1 Timotea 5
5
Buikalabelo kwa neku la balumeli
1U si ke wa kalimela munna-muhulu, kono u mu eleze sina ndat'aho. Micaha u ba nge sina banyani ba hao. 2Basali ba bahulu u ba nge sina bo m'aho, ni likalibe sina likaizeli za hao, ili ka mukwa o kenile kaufela.
3U kuteke limbelwa bao ili limbelwa luli. 4Kono haiba mbelwa a na ni bana kamba baikulu, taba ya pili kikuli ba itute ku eza liswanelo za bulumeli bwa bona kwa neku la lubasi lwa bona, ni ku kutiseza bashemi ba bona ni bo kukw'a bona se ba zwisize ku ba hulisa. Kakuli seo ki sona se si tabisa Mulimu. 5#Judi 8.4-6 Musali ya li mbelwa luli, ya si na ya ka mu babalela, u beile sepo ya hae ku Mulimu, mi h'a liseli ku lapela, ni ku kupa tuso, busihu ni musihali. 6Kono mbelwa ya ikenya mwa minyaka u s'a shwile kale, nih'a sa pila. 7Ki sona s'o swanezi ku ba hupulisa kuli ba tokwe se ba ka nyazahala ka sona. 8Kono haiba mutu yo muñwi a sa tokomeli banabahabo, sihulu ba mba ya habo, yo u hanile tumelo, mi mane u fitwa ki ya si ka lumela.
9U si ke wa ekeza mbelwa kwa palo ya limbelwa konji ha s'a na ni lilimo ze mashumi a silezi. Fahalimw'a zeo u swanezi ku ba ya n'a nyezwi hañwi feela. 10U swanezi ku ba ya pakwa ka likezo ze nde za hae. A be musali ya hulisize hande lubasi lwa hae, ya n'a amuhela hande baenyi mwa ndu ya hae, ya n'a tapisa mahutu a balumeli, ya n'a tusa ba ba ne ba zielehile, mi ya n'a ipeile mwa mifuta kaufela ya misebezi ye minde.
11Kono, u si ke wa ekeza kwa palo ya limbelwa basali ba ba sa li ba banca, kakuli litakazo za bona ha li ka ba batisa ku nyalwa, ba ta zwa ku Kreste. 12Kacwalo ba ta ba ni mulatu ka ku sinya buitamo bwa bona bwa pili ku yena. 13Hape ba ituta buzwa ha ba pota-pota mwa mandu. Kono se si maswe hahulu ku fita se, kikuli ba ituta lusebo ni ku ikenya mwa litaba ze sa ba ami, mi ba bulela ka lika ze ba sa swaneli ku li bulela. 14Kabakaleo, ni lata kuli basali ba banca ba limbelwa ba nyalwe, ba be ni bana, mi ba tokomele mandu a bona, kuli lila za luna li palelwe ku bulela ze maswe ka luna. 15Ba bañwi, ba limbelwa, ba se ba keluhile mwa nzila ye nde ni ku latelela Satani. 16Kono haiba mulumeli wa musali a na ni limbelwa mwa lubasi lwa hae, u swanezi ku ba babalela, bakeñisa ku imeza keleke, kuli yona keleke i kone ku babalela be i li limbelwa luli ba ba siyezi ba li nosi.
17Bahulu ba ba eza hande musebezi wa bona wa buhulu, ba swanezi ku hupulwa, mane ba lukela ku ekelezwa mupuzo wa bubeli, sihulu ba ba sebeza ka tata ka ku kutaza ni ku luta. 18#Mul 25.4; Mat 10.10; Luk 10.7 Kakuli ku ñozwi kuli, “U si ke wa tama mulomo wa pulu ha i pula mabele,” ni kuli “Mubeleki u swanelwa ki mupuzo wa hae.” 19#Mul 17.6; 19.15 U si ke wa teeleza litaba ze tama muhulu wa keleke, konji ha li tiswa ki lipaki ze peli kamba ze talu. 20U kalimele patalaza ba ba eza sibi kuli ba bañwi ba sabe.
21Fapil'a Mulimu, ni fapil'a Jesu Kreste ni mangeloi a kenile, ni ku kupa ka tata kuli u mamele litaelo zeo ku si na sobozi kamba ketululo ku mutu ufi kamba ufi mwa lika z'o eza kamukana. 22U si ke wa akufela ku beya ufi kamba ufi mazoho mwa musebezi wa Mulena. U si ke wa ikenya mwa libi za ba bañwi. U ipuluke u nz'o li ya kenile.
23U si ke wa nwa mezi feela, kono u nwe ni wainenyana kuli i tuse mwa mba ya hao, ha u nze u kula-kula cwalo nako kaufela.
24Libi za ba bañwi li bonahala kapili ba si ka atulwa kale. Za ba bañwi li t'o bonahala mwamulaho feela. 25Kamukwaoswana, ni zona likezo ze nde li bonahala kapili, mane ni ze sa bonahali kapili ha li koni ku nga nako li nze li patilwe.
Currently Selected:
1 Timotea 5: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.