Ezekieli 36
36
Ezekieli mbwaakasinsimitla zilundu zya-Israyeli
1Lino webo, O mwana amuntu, sinsimina zilundu zya-Israyeli. Amba kuti, Nuzilundu zya-Israyeli, amuswiilile ijwi lya-Jehova. 2#Dt 32:13; Int 78:69; Is 58:14; Hab 3:19Mbu boobu mbwaamba Mwami Jehova. Basinkondonyoko bakusampaula, bati, Aha! Zilundu zyaciindi zyaabwa mumaanza esu kuti tuzivube. 3Nkaambo kako sinsima kuti, Mbuboobu mbwaamba Mwami Jehova. Ncobeni bamusaala, bamumwaya koonse koonse, kuti bamasi bapilingene bamuvube, aboobo mwaba caambyo ajwi lyakusampauzya mumilomo yabantu, 4#Int 79:4Nkaambo kako, nuzilundu zya-Israyeli, amuswiilile ijwi lya-Mwami Jehova. Mbuboobu Mwami Jehova mbwaambila zilundu atulundulundu, magombela amakuti, matongo aabula bantu aminzi jisiidwe, izyaba cisaalo acisabuzyo kulibamasi bamwi beengelede. 5#Dt 4:24; Is 66:15,16; Ezk 38:19; 35:10; Zek 1:15Nkaambo kako mbuboobu mbwaamba Mwami Jehova, Ncobeni mukupya kwabbivwe lyangu ndaamba aabamasi bamwi acisi coonse caba-Edomu, ibakalipa nyika yangu kuti baivube. Myoyo yabo ilasekelela cakusampaula, aboobo baivuba akwiisaala. 6#Int 123:3,4; Ezk 34:29Nkaambo kako sinsima aanyika ya-Israyeli, Ambila zilundu atulundulundu, magombela amakuti, kuti, Mbuboobu mbwaamba Mwami Jehova. Amubone! Ndaamba cabbivwe acabukali nkaambo kakuti mwalemenwa bweeme bwabamasi. 7#Ezk 20:5Nkaambo kako mbuboobu mbwaamba Mwami Jehova. Ncobeni ndakonkezya kuti bamasi bamuzyungulukide bayoolemenwa bweeme abalo.
8Pele nywebo, nuzilundu zya-Israyeli, muyoosyuuka mitabi akuzyalila bantu bangu ba-Israyeli micelo, nkaambo bali kufwaafwi kuboola. 9#Hos 2:21-23; Hag 2:19Nkaambo ndime sikumugwasya, njoomubamba, nkabela muyoolimwa akubyalwa. 10#Is 58:12; 61:4; Am 9:14Njoomuvuzizya bantu, nkukuti luzubo lwa-Israyeli loonse buyo, nkabela minzi iyookalwa bantu, amatongo ayooyakululwa. 11#Jer 31:27; 33:12; Ezk 35:9; Hos 2:20; Joel 3:17; 1 Joh 5:20Njoomuvuzizya bantu abanyama, nkabela bayoozyalisya akuvula. Njoocita kuti mukalwe mbubonya mbumwakabede kalekale. Njoomuletela coolwe kwiinda cakutaanguna, aboobo muyooziba kuti ndime Jehova. 12#Ob 1:17; Jer 15:7Njoocita kuti bantu kabeendeenda alindinywe, nkukuti bantu bangu ba-Israyeli. Bayookuvuba; uyooba lukono lwabo. Tokooyoobajayila limbi bana babo. 13#My 13:32Mbuboobu mbwaamba Mwami Jehova. Balamwaambila kuti, Mulalya bantu mulajayila musyobo wanu bana bawo. 14Pele lino tokooyoolya limbi bantu nikuba kujayila musyobo wako bana bawo, mbwaamba Mwami Jehova. 15#Is 60:14; Ezk 34:29; Zef 3:19,20Nsikooyookuswiilizyalimbi kusampaula kwabamasi; tokooyoolemezegwalimbi masampauzyo aabantu nikuba kulebya musyobo wako, mbwaamba Mwami Jehova.
Jehova mbwazoobukulusya bantu bakwe
16Lino ijwi lya-Jehova lyakandisikila, liti, 17#Jer 2:7; Lev 15:19O mwana amuntu, bantu baluzubo lwa-Israyeli, nibakacikede munyika yabo, bakaisofwaazya kunzila zyabo akumilimo yabo, Mumeso aangu inzila yabo yakali mbubonya mbuli kusofwaala kwamwanakazi kuciindi cakutondwa kwakwe. 18#Ezk 16:36Lino ndakabatilila bukali bwangu nkaambo kabulowa mbubakatila munyika, akaambo kazimpangaliko nzebakaisofwaazya. 19#Ezk 22:15; 7:3Ndakabamwaisya akati kabamasi akubapalanganya muzisi zyoonse. Ndakababeteka mbubonya mbuli bweelede inzila zyabo amilimo yabo. 20#Is 52:5; Rom 2:24Pele nibakasika kulibamasi, kufumbwa nkubakaya bakasofwaazya izina lyangu lisalala, nkaambo kwakaambwa aambabo kuti, Mbaaba bantu ba-Jehova, nekubaboobo bazwa munyika yakwe. 21#Ezk 20:9Mpawo ndakafwa insoni nkaambo kazina lyangu lisalala, ndilwakasofwaazya luzubo lwa-Israyeli akati kabamasi nkubakasika.
22 #
Dt 9:5; Int 106:8 Nkaambo kako ambila luzubo lwa-Israyeli kuti, Mbuboobu mbwaamba Mwami Jehova. Teensi nkaambo kandinywe nkencitila obo, O luzubo lwa-Israyeli, pe. Ndacita obo nkaambo kazina lyangu lisalala ndimwasofwaazya akati kabamasi nkumwasika. 23#Ezk 20:41Njoosalazya izina lyangu ipati ilyakasofwaazigwa akati kabamasi, ndimwakasofwaazya inywe akati kabo. Lino bamasi bayooziba kuti ndime Jehova, mbwaamba Mwami Jehova, nenzoosalazigwa mulindinywe mumeso aabo. 24#Ezk 34:13Njoomugwisya kulibamasi akumuyobolola kuzwa kunyika zyoonse akumusisya kunyika yanu. 25#My 19:13; Is 52:15; Jer 33:8; 1 Joh 1:7Njoomusansaizya maanzi aanjoloma kuti musalale. Busofwi bwanu boonse azimpangaliko zyanu zyoonse, njoomusalazya kulinzizyo. 26#Int 51:10; Joh 3:3-5; 2 Kor 3:18; Ezk 11:19-20Njoomupa moyo mupya akubika muuya mupya mukati kanu. Njoogwisya moyo wabbwe mumibili yanu akumupa moyo wabuntu. 27#Ezk 37:14; Is 44:3; Rom 8:4,9; Gal 5:5; Ef 1:13Njoobika Muuya wangu mukati kanu akucita kuti mweende mumilazyo yangu akubamba imbeta zyangu. 28#Ezk 28:25; Jer 30:22Lino muyookala munyika eyo njiyonya njindakapa bamausowanu, nkabela muyooba bantu bangu, ambebo njooba Leza wanu. 29#Mt 1:21; Int 105:16Njoomuvuna kuziimbo zyanu zisofweede, alimwi njooleta maila kuti avule, kutabi inzala akati kanu. 30#Ezk 34:27Njoovuzya micelo yamisamu azilyo zyamumyuunda, kuti mutasampaulwi limbi akati kabamasi nkaambo kanzala. 31#Ezk 6:9; Lev 26:39Lino muyooyeeya inzila zyanu zyabubi amilimo yanu iitaluleme, nkabela muyoolisampaula nubeni nkaambo kamilandu yanu azisesemyo zyanu. 32#Dt 9:5; Dan 9:19Teensi nkaambo kandinywe ncencitila obo, mbwaamba Mwami Jehova. Eci cizibwe kulindinywe. Amufwe insoni akuusa bweeme nkaambo kanzila zyanu, O luzubo lwaIsrayeli.
33 #
Rom 8:30-32
Mbuboobu mbwaamba Mwami Jehova. Mubuzuba obo ninjoomusalazya kumilandu yanu yoonse, njoocita kuti minzi ikalwe bantu, amatongo ayooyakululwa. 34#Jer 25:9Nyika iyakabula bantu iyoolimwa, tiikooyooba limbi matongo mumeso aaboonse bainda. 35#Is 51:3Lino bayooamba kuti, Nyika eyi iyakabula bantu sunu yaba mbuli muunda wa-Edeni, aminzi iisaalidwe iisiidwe iyakali matongo sunu ilijisi mabaya akukalwa bantu. 36#Int 58:11; Ezk 17:24; 22:14Lino bamasi beengelede bacisyeede bayooziba kuti ndime nde-Jehova ndayakulula minzi iisaalidwe akubyalulula mabubu. Ndime Jehova. Ndaamba. Ncendaamba nzoocicita.
37 #
Int 102:17; Is 45:11,19; Jer 29:11-13; Ezk 14:3; Zek 13:9; Mt 7:7,8; Flp 4:6; Jak 4:3 Mbuboobu mbwaamba Mwami Jehova. Acintu eci acalo luzubo lwa-Israyeli luyoocikumbila, nkabela njoobacitila ncico. Njoobavuzizya bantu mbuli imbelele. 38Mbuli imbelele zyakupaizya, mbuli imbelele zyaku-Jerusalemu kuziindi zyamapobwe, mbuboobo minzi iyakasiidwembwiiyoozuzigwa makamu makamu aabantu. Lino bayooziba kuti ndime Jehova.
Currently Selected:
Ezekieli 36: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.