2 TIMOTEO 4
4
1Kjua̱cha̱xién Dios la ko Ìnchéni Jesucristo, tí nkexro itsi éxí ijnko rey la sinchekito̱exín iji̱é kaín chojni tjejóchón la ko tí chojni tsíkꞌen, 2mé tétua̱nhan chrókjuàkua itén Dios kaín a̱sán kjónté á chrókuinhin sín o̱ náhí. Nixje̱hé sín jnkojína kíxin tsitekaon sín la ko tjéntuéhé sín jnkojína. Chrókóninkákonhya chrókjuákohé sín. 3Itsi ijnko ya̱on ntá tsotjinkakonhya sín tsinhin sín tí nkehe jína. A̱ ntá sinchexiteyéhe̱ sín tí nkehe ntáchro a̱sén sín ó. Tsjeyá sín nchónhya maestro tsja̱ko̱he̱ sín jehó tí nkehe tóxrjínhi̱n sín chrókuinhin sín. 4Méxra̱ tsíto̱he sín tí nkehe chaxín ntoá la ntá itsa sín kuènté kaín nkehe chaxínhya. 5Méxra̱ jaha jína chrókjuenka̱yáxian la chrókjuacha kjónté tsjasótia. Chrókjuintaxín chrókjui̱chꞌe xra̱ chrókjuákohé chojni itén Dios tsaáxinni mé xi̱kaha si̱nchexiteyá jína tí xra̱ chonta.
6Ntá janhan ó kjuixraká tí hora tsjasótena la ko ó kjuixraká tí hora itsꞌèn. 7Ó kjuánjo̱nkian jína kaín tí nkehe jínahya la ko ó kjuixinna tí xra̱ kuènta̱na la ko kui̱to̱a̱hya jína kuinkachónkia Ìnchéni. 8A̱ ntá ijie la tí nkehe tsi̱to̱nna mé tjechónhen kíxin jína kjuakꞌé ntihi. Tíha mé tsjanjon Ìnchéni tí ya̱on itsi chꞌán. Jehe chꞌán mé ijnko juez jína. Jehya kíxin janhván tsákjaá tí nkehe tsjanjon chꞌán. Náhí, kja̱xin kaín tí nkexro kuítekaon sin chꞌán la ko chéhe̱ sín tjejóchónhen sín tió tsi chꞌán.
Chꞌín Pablo kꞌue̱to̱an tsjijitsjehe sín chꞌán
9Jaha chrókóxakonhan tjoka chrókꞌuinkatsjehé tí janhan 10kíxin chꞌín Demas la kuíto̱he chꞌán tí janhan kíxin imá kóxrjínhi̱n chꞌán tí nkehe kuènte chjasintajni. Sátsíkji chꞌán chjasin Tesalónica. Chꞌín Crescente mé sátsíkji chꞌán chjasin Galacia a̱ ntá chꞌin Tito sátsíkji chꞌán chjasin Dalmacia. 11Jehó chꞌín Lucas na̱xa̱ tjéki̱an chꞌán. Tjíkjéyá chꞌín Marcos la tsjíkuana chꞌán ntihi kíxin jehe chꞌán mé jína tsjinki̱tsa chꞌán tí xra̱ chonta ntihi. 12A̱ ntá chꞌín Tíquico mé kuétua̱nha̱n chꞌán sátsji chꞌán chjasin Éfeso. 13Tió tsꞌinka tsꞌinkakuana tí ka tꞌítsa̱te kuíto̱ha̱ chjasin Troas nto̱é chꞌín Carpo la ko kja̱xin tsꞌinkakuana tí libro kuènta̱na la ko koí tí tjo̱é iko tsíkꞌóna xroon.
14Tí chꞌín Alejandro tí chꞌín chꞌe xra̱ chica mé nchónhya nkehe jínahya kjuíchꞌena chꞌán. Kjánchó Ìnchéni mé tsje̱nke̱he chꞌán kaín nkehe kjuíchꞌe chꞌán. 15Jaha mé tóxakonhan kíxin tí jehe chꞌán kíxin imá nínkakonhen chꞌán tí nkehe tjakoni.
16A̱ ntá tí sa̱oxín kꞌuèya tí síxre̱e tí kjuia tí tjejó sín la ninkexró kjuinki̱tsahyana. Kaín sín me kuíto̱na sín janhván. Kjónté xi̱kaha la tjáncháha̱ Dios kíxin chrókuahya chꞌán kuèntá kíxin xi̱kaha kjuíchꞌe sín. 17Kjánchó Ìnchéni mé chaxín kjuínki̱tsana chꞌán la kjuanjon chꞌán kjuachaxin kíxin tsjachana na̱xa̱ jína tsjàkua itén chꞌán. Ntá kuínhin kaín tí sín jehya judío. A̱ ntá Ìnchéni kjuínki̱tsana kíxin kjónehyana koxra̱. 18Ìnchéni mé tsjinki̱tsana kíxin na̱xa̱ tso̱nnahya kaín nkehe jínahya. Jehe chꞌán mé tsꞌayakonna chꞌán tsꞌixa̱nha̱n tí tjetꞌe̱to̱an chꞌán nkaya nka̱jní. Kjuasáyé chꞌán kíxin xi̱kaha jnkochríxín tsoxiteyá. Amén.
Chꞌín Pablo kjuixixín nixja chꞌán
19Jaha nixje̱hé tí tjan Prisca la ko chꞌín Aquila la ko nixje̱hé tí sín siín nto̱e chꞌín Onesíforo. 20Kuíto̱he chꞌín Erasto chjasin Corinto. A̱ ntá chꞌín Trófimo kuíto̱he chjasin Mileto kíxin kóníhi chꞌán. 21Tóxakonhan chrókꞌuinka na̱xa̱ tꞌixenhya ncha̱kuen kin. Tí chꞌín Eubulo la ko chꞌín Pudente la ko chꞌín Lino la ko tjan Claudia la ko kaín sín kíchó ni ntihi nixja̱ha sín jnkojína.
22Ìnchéni Jesucristo chrókꞌuajikoa chꞌan la Dios chrókjuintayaonrá kaín rá mé xi̱kaha tsoxiteyá. Amén. Ó tjen.
Currently Selected:
2 TIMOTEO 4: poeNT
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc.
Learn more about Tí Nuevo Testamento cuènte Inchéni Jesucristo Cʼóna Nquìva