Hechos 3
3
Purita mana puëdiq nunata kachakätsiyanqan
1Juk junaqmi las tres këkaptin Teyta Diosta mañakuyänanpaq Pedruwan Juan templuman ëwayarqan. 2Templu punkuchömi tëkarqan yurishqanpita patsa mana puriq nuna. Tsë nunatam waran waran apayaq Kuyëllapaq niyashqan punkuman. Tsëchömi templupa patiunman yëkuqkunata limushnata mañakuq. 3Pedruwan Juan yëkïkäyaqta rikarmi pëkunatapis limushnata mañakurqan. 4Mañakuptinmi tsë nunata alli rikëkur Pedro kënö nirqan: <<¡Rikäyämë!>>
5Tsëmi pëkunata kushishqa rikararqan imallawanpis yanapayänanpaq kashqanta yarpar. 6Pedrunam nirqan: <<Manam qellënï ni qorï kantsu. Tsënö kaptinpis yanapashqëkim. ¡Nazaretpita Jesucristupa shutinchö juklla sharkur puri!>>
7Tsënö nirmi Pedro allawka kaq makinpita tsarirkur sharkatsiptin tsë höra chaki moqunkuna kachakärirqan. 8Tsëmi juklla sharkur purir qallëkurqan. Tsëpitam pintir saltar Teyta Diosta alabar pëkunawan templupa patiunman yëkurqan. 9Teyta Diosta alabar purikaqta rikarmi llapan nunakuna 10espantakur niyarqan: <<¡Pëqa Kuyëllapaq niyashqan punkuchö limushna mañakuq nunam këkan!>>
11Tsë kachakaq nunaqa Pedruta y Juanta manam jaqirqantsu. Salomónpa Alarnin niyashqanchö pëkuna këkäyashqanta musyarirmi nunakuna espantakur tsëman raslla rikaq ëwayarqan.
Pedro willakunqan
12Chäriyaptinnam Pedro kënö nirqan: <<Israel nunakuna, ¿imanirtaq noqakunata rikapëkäyämanki? ¿Imanirtaq yarpäyanki kikïkuna poderyuq kar o Teyta Dios munashqannö kawaq kar kë nunata kachakätsiyashqäta?
13<<Abrahampa, Isaacpa, Jacobpa y unë castantsikkunapa Diosninmi#Éxo. 3.15. sirwiqnin Jesústa churashqa llapanpitapis mas mandakuq kananpaq.#Isa. 52.13; Fil. 2.7-9. Tsënö këkaptinmi qamkunaqa wanutsiyänanpaq autoridäkunaman entreguëkuyarqunki. Pilato kacharita munaptinpis manam munayarqunkitsu. 14Jutsannaq santu nunata kacharinanpaq mañakuyänëkipa rantinmi nuna wanutsiqta kacharinanpaq mañakuyarqunki.#Mat. 27.15-23; Mar. 15.6-14; Luc. 23.13-23. 15Tsënöpam wiñë kawëta qomaqnintsikta wanutsiyarqunki. Pëtam Teyta Dios kawaritsimushqa. Kawarirkamur yuripuyämashqantam noqakuna rikäyarqü. 16Pëmi kë reqiyashqëki nunata kachakätsishqa. Jesucristuman markäkuyaptïmi rikäyashqëkinöpis kanan sänuna këkan.
17<<Wawqikuna, Jesús salvamaqnintsik Cristo kashqanta mana musyarmi qamkunapis y autoridänintsikkunapis wanutsiyarqunki. 18Tsënö kaptinpis profëtankunawanmi Teyta Dios musyatsimarquntsik Cristuta wanutsiyänanpaq kashqanta. Tsëtam Teyta Dios cumplishqa.
19<<Kananqa perdonayäshunëkipaq jutsa rurëta jaqirir Teyta Diosta cäsukuyë. 20Tsënöpam Jesucristuta Teyta Dios yapë kachamunqa. Pëtam unëpita patsa akrarqan salvamaqnintsik Cristo kananpaq. 21Kutimunan junaq chämushqanyaqmi Jesucristuqa ciëluchö kanqa. Kutimurnam llapantapis churanqa Teyta Dios munashqannöna kananpaq. Tsënö kananpaq kashqantaqa Teyta Diospa santu profëtankuna unëpita patsam willakuyarqan.
22<<Moiséspis [unë castantsikkunatam] nirqan: <Teyta Diosmi qamkunapita juk nunata churanqa noqanö profëta kananpaq. Pë niyäshushqëkita cäsukuyanki. 23Pipis pëta mana cäsukuq kaqqa qarqushqam kanqa>.#Deut. 18.15-19; 34.10.
24<<Samuel willakushqanpita patsam Teyta Diospa llapan profëtankunapis willakuyarqan kanan witsan pasëkashqankunata. 25Profëtakuna willakuyashqan promësakuna noqantsik chaskikunantsikpaqmi këkan. Tsënöllam unë castantsikkunawan Teyta Dios pactu rurashqanpis noqantsikpaq këkan. Tsë pactuta rurarmi Abrahamta Teyta Dios kënö nirqan: <Qampita miraqpitam kë patsachö pïmë nunakunapis bendicionta chaskiyanqa>.#Gén. 12.3; 22.18. 26Abrahamta änishqanta cumplirmi sirwiqnin#3.26 Tsë palabraqa griëguchö sirwiqnin o wamran ninanmi. Jesústa kawarirkatsimur noqantsikman Teyta Dios kachamurqan. Tsënö kachamurqan jutsa rurëta jaqirir noqantsik puntata tsë bendicionta chaskinantsikpaqmi>>.
Currently Selected:
Hechos 3: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.