2 Ba-Korinto 2
2
1 #
2 Kor 12:21; 1 Kor 4:21 Mumoyo wangu ndakalibeteka kuti nsikonzyi kuza kuzoomuswaya lwabili cabuusu pe. 2Nkaambo na ndamufwisya buusu, lino nguni uunoondikondezya sa? Teensi oyo nguwenya ngundafwisya buusu? 3Nkakonya nkindakamulembela, kuti kuciindi cakuza kwangu intafwisigwi buusu kulimbabo beelede kundikondezya, nkaambo ndakalilipamikizizye kuti kukondwa kwangu nkukukondwa kwanu anywebo nyoonse: 4#Inc 20:31Ndakamulembela cakupenga loko acakuciswa mumoyo amisozi minji, nkabela oku teekwakeensi kwakumufwisya buusu, pe, kwakali kwakumuzibya luyando lupati ndunjisi kulindinywe.
Oyo muntu iwakabisya uleelede kuboozegwa muluswanaano lwambungano
5 #
1 Kor 5:1
Aakuli ndaba wakafwisya buusu, teensi ndime endike ngwakausya pe, wakamuusya anywebo (nkukuti bamwi akati kanu, nkaambo nsikonzyi kuyungizizya kukwaamba nyoonse). 6Citapatizyo cabanamaleya banu cilazulila muntu oyo, 7aboobo kuciindi ecino muleelede kulekelela muntu oyo caluzyalo akumuumbulizya, kuti ataindi kulemenwa abuusu bunji. 8Ndamukumbila kuti mumuboozye muluyando lwanu. 9#2 Kor 7:15Nkaambo cintu ncindakamulembela nceeci, kuti nkazibe ziyanza zyanu mbuzibede, na mulacita zyoonse nzimulaililwa. 10#Lk 10:16Nkabela mwalekelela muntu cintu, ndamulekelela ambebo. Nkaambo mebo, na ndamulekelela cintu, nkaambo kandinywe nkindakamulekelela kumeso aa-Kristo, 11#Lk 22:31kuti tutapubbulwi kuli-Saatani, nkaambo tatuli bafubafuba batezi makanze aakwe mbwaabede.
Paulo ulaamba amwi makani aamilimo yakwe amapenzi aakwe
12 #
Inc 20:1; 14:27; 1 Kor 16:9 Lino nindakasika ku-Trowa kukukambauka Makani Mabotu aa-Kristo, ndakajalwidwa mulyango mu-Mwami, 13pele moyo wangu teewakakede kabotu nkaambo kakutajana Tito mukwesu, mpawo ndakabalaya, ndakainka ku-Makedoniya. 14Pele Leza alumbwe! Ikuti lyoonse buyo ulatweenzya buzunda muli-Kristo, nkabela bweema bwakuzibwa kwakwe ulabumwaisya koonse koonse kumaanza esu. 15#1 Kor 1:18Nkaambo kumeso aa-Leza tuli bweema bubotu bwa-Kristo akati kabantu boonse, nibaba abo bali mukufutuka nibaba abo bali mukusweeka. 16#2 Kor 3:5,6; Lk 2:34Kulibaabo tuli bweema bwakujaya buleta lufu, pele kulibaaba tuli bweema bwakuponya buleta buumi. Ino nguni uuzulila milimo eyi sa? 17#2 Kor 1:12; 1 Pet 4:11Sa teensi ndiswe? Nkaambo tatuli mbuli banjibanji babisizya makani aa-Leza, pe, tuli bantu benibeni, tuli bantu ba-Leza, tulaamba cakusinizya makani aa-Kristo mbuli kumeso aa-Leza.
Currently Selected:
2 Ba-Korinto 2: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.