyalo ijwi lya-Musalazi wa-Israyeli balikwiilila.
Leza mbwakalalila bantu bakwe
25Nkaambo kako bukali bwa-Jehova bwabukila bantu bakwe. Watandabika ijanza lyakwe, wabauma, nkabela zilundu zyakankama, ayalo mitunta yabo yaba mbuli bufumba mukati kamigwagwa. Nekubaboobo bukali bwakwe tabuna kumana, ijanza lyakwe licitandabikidwe. 26Nkabela uyoosumpwida bamasi bazwa kule citondezyo akubasibila kuzwa kumagolelo aanyika, elyo bayoofwambaana kuza aluno. 27Takukooyooba muntu naba omwe akati kabo uukataala naba uulifumpuzya, Takukooyooba naba omwe uuona naba uuli muŋonzi. Takukooyooba naba omwe uuangulukidwe lutambo lwakucibunu cakwe naba uukonokelwa intambo zyansangu zyakwe. 28Mivwi yabo yoonse ilinonedwe, amata aabo oonse alibambidwe. Insumba zyambizi zyabo zyayuma nta mbuli mabwe, amavwili aabo alayeeyegwa kuti ali aluno mbuli kambizi. 29Kuvuluma kwabo kuli mbuli kuvuluma kwamulavu. Balavuluma mbuli basyuumbwa, Balalila, balajata nyama, balainka ayo, nkabela taakwe uukonzya kwiivuna. 30Balavuluma kulimbabo mubuzuba obo mbuli kuvuluma kwalwizi. Elyo uulanga nyika uyoobona mudima buyo amapenzi. Mumuni ulasiizigwa mumayoba aabo.
Currently Selected:
Isaya 5: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.