Tite 3
3
Liswanelo za bulumeli
1U hupulise balumeli kuli ba swanezi ku ipeya kwatas'a bazamaisi ni babusi. Ba ba utwe, mi ba itukiseze ku eza sifi ni sifi se si lukile. 2Ba si ke ba bulela se si maswe ka mutu ufi kamba ufi, kono i be batu ba ba tabela kozo, ba ba utwana, mi ba ba na ni musa kwa batu kaufela. 3Kakuli ni luna, sapili, ne lu li likuba, lu sa utwi. Ne lu latehezwi ki nzila, lu hapilwe ki litakazo ni minyaka ya mifuta-futa. Ne lu pila ka lunya ni muna. Ne lu toile ba bañwi, mi ni bona ne ba lu toile. 4Kono Mulimu Mupilisi wa luna a bonahaza sishemo sa hae ni lilato la hae kwa batu. 5Mi a lu pilisa. I ne i si kabakala misebezi ye minde ye ne lu ezize, kono ili ka makeke a hae, u lu pilisize ka kolobezo yeo ka yona Moya o Kenile u lu fa ku pepwa sinca ni bupilo bo bunca. 6Mulimu u lu sululezi ka buñata Moya o Kenile ka Jesu Kreste Mupilisi wa luna. 7U ezize cwalo kuli ka sishemo sa hae lu be ba ba lukile ku Mulimu, mi lu kone ku fumana bupilo bo bu sa feli bo lu sepile. 8Linzwi le ki la niti.
Ni bata kuli u bulele ka ku tiya fa litaba ze, kuli ba ba lumela ku Mulimu ba utwisise swanelo ya bona ya ku eza misebezi ye minde. Ye ki kelezo ye nde ye ka ba ni tuso kwa batu. 9Kono u zwe mwa likañi za bukuba, ze amana ni mikoloko ye mitelele ya masika a bo kukw'a luna, ni likañi ni likomano ka za Mulao. Ha li na tuso, zeo. 10Ya bata ku tisa lifapahano u mu kalimele habeli, mi ku zwa fo u mu tokolomohe. 11Wa ziba kuli mutu ya cwalo u keluhile mwa nzila ye lukile ni kuli libi za hae li paka kuli wa fosa.
Likelezo za mafelelezo
12 #
Lik 20.4; Baef 6.21,22; Bakol 4.7,8; 2 Tim 4.12 Ha ni ka luma Artema kamba Tikiko ku wena, u like mo u konela kaufela ku taha ku na mwa Nikopolisi kakuli ni hupuzi ku y'o feleza maliha kwateñi. 13#Lik 18.24; 1 Bakor 16.12 U like ka tata ku akufisa Zenasi, ya itutile za milao, ni Apolosi, mwa misipili ya bona, mi u bone kuli ba na ni ze ba tokwa kaufela. 14Batu ba luna ba itute ni bona ku eza misebezi ye minde, ba kone ku tusa mo ku tokwahalela kamita. Ba si ke ba pila bupilo bo bu si na tuso.
15Be ni inzi ni bona kaufela ba ku lumelisa. U fitise litumeliso kwa banabahabo luna mwa tumelo.
Sishemo sa Mulimu si be ni mina kamukana.
Currently Selected:
Tite 3: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.