Efesios 3
3
1Saymi noqa Pablo, Jesucristupa ali wilakuyninta qamkunata y wakin mana Israel runakunatapis wilapashqäpita prësu wichqarashqächo...#3.1 Kay yarpayta apóstol Pablo versïculu 14-chöraqmi ushan.
Mana Israel runakunatapis wilapänanpaq Pabluta churashqan
2Tayta Dios kuyakuq karmi churamash qamkunaman y wakin mana Israel runakunamanpis ali wilakuyninta apanäpaq.#Col. 1.25. Say wilakuytaqa musyaykäyankinami. 3Ali wilakuyninta mana musyash kayaptinpis Tayta Diosmi tantiyasimash say wilakuy ima kashqantapis.#Gál. 1.12. Sayno tantiyasimashqantami kay cartacho wilaykä.
4Saymi kay cartata liyir tantiyakuyanki Jesucristupa wilakuyninta wilakushqäta. 5Say ali wilakuyta manami unay runakuna musyayashsu. Kananraqmi santu apostolkunata y profëtakunatapis Espíritu Santu tantiyasiyämash. 6Say wilakuy kaynömi nikan: Tayta Diospa ali wilakuyninta chaskikurmi mana Israel runakunapis salvacionta tariyanqa. Saymi Israel runakunata Tayta Dios promitishqankunata paykunapis chaskiyanqa. Saynöpami lapansipis say ayllunölana kaykansi.#Col. 1.26-27. 7Say ali wilakuyninta wilakunäpaqmi Tayta Dios kuyakuq kar munayninwan churamash.
8Tayta Diosman lapan yärakuqkunapita mana väliqnin kaykaptïpis#1Cor. 15.9. Tayta Diosmi kuyamar churamash Jesucristupa ali wilakuyninta mana Israel runakunaman chäsinäpaq. Say ali wilakuymanqa manami ima riquëzapis tinkunsu. 9Unaypita mana musyayashqan wilakuyta pïmaytapis wilapänäpaqmi lapantapis kamaq Tayta Dios churamash.
10Saynöpami Jesucristuman yärakuqkuna salvakuyaptin supaykunapis y jana pasacho kaykaq lapan angilkunapis tantiyaykäyan Tayta Dios shumaq yachayyuq kashqanta. 11Sayno tantiyaykäyan Tayta Dios unaypita pasa yarpashqanno Señor Jesucristo noqansi rayku wanush kaptinmi. 12Saymi Jesucristuman yärakur Tayta Diosta mana mansapaypana manakunsi.
13Jesucristo salvamashqansita musyaykarqa mana Israel runakunata wilapashqäpita prësu wichqaraptïpis ama lakikuyaysu. Lakikuyänaykipa trukanqa salvakuyänaykipaq wilakushqäpita kushikuyay.
Jesucristo selläma kuyamashqansi
14Saymi qonqurpakuykur [Señor Jesucristupa] Papänin Tayta Diosta manakü. 15Paymi kamash jana pasacho kaqkunata y kay pasacho kaqkunatapis. 16Paytami manakü gloriacho riquëzankuna kashqanman tupu Espïritunwan poderta qoyäshunaykipaq. 17Saynöpis manakü shumaq yärakuyaptiki Jesucristo shonquykikunacho tänanpaqmi. Saynöpami shumaq jaqwäkush jachano y ali cimientush wayino kar paypa kuyakuynilancho kawayankipaq.
18Kuyakuynincho kawarmi lapan yärakuq mayinsikunawan tantiyakuyanki Jesucristo selläma kuyamashqansita. Pay kuyakuq kashqanqa selläma anchumi, largumi, altumi y jundumi kaykan. 19Saymi Tayta Diosta manakü kuyakuyninta tantiyasiyäshunaykipaq. Saynöpami Tayta Dios qamkunacho kar pay munashqanno kawayänaykipaq imaypis yanapäyäshunki.
20¡Tayta Diosta alabaykuläshun! ¡Seqaypa munayyuq karmi manakushqansipita y yarpashqansipitapis masraq yanapämansi! 21¡Iglesian kanansipaq Jesucristo salvamashqansipita lapansi mana ajayaypa imaypis alabaykuläshun! Amén.
Currently Selected:
Efesios 3: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.