San Lucas 3
3
Lban runëꞌ Juan, bönniꞌ ruquilëꞌ bunách nis
1Catiꞌ chguc chinu iz rna beꞌinë́ꞌ gdutë yödzlyú Tiberio César, atiꞌ rna bëꞌë Poncio Pilato luyú Judea, atiꞌ Herodes rna bëꞌë caꞌ luyú Galilea, atiꞌ Felipe, böchëꞌë Herodes naꞌ, rna bëꞌë luyú Iturea len luyú Traconite, atiꞌ Lisanias rna bëꞌë luyú Abilinia, 2yuguꞌ dza naꞌ nacquëꞌ bxuz blau Anás len Caifás, atiꞌ laꞌ naꞌz Dios bë́ꞌlenëꞌ Juan, zxiꞌnëꞌ Zacarías, didzaꞌ catiꞌ niꞌ zoëꞌ Juan lu latj caꞌz. 3Rdëꞌ Juan ni yúguꞌtë latj nacuáꞌ raꞌ yegu Jordán, runëꞌ lban ca ral‑laꞌ laꞌdíl nis nup tuꞌbíꞌi ládxiꞌgac quië unít lahuëꞌ Dios dul‑laꞌ nabágaꞌquëꞌ. 4Guc cni ca naꞌ nayúj lu guich laꞌy yuguꞌ didzaꞌ bëꞌë Isaías, bönniꞌ bëꞌë didzaꞌ uláz queëꞌ Dios, rna:
Ryön chiꞌë bönniꞌ rulidzëꞌ lu latj caꞌz, rnëꞌ:
“Gul‑páꞌ nöz gdxin queëliꞌ Xanruꞌ.
Gul‑bíj li yuguꞌ nöz las tödëꞌ.
5Gdzë́ꞌigac yúguꞌtë gap nac rögaꞌ.
Luhuöác lachiꞌ yúguꞌtë guiꞌa sib len guíꞌadauꞌ.
Lurúj li nöz nayéycj narö́ligac,
Atiꞌ luhuöác dxiꞌa nöz guiöj.
6Laꞌleꞌi yúguꞌtë bunách Nu naꞌ gsölëꞌë Dios, Nu uslá bunách.”
7Catiꞌ gularúj bunách zian quië laꞌdíl nis lu nëꞌë Juan, lëꞌ gudxëꞌ lequëꞌ:
―Lbiꞌiliꞌ, diꞌa dza quecbaꞌ bël sniaꞌ. ¿Nuzxa buluíꞌi lbiꞌiliꞌ gzxundjliꞌ yöl‑laꞌ rusyúdx ziꞌa gac quegac bunách? 8Naꞌa, gul‑gún le lac bëꞌ chbubíꞌi ládxiꞌliꞌ len cutu saꞌ ládxiꞌliꞌ, cugnaliꞌ: “Nactuꞌ tsahuiꞌ le nactuꞌ zxiꞌn xsoëꞌ Abraham”, le rëpaꞌ lbiꞌiliꞌ, huac quel‑lëꞌë Dios yuguꞌ guiöj ni len gunëꞌ ga luhuöác zxiꞌn xsoëꞌ Abraham. 9Nacliꞌ ca yuguꞌ yag. Chzoa rböz guia huag gchugu yuguꞌ yag. Yúguꞌtë yag cutaꞌbía le nac dxiꞌa, laꞌchuguëꞌ yag naꞌ len laꞌguꞌë leygac lu guiꞌ.
10Niꞌr gulanabi lëꞌ bunách nacuáꞌ niꞌ, taꞌná:
―¿Nacx gúntsatuꞌ?
11Bubiꞌë didzaꞌ Juan, rëꞌ lequëꞌ:
―Nu dë chop zxey ral‑laꞌ unö́dzj qui nu cudë́ qui, atiꞌ nu dë le gagu, lëzcaꞌ cni ral‑laꞌ quis quegac nup cudë́ le lagu.
12Guladxinëꞌ caꞌ niꞌ quië laꞌdilëꞌ nis laꞌquëꞌ bönniꞌ tuꞌquizxjëꞌ lazgac bunách uláz qui yödz ziꞌtuꞌ, atiꞌ gulanabnëꞌ lëꞌ, taꞌnë́ꞌ:
―Bönniꞌ usëdi, ¿nacx gúntsatuꞌ netuꞌ?
13Juan gudxëꞌ lequëꞌ:
―Cutu uquizxjrliꞌ tsca le chgna béꞌinëꞌ lbiꞌiliꞌ bönniꞌ uná bëꞌ.
14Gulanabnëꞌ caꞌ lëꞌ laꞌquëꞌ bönniꞌ rjaquëꞌ gdil‑l, taꞌnë́ꞌ:
―¿Nazx netuꞌ, nacx guntuꞌ?
Juan gudxëꞌ lequëꞌ:
―Cutur gun gádxiliꞌ nitú bunách quië cúaliꞌ le dë qui. Cutur gnëliꞌ quegac bunách le cunácz quië gunliꞌ ga laꞌguízxj lbiꞌiliꞌ, san gul‑dzág ládxiꞌliꞌ tsca razxjliꞌ.
15Taꞌzáꞌ ládxiꞌgac bunách naꞌ taꞌbö́z Nu naꞌ ral‑laꞌ gsölëꞌë Dios, chquiꞌ naquëꞌ Juan naꞌ bönniꞌ lëꞌ Cristo. 16Bubiꞌë didzaꞌ Juan, gudxëꞌ yúguꞌtëꞌ, rnëꞌ:
―Le nactë nedaꞌ ruquilaꞌ lbiꞌiliꞌ nis, san zëꞌë bönniꞌ gunëꞌ le ruluíꞌz yöl‑laꞌ rdil nis ni, gchiziëꞌ lbiꞌiliꞌ Dios Böꞌ Laꞌy len le nac guiꞌ queëꞌ. Bönniꞌ ni naprëꞌ yöl‑laꞌ uná bëꞌ ca nedaꞌ, atiꞌ nedaꞌ cutu nacaꞌ lsacaꞌ gleycjaꞌ lölëꞌ nudë́ꞌë. 17Zönëꞌ lu nëꞌë bcöꞌ queëꞌ atiꞌ ulubëꞌ ga rlub zxoaꞌ xtil queëꞌ, lë ni ruluíꞌ le gac quegac bunách. Utubëꞌ zxoaꞌ xtil, len cuꞌë lei xlatji, san bëb qui uzéguiꞌë lu guiꞌ le gatga ul.
18Ca nacgac didzaꞌ ni len yelaꞌgac zian didzaꞌ le bchiziëꞌ icj naggac bunách, benëꞌ lban Juan lauquëꞌ qui didzaꞌ dxiꞌa. 19Juan naꞌ buquíëꞌ Herodes, bönniꞌ rna bëꞌë, le zóalenëꞌ‑nu Herodías, ngul queëꞌ Felipe, bönniꞌ böchëꞌë, lencaꞌ le runëꞌ zian le cunác. 20Niꞌr benëꞌ Herodes tu le nacr huiaꞌdöꞌ, gluꞌë lidx guia Juan naꞌ.
Rdilëꞌ nis Jesús
21Dza naꞌ ziꞌa gdzunëꞌ lidx guia Juan, catiꞌ niꞌ ruquilëꞌ bunách nis, bdilëꞌ caꞌ nis Jesús. Catiꞌ niꞌ rulidzëꞌ Dios, gyalj luzxbá 22atiꞌ bötjëꞌ Dios Böꞌ Laꞌy, bdxinëꞌ ga naꞌ zoëꞌ Jesús. Buluíꞌ lahuëꞌ, rnëꞌë ca tubaꞌ budödauꞌ, atiꞌ byön chiꞌi Nu ruiꞌ didzaꞌ yehuaꞌ yubá, rna:
―Liꞌ nacuꞌ Zxiꞌnaꞌ. Nadxiꞌidaꞌ Liꞌ len rdzag ladxaꞌa Liꞌ.
Yuguꞌ xuz xnaꞌ gul queëꞌ Jesús
23Catiꞌ gzu lahuëꞌ runëꞌ xchinëꞌ Jesús, yuꞌë ca chi uruáꞌ iz. Taqui bunách naquëꞌ zxiꞌnëꞌ José. Jesús naquëꞌ zxiꞌn xsoëꞌ Elí,
nu naꞌ naquëꞌ xuznu María.
24Elí naꞌ guquëꞌ zxiꞌnëꞌ Matat,
nu ni guc zxiꞌnëꞌ Leví,
nu ni guc zxiꞌnëꞌ Melqui,
nu ni guc zxiꞌnëꞌ Jana,
nu ni guc zxiꞌnëꞌ yetúëꞌ José.
25José ni guquëꞌ zxiꞌnëꞌ Matatías,
nu ni guc zxiꞌnëꞌ Amós,
nu ni guc zxiꞌnëꞌ Nahum,
nu ni guc zxiꞌnëꞌ Esli,
nu ni guc zxiꞌnëꞌ Nagai.
26Nagai naꞌ guquëꞌ zxiꞌnëꞌ Maat,
nu ni guc zxiꞌnëꞌ yetúëꞌ Matatías,
nu ni guc zxiꞌnëꞌ Semei,
nu ni guc zxiꞌnëꞌ yetúëꞌ José,
nu ni guc zxiꞌnëꞌ Judá.
27Judá naꞌ guquëꞌ zxiꞌnëꞌ Joana,
nu ni guc zxiꞌnëꞌ Resa,
nu ni guc zxiꞌnëꞌ Zorobabel,
nu ni guc zxiꞌnëꞌ Salatiel,
nu ni guc zxiꞌnëꞌ Neri.
28Neri naꞌ guquëꞌ zxiꞌnëꞌ yetúëꞌ Melqui,
nu ni guc zxiꞌnëꞌ Adi,
nu ni guc zxiꞌnëꞌ Cosam,
nu ni guc zxiꞌnëꞌ Elmodam,
nu ni guc zxiꞌnëꞌ Er.
29Er naꞌ guquëꞌ zxiꞌnëꞌ Josué,
nu ni guc zxiꞌnëꞌ Eliezer,
nu ni guc zxiꞌnëꞌ Jorim,
nu ni guc zxiꞌnëꞌ yetúëꞌ Matat.
30Matat naꞌ guquëꞌ zxiꞌnëꞌ Leví,
nu ni guc zxiꞌnëꞌ Simeón,
nu ni guc zxiꞌnëꞌ Judá,
nu ni guc zxiꞌnëꞌ yetúëꞌ José,
nu ni guc zxiꞌnëꞌ Jonán,
nu ni guc zxiꞌnëꞌ Eliaquim.
31Eliaquim naꞌ guquëꞌ zxiꞌnëꞌ Melea,
nu ni guc zxiꞌnëꞌ Mainán,
nu ni guc zxiꞌnëꞌ Matata,
nu ni guc zxiꞌnëꞌ Natán.
32Natán naꞌ guquëꞌ zxiꞌnëꞌ David,
nu ni guc zxiꞌnëꞌ Isaí,
nu ni guc zxiꞌnëꞌ Obed,
nu ni guc zxiꞌnëꞌ Booz,
nu ni guc zxiꞌnëꞌ Salmón,
nu ni guc zxiꞌnëꞌ Naasón.
33Naasón naꞌ guquëꞌ zxiꞌnëꞌ Aminadab,
nu ni guc zxiꞌnëꞌ Aram,
nu ni guc zxiꞌnëꞌ Esrom,
nu ni guc zxiꞌnëꞌ Fares,
nu ni guc zxiꞌnëꞌ yetúëꞌ Judá.
34Judá naꞌ guquëꞌ zxiꞌnëꞌ Jacob,
nu ni guc zxiꞌnëꞌ Isaac,
nu ni guc zxiꞌnëꞌ Abraham,
nu ni guc zxiꞌnëꞌ Taré,
nu ni guc zxiꞌnëꞌ Nacor.
35Nacor naꞌ guquëꞌ zxiꞌnëꞌ Serug,
nu ni guc zxiꞌnëꞌ Ragau,
nu ni guc zxiꞌnëꞌ Peleg,
nu ni guc zxiꞌnëꞌ Heber,
nu ni guc zxiꞌnëꞌ Sala.
36Sala naꞌ guquëꞌ zxiꞌnëꞌ Cainán,
nu ni guc zxiꞌnëꞌ Arfaxad,
nu ni guc zxiꞌnëꞌ Sem,
nu ni guc zxiꞌnëꞌ Noé,
nu ni guc zxiꞌnëꞌ Lamec.
37Lamec naꞌ guquëꞌ zxiꞌnëꞌ Matusalén,
nu ni guc zxiꞌnëꞌ Enoc,
nu ni guc zxiꞌnëꞌ Jared,
nu ni guc zxiꞌnëꞌ Mahalaleel,
nu ni guc zxiꞌnëꞌ yetúëꞌ Cainán.
38Cainán naꞌ guquëꞌ zxiꞌnëꞌ Enós,
nu ni guc zxiꞌnëꞌ Set,
nu ni guc zxiꞌnëꞌ Adán,
nu ni guc ca zxiꞌnczëꞌ Dios.
Currently Selected:
San Lucas 3: zsr
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.