Apocalípsis 4
4
Tayta Diosta jana pasacho alabayashqan
1Saypitanami jana pasacho punku kicharaykämuqta rikarqä. Say hörami nawpata wiyashqänöla cornëta waqamuqnöraq kayno nimaqta wiyarqä: <<Kayman wisämuy. Kananmi rikasishayki ima päsananpaq kaqtapis>>.
2Jinan hörami Espíritu Santu rikasimarqan jana pasacho kaykaq trönuta. Say trönuchömi juk jamaraykarqan. 3Jamaraykaqqa jaspe rumino y cornalina ruminöraqmi chipipiykarqan. Jamakunan trönu jananpami esmeralda ruminöraq chipipiykaq seqyaw ichiraykarqan.#Eze. 1.26-28; 10.1.
4Say trönutami tumapararqan ishkay chunka chusku (24) trönukuna. Say trönukunamanmi yuraq mödanash y qori corönan jatish mayor runakuna jamakuyarqan. 5Chawpincho kaykaq trönupitami asikyaypa asikyar elqukuy yarqamurqan. Maqakuypis bunruruypa bunrururmi wiyakämurqan.#Éxo. 19.16; Apoc. 8.5; 11.19; 16.18. Trönupa nawpanchömi qanchis candelabrukuna rataraykäyarqan.#Zac. 4.2. Saykuna kayarqan Tayta Diospa qanchis espïritunkunami.#Apoc. 1.4. 6Trönu nawpanpanami kuyaylapaq cristal vidriunöraq lamar rikakarqan.
Saynöpis trönu nawpankunapa tumaypami chusku kawaykaqkuna#Eze. 1.13, 22. kaykäyarqan. Paykunapami intëru cuerpuncho nawinkuna karqan. 7Punta kaqmi karqan león niraq. Ishkay kaqnami karqan töru niraq. Kimsa kaqnami karqan runa niraq. Chusku kaqnami karqan pajaykaq#4.7 Wakin runakunaqa vuelaykaq niyanmi. anka niraq.#Eze. 1.5-10; 10.14. 8Say chuskun kawaykaqkuna soqta riprayuqmi#4.8 Wakin runakunaqa älayuqmi niyan. kayarqan. Saynöpis intëru cuerpunchömi nawinkuna karqan.#Eze. 1.18; 10.12.
Say kawaykaqkunami paqaspa junaqpapis niyarqan:
<<¡Santu, santu, santu!
¡Lapanpaq munayyuq Tayta Dios santumi kaykan!#Isa. 6.2-3.
¡Payqa unaypita kawaq, kananpis kaykaq y shamunanpaq kaykaqmi kaykan!>>
9Trönuncho jamaraykaq imayyaqpis kawaq Tayta Diosta sayno adorar agradëcikur alabayaptinmi 10say ishkay chunka chusku (24) mayor runakunapis imayyaqpis kawaq Tayta Diospa nawpanman lätakuykur adorayarqan. Corönankunata jorqur Tayta Diospa trönunpa nawpanman churaykuyashpanmi niyarqan:
11<<Tayta Diosnilä, qamlami lapanpaq munayyuq kaykanki.
Imatapis qammi kamashkanki.
Kawayta qosh kaptikimi lapanpis kawaykäyan.
Saymi lapanpis respitayäshushpayki alabayäshunki>>.
Currently Selected:
Apocalípsis 4: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.