EFESIOS 5
5
None glu cho nac zha ne ngab lo Dios
1To ne laa to nacle xpëëd Dios ni nquialadz me to, goḻtsoxco gac to zig me. 2Zaacse goḻban, goḻleynie samiech to zigne rleynie Jesús to, sac goṉ teḻ me, haxta bleeladz me me gut me xcuent ne, gut me biogon me lo Dios psaṉmbe me ne lo xtoḻ ne, me goc tib gon ne pcaania Dios.
3Goḻguieṉ sca, none glu to ne nli xnëz Dios no to;
guṉde to grë guieḻyozh ne ruṉ grë zha ne zienaḻd zigne nacpaa guieḻtsieel,
guṉde to grë ncuaaṉe yozh ne ruṉ miech ndzinlid,
guṉde to grë ncuaaṉe ruṉ grë zha ne zienaḻ loxaque dieṉ zha guṉlo dimi.
Guṉde to grë ncuaaṉ co, per ni gzodiidzde tow.
4Gneede to grë diidzguidz,
gneede to grë diidz ne paat rquiind,
gneede to grë diidz ro nëz;
sac goṉ rdzieeldraa gnee to grë ncuaaṉ co; sinque Dios goḻgooḻnie, goḻdeed xquizh lo me.
5Naṉle to gaṉle, grëse:
zha ne zienaḻdraa zigne nac guieḻtsieel,
zha ndzinlid ne ruṉ grëraa guieḻyozh,
zha ne mbidz (zha ne rleynieraa dimi, laa ne gleynie zho Dios);
ni tib zho grieelod gdziṉ zaatne rnabey Jesús grop me Dios.
6Gdeete to diidz lo zha ne gacladz yquidie to gnë zho peet nacd grë miṉ co, sac goṉ, grëcxe miṉ co waa ruṉ grë zha ne nëd gon xtiidz Dios, lozh ga, lëë miṉe tsieguiaḻ zho laa zho ygaa lo guieḻzi ne csiaab me. 7Goḻguieṉ sca, yquiaadiagde to xtiidz grë zha ne sca rnee, per ni ctsieelsade to zho.
8Nli, ¿lëë?, ndzinlid wban to glo, rrieequia lo ncow ga bio to, gocnie to meṉdox; saṉgue niina ne laa to nacnie Jesús meṉ ne nac biini, rrieequia lo biinile no to. Goḻguieṉa sca, zaacse goḻban, 9sac niina ne laa to nole lo biini, none gac to:
tib miech wen,
tib miech ne zienaḻ gac miṉe nac diidzli,
tib miech ne rnee diidzli.
10Goḻtsoxco guieṉ to zha racladz Dios gban to. 11Gaṉdzede to grë ncuaaṉe ndzinlid ne ruṉ grë zha ne no lo ncow, sinque goḻlisquiw; 12sac grë ncuaaṉe ruṉ zho ngueets zhliaan, haxta ncuaaṉe ctoladz ne gnee new. 13Grëse zha ne gbig lo biini co, zieṉ zho gaṉle zha nactaa grë ncuaaṉe yozh ne noyuṉ zho; sac goṉ teḻne biiniw, tsod ncuaaṉe guiaṉngueets low. 14No tib zaatne znu zhobnee lo Xtiidz Dios, rneew:
Luu ne tibaque guieel no luu, blee mcaaḻ lo luu;
briee lad grë zha ne squi nole ladznia guieḻgut,
zeeṉa gban luu lo biini ne nac Jesús.
15Goḻguieṉ sca:
Miech nixbiini goḻgac, ndzinli goḻban; gbande to zig choḻ cho grë miech nxen ne ruṉ miṉe notaa guic.
16Cteed zhlëde to xtse to lo ncuaaṉe paat rquiind, niicle ne niapse grë miṉ co zienaḻ grëraa miech leṉ dze rii.
17Guṉde to ncuaaṉe paat rquiind ne rza guic to, sinque goḻguieṉ dieṉ pa miṉpaa racladz Dios guṉ to, dzigo goḻtsoxco miṉ co goḻguṉ.
18Gzudzde to, sac goṉ lo guieḻgonziu ruṉ miech ncuaaṉe nonguieḻdraa; sinque mazd goḻnab gneedzraa Espíritu Sant guieḻbiini lo to, zeeṉa iṉe:
19gooḻ to grë salm, grë himno, grë cant ne csiaab Espíritu Sant guic to; dib zdoo to goḻgooḻnie meṉ ndzon ne rnabey.
20Goḻdeed xquizh lo Dios meṉ ne nac Pxoz ne, por grëtaa ncuaaṉe raṉ to, ncuaaṉe rded to; goḻguieṉ gaṉle lo Jesús ngab to.
Zha none gban zha ne rliladz Jesús
21To ne nac to zha ne ngable lo Jesús, tib tib to goḻgon miṉe rnee zha ne nacgrë to, zeeṉa glu gaṉle me nac meṉ non lo to.
22To ne nac to meṉ wnaa ne ptsieelniale, goḻgon xtiidz tsieel to, zigne rioxcoque to ron to miṉe nac xtiidz meṉ ndzon ne rnabey. 23Sac ible tsieel to nac meṉ ne no gnabey lo to, zigne Jesús rnabey lo grë zha ne no xnëz me (ni me psilaa zho lo doḻ, laa zho nac zig xcuerp me). 24Ni zigne sca ron zho xtiidz me, scaque none gon to miṉe rnabey tsieel to to.
25Togaa ne nac to zha bgui ne ptsieelniale, goḻleynie tsieel to, zigne rleynie Jesús zha ne no xnëz me. Teḻ me haxta bleeladz me xquieḻmban me, 26blee me zho lo doḻ, ni biaaṉmbe zho zeeṉe laa zho pquiaadiag xtiidz me, wban zhow ni brobnis zho; 27zeeṉa gaḻ dze ne laa me ycaania zho, laa zho nacle miech ne rieguiaḻ gdziṉ lo guieḻndzon ne no me, ni tib doḻ rapdraa zho, miech mbele nac zho, zig tib lë lar nquitsbie ne ni tib pxud neyd. 28Sca nagoṉ none guṉ mgui, none gaṉtsi zho tsieel zho zigne raṉtsi zho xcuerp zho. Mgui ne raṉtsi tsieel, rrieequia xcuerp zho ga raṉtsi zho; 29sac goṉ, tsod tib zha ne lëëque zha csacsi xcuerp zho, sinque raṉ zhow. Ni scadaa nagoṉ rzac Jesús grëse miech ne ngab lo me, 30sac nac zho zig xcuerp me. Ni lëë tib lë cuerp co nu nac ne.
31Zha ne pcatsieel-le, ible tibaque cuerp nac zho grop zho, laaw zhobneeque lo Xtiidz Dios zaatne rnee: “Ib none grieezhaa mgui lo pxoz zho, lo xniaa zho, zeeṉa gbannie zho tsieel zho gac zho zig tibaque miech grop zho.” 32Rgobey naa ngaṉ tsoguic to zha nacne chop miech gac tibaque cuerp; per ga goṉ rlu ne niicle nzian ne per tibaque cuerp nac ne, ni lëë xcuerp Jesús ga. 33Miṉe racladzpaa naa csoladz to nu: to ne nac to meṉ bgui, none gleynie to tsieel to zigne rleynieque to xcuerp to; ni niicle togaa ne nac to meṉ wnaa, none gon to xtiidz tsieel to, cueede to xquieḻto zho.
Currently Selected:
EFESIOS 5: zpm
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.