SAN LUCAS 23
23
Udi'di Jesús lu ná Pilatu
(Mt. 27.1-2, 11-14; Mr. 15.1-5; Jn. 18.28-38)
1Para biasa irá ca ucuaa ca laabe, yené ca laabe ra nuu Pilatu. 2Ne bizulú ca uluu ca xqueja be, na ca':
―Una'ze du hombre ri caguite ca binni xquidxi du. Cayabi be laaca cadi naquiiñe quixe ca lu ná gobiernu, ne laca na be laabe nga Cristu ni zeda tí de rey.
3Oraque na Pilatu rabi laabe:
―Ñee lii nga rey sti ca judíu la?
―Laca lii caníu' ni, na be.
4Para na Pilatu rabi ca xaíque sti ca sacerdote ne ca binni que:
―Gasti donda qué idxela luguiá hombre ri'.
5Peru jma rusi ucuá ca tema, na ca':
―Cusiidi be binni ucaa lú gobiernu. Bizulú be Galilea ne zacá uzá be idubi Judea, ne yanna ma bedandá be rarí'.
Ra zuhuaa Jesús nezalú Herodes
6Ora bina diaga Pilatu xi na cabe, unaba diidxa pa binni Galilea laabe. 7Ne ora gudxi cabe laa binni Galilea laabe la? biseenda laabe ra nuu Herodes, purti laa naca gobernador de Galilea, ne bia'si pe nuu Jerusalén ca dxi que. 8Ma xadxí napa Herodes gana gu'ya laabe purti nabé huayuna diaga de laabe ne cabeza gu'ya guni be ti milagru. Ngue runi nabé bieche ora bi'ya laabe. 9Ne birá ni unaba diidxa laabe, peru nin ti diidxa qué nicabi be laa. 10Nuu ca xaíque sti ca sacerdote ne ca maistru de ley raqué. Cadi cayaana dxí ca de caguu ca xqueja be. 11Ne óraque bizulú Herodes ne ca soldadu sti' udxite ca laabe, ne para guni burla ca laabe bigacu ca laabe ti lari sicarú ni racu rey, ne bidxigueta laabe ra nuu Pilatu. 12Dxi que ru uyuu Herodes ne Pilatu tobi si, purti nanala'dxi saa ca'.
Gu'ta gati Jesús
(Mt. 27.15-26; Mr. 15.6-15; Jn. 18.39-19.16)
13Oraque guridxi Pilatu ca xaíque sti ca sacerdote ne ca xaíque sti guidxi que ne ca binni guidxi que, 14ne na rabi laaca':
―Bedané tu hombre ri ra nuaa purti na tu canaguite be binni, peru ma gunaba diidxa laabe nezalú tu ne qué nidxela gasti donda luguiá be de ni na tu cayuni be ca. 15Nin Herodes qué nidxela gasti luguiá be, nga runi ma bidxigueta laabe ra nuu nu. Qué huayuni be gasti para gati be. 16Chi usaba naya laabe ne undaa laabe.
17Irá iza saa pascua napa Pilatu xidé undaa ti presu. 18Peru irá binni que bizulú ca bicaa ca ridxi:
―Biiti laabe ne bindaa Barrabás.
19Ne Barrabás nda yeguyoo purti udxite ique binni ucaa lú gobiernu ne laca purti biiti binni. 20Bigueta uní' Pilatu racala'dxi undaa Jesús. 21Peru jma rusi reciu bicaa ca binni que ridxi:
―¡Bicaa laabe lu cruz! ¡Bicaa laabe lu cruz!
22Bigueta na Pilatu raguionna tiru:
―Xi huayuni be ni cadi jneza, purti qué idxela dia' xi bi'ni be para gati be. Zusaba naya sia' laabe ne zundaa laabe.
23Qué ñaana dxí ca binni que, sínuque jma rusi reciu bicaa ca ridxi icá be lu cruz. Raqué nuu ca cucaa ca ridxi, laaca ne ca xaíque sti ca sacerdote, dede bicuudxi ca Pilatu. 24Para na Pilatu zaa gaca ni na cabe. 25Ne óraque bindaa ni unaba cabe que, ne bisaana Jesús lu ná cabe. Barrabás nda yeguyoo purti bicaa lú gobiernu ne biiti binni.
Ucuá Jesús lu cruz
(Mt. 27.32-44; Mr. 15.21-32; Jn. 19.17-27)
26Biree né cabe Jesús, ziné cabe laa. Ne ra ze cabe que, bidxaaga cabe ti hombre de Cirene lá Simón, casi zeeda de gui'xhi'. Para biguá' cabe laa cruz que ne zinanda né ni laabe.
27Laca zinanda stale binni laabe, ne ze stale gunaa ziucaa ca ridxi ziyuuna né ca laabe. 28Peru bitiixhi lú be biiya dxí be laaca ne rabi be laaca':
―Gunaa de Jerusalén ca', cadi gu'na tu pur naa, sínuque laguuna pur laca laatu ne pur xiiñi tu. 29Purti zadxiña dxi na cabe: “Dichosa cani qué ñanda ñapa ba'du', cani qué nixana, ne cani qué nugadxi.” 30Ne ca dxi que zaní' binni, pa ñanda si ñaba dani ro' ne dani huiini luguiá ca' para nuchii laaca'. 31Purti pa dede naa cayuni cabe sicarí la? xi aca xa de laatu ya'.
32Ra ziné cabe laabe que laca ziné cabe chupa gubaana gati né laabe. 33Ne casi yendá cabe ti lugar ni rabi cabe Calavera la? raqué bicaa cabe laabe lu cruz, ne bicaa cabe ca gubaana que, tobi ladu derechu ne stobi ladu biga'. 34Oraque na be:
―Bixhoze', bini perdonar laacabe, purti qué ganna cabe xi cayuni cabe.
Ne uluu ca soldadu que xhaba be lu rifa, ne cada tobi ucuaa ni gulee. 35Zuhuaa stale binni, cayuuya'. Ne ca xaíque stica cayuni burla laabe, na ca':
―Hualá be stobi, yanna ulá be laca laabe pa huandí laabe nga Cristu ni ulí Dios.
36Laca bini asariar ca soldadu que laabe, bidxiña né ca vinagre, bidii ca laabe, 37ne na ca':
―Pa huandí rey sti ca judíu lii la? bilá laca lii.
38Cá caadxi diidxa xaíque be, cá ni diidxa griegu, latín, ne hebreu, na ni: “Ndi nga rey sti ca judíu.”
39Ne bizulú tobi de ca gubaana cá lu cruz que bini burla laabe:
―Pa huandí Cristu lii la? bilá lii ne bilá laadu.
40Para gudinde né stobi que laa, na rabi laa:
―Ñee qué ridxi'bu Dios la? nin ne nuu né nu laabe lu enda guti ri'. 41Para laanu la? jneza gudixhe cabe ni, purti rarí nga caguixe nu saca irá ni bini nu, peru laabe la? qué huayuni be gasti ni cadi jneza.
42Ne na rabi laabe:
―Jesús, bietenala'dxi naa ora gueda guni mandar lu'.
43Para na be:
―Yanadxí ca ziuu neu naa ra nuu enda nayeche sti Dios.
Ra guti Jesús
(Mt. 27.45-56; Mr. 15.33-41; Jn. 19.28-30)
44Ne bia' galaa dxi bicahui idubi guidxilayú ne zaqué biaana ni dede bia' las tres. 45Bicahui lú gubidxa ne ureza cortina nanda ndaani yu'du ro', galaa, galaa. 46Oraque bicaa be ridxi:
―Bixhoze' ucuaa espíritu stinne'.
Ngue si uní' be, guti be.
47Ora bi'ya capitán sti ca soldadu que irá ni cayaca, bisisaca Dios, na:
―Dxandí nayá ladxidó' hombre ri'.
48Ne irá binni ni yeguuya ni uca que bigueta ca ralidxi ca', ziguibi ná ca ladxidó' ca'. 49Peru irá cani runibiá' laabe ne ca gunaa ni yenanda laabe dede Galilea zuhuaa ca zitu, cayuuya ca ni cayaca que.
Ra bigaachi Jesús
(Mt. 27.57-61; Mr. 15.42-47; Jn. 19.38-42)
50Lade ca justicia sti ca judíu zeeda tobi hombre lá José, binni Arimatea de Judea. Nabé nacha'hui be ne runi be jneza. 51Ne laca cabeza be idxiña dxi guni mandar Dios, ne qué ñuu né be ca xcaadxi justicia ra gudixhe ca xi aca Jesús ne ra bi'ni ca ni. 52Uyé be ra nuu Pilatu, yenaba be laa cuerpu sti Jesús. 53Yendete be ni lu cruz ne bichenda be ni ti lari gueela ne bicaachi be ni ndaani ti ba' ni udaañe cabe cue' ti guie, ra iruti huagaachi'. 54Uca ni viernes bia' ziyaazi gubidxa, ma para uzulú dxi enda riziila'dxi'.
55Laca uyé ca gunaa ni beda nanda Jesús dede Galilea que, ne biiya ca modo guta cuerpu sti Jesús. 56Ne ora bigueta ca udixhe chaahui ca guixi rindá' naxhi ne nisa rindá' naxhi. Ne biziila'dxi cabe casi cá lu ley guni binni dxi que.
Currently Selected:
SAN LUCAS 23: zai
Highlight
Share
Copy
Want to have your highlights saved across all your devices? Sign up or sign in
© 1988, Wycliffe Bible Translators, Inc. All rights reserved.