Incito 22
22
1Nobakwesu anomatata, amuswiilile kulikazizya kwangu nkwendika-zizya ankuko kulindinywe.
2Nobakamvwa kuti ulaamba mumwaambo waci-Hebrayo, bakaumunisya. Walo wakateeti:
3Ndili mu-Juda, ndakazyalilwa mu-Tarso wamu-Kilikiya, pele ndakakomenena mumunzi muno, kumatende aa-Gamaliyeli, ndakaiisigwa mumulao wamatata cakumaninina, ndali musungu kuli-Leza mbubonya mbuli ndinywe nyoonse sunu, 4Ndakapenzya benzila eyi mane bakafwa, ndakaanga baalumi abakaintu akubabika muntolongo. 5Mupaizi mupati nguundilungulula abapati boonse, mbendakatambula magwalo aakuya kubakwesu. Nkabela ndakainka ku-Damasko kuti ndikabalete ku-Jerusalemu balaangidwe abo abayoojanwa, kuti bazoopenzegwe. 6Eno nendakali kuya bweenda akuswena ku-Damasko kuciindi caamutwe esikati, ndilyonya mumuni mupati uuzwa kujulu wakamweka cakundizinguluka. 7Ndakawida ansi, ndamvwa ijwi lyati kulindime, Saulo, Saulo, undipenzezyanzi? 8Ndakavuwa ndakati, Ino nduweni, O mwami? Wakandyaambila kuti, Ndime Jesu wa-Nazareta ngopenzya. 9Abalo mbotwakali kweenda abo bakabona mumuni, pele tabakalimvwide ijwi lyayooyo uwakali kwaamba kulindime, 10Mpoonya ndakati, O mwami, ino ndicite buti? Mwami wakandyaambila kuti, Buka, uye ku-Damasko, oko nkoti kaambilwe zyoonse nzoelede kucita. 11Pele mbwendatakali kubona nkaambo kabulemu bwamumuni, ndakatembaizigwa amaanza aabaabo mbotwakali abo, aboobo ndakasika ku-Damasko. 12Eno muntu uwali kutegwa Hananiya, mwaalumi uwakali kukomba akweenda mbuli mulao, uwakali kulemekwa ba-Juda boonse abakakede mumo, 13wakaboola kulindime wandiiminina akundyaambila kuti, Saulo mukwesu, bona. Nciconya ciindi eco ndakabona, ndamulanga. 14Walo wakateeti, Leza wamatateesu wakubika, kuti uzibe luyando lwakwe, akubona Uululeme akumvwa ijwi ilizwa kumulomo wakwe. 15Nkaambo uyooba nduwe oomulungulula kubantu boonse, azeezyo nzoobona akumvwa. 16Ino ucilindilanzi? Nyamuka, ubapatizigwe, usanzigwe zibi zyako, kukukomba kuzina lya-Mwami. 17Elyo nendakabweeda ku-Jerusalemu, nendakali kukomba muntempele ndakanyangwa muuya, 18ndakamubona Mwami ulandyaambila kuti, Kofwambaana, uzwe ndilyonya mu-Jerusalemu, nkaambo tabakootambula kusinizya kwako andime. 19Ndakati, O mwami, balizi beni kuti ndali kwaanga akuuma basyomi bako muzikombelo zyoonse, 20alimwi awo aakatikila bulowa bwakamboni wako Stefano, ndakaliimvwi amebo, ndakazumina lufu lwakwe, ndakalindila ngubo zyabakamujaya. 21Nkabela wakandyaambila kuti, Koya, nkaambo ndiyookutuma, uye kulibamasi abali kule.
Mbwaakaliyubulula kuti mu-Roma
22Eno bakali kumuswiilide mane kulileelyo ijwi, ndilyonya bakoompolola bakati, Uuli boobo azwe ansi! Takweelede kuti kacipona pe. 23Kabacoompolola akusowaila zyakusama zyabo, akutataula lusuko mujulu, 24musolozi mupati wakalailila kuti anjizigwe mukati, wakati abuzigwe akuumwa, kuti amvwe kaambo nkobamoompolweda obo. 25Nobakamubambula entambo, Paulo wakabuzya musunguli uwakaimvwi awo kuti, Sena kuliluzi kuti muume mu-Roma uutajenwe mulandu? 26Musunguli naakamvwa obo, wakainka kuyooambila musolozi mupati wakati, Ino uyandoocita buti? Nkaambo ulya muntu mu-Roma. 27Mpoonya wakaboola musolozi mupati, wakati kulinguwe, Ndyaambila, sena uli mu-Roma yebo? Wakati, Ii, 28Wakavuwa musolozi mupati kuti, Obu bwami ndakabuula amali manjimanji. Paulo wakati, Pele mebo ndakazyalwa abo. 29Nkabela abo abati kamubuzye bakamuleka, awalo musolozi mupati wakayoowa naakaziba kuti mu-Roma, alimwi nkaambo wakali kumwaangide.
Mbwaakalyaambilila kulubeta lwaba-Juda
30Eno nobwakaca, mbwaakali kuyanda kuzibisya kaambo nkobakamubika ba-Juda, wakamwaangununa, wakalailila kuti bapaizi bapati abasilubeta boonse babungane, nkabela wakamuleta Paulo, wazoomubika kumbele lyabo.
Currently Selected:
Incito 22: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.