Hechos 3
3
Cu'ima'quëre Jujucaise'e
1Te'e mu'se na'iquëna, Pedropi cui'ne Juanpi co̱ni Maija'quëre se̱ hora a las tres pa'i maca Maija'quëre se̱ huë'ena saë'ë. 2Satena, ja̱rote cu'ima'quëpi De'oco hue'yosi eta sa'ro yë'quë macare da ñosiquëpi ñu'i Pedrore cui'ne Juanre caca huëojëna, curiquë se̱ji'i. Ja̱ë cato tsi̱'nëna cu'ima'quë paji'i, da cacacohua'ire curiquë se̱jaquë cajë dasiquëpi. Ja̱je pa'ipi si'a mu'seña pa̱ipi i̱te sa̱ñojëna, curi hueroquë ñu'iquë paji'i, eta sa'ro yë'quë macare ñu'i. 3Ja̱je curi ñu'i se̱i ñu'iquëpi Pedrore cui'ne Juanre ñani curiquë se̱ji'i, tsoe caca tëjiye ja'i macare pa'ijëna. 4Se̱ina, Pedropi i̱te ñani capi:
“Ñajë'ë, yëquëni.”
5Caquëna, curiquëre i̱sisi'quë cama'quë cuasaquë i̱se'ere ñaquëna, 6Pedropi capi, i̱te:
“Yë'ë curiquë peoyë. Ja̱je pa'iquëta'are yë'ë payere i̱sisi'i. Jesús Nazaret aquë mamipi cayë huëni cu'ijë̱'ë.”
7Caquë Pedropi ëja te̱'te jë̱tëna tse̱ani naë huëo nëcoquëna, te'ere papi jë'a huëni nëcapi. Huëni nëcaquëna, i̱ nëcañoa cui'ne i̱ jëo peto ca̱ jëaye carapi. 8Caraëna, de'oye nëcaquë cuji'i. Ja̱ maca yureta'a i̱ohua'i ja̱'re tsioni te'e Maija'quëre se̱ huë'ena cacani Maija'quëre de'oquëre pa'ni caquë sihuaquë sa'caquë yo'opi. 9Cacani cu'i Maija'quë de'oquëre pa'ni caquë sihuaquë yo'oquëna, si'aohua'i i̱te ñahuë. 10Ñajë quëquë huesëhuë, i̱te yo'ose'ere cuasajë. Noni Maija'quëre se̱ huë'e eta sa'ropi De'oco hue'e hue̱'ñapi curi se̱i ñu'ina, ñacohua'i sëte quëquëhuë, i̱ cu'iye ñani.
Pedro Yëhuoye
11I̱ti co'yasiquëpi Pedrore cui'ne Juanre tse̱ani ñuni saoma'ë yo'opi. Yo'oquëna, ña quëquëjë si'aohua'i Pórtico de Salomón ca hue̱'ñana huë'huëjë saë'ë, i̱ohua'i pa'i hue̱'ñana ñañu'u cajë. 12Jai pa̱i tsi'sijëna, ñani Pedro capi:
“¿Me yo'ojë Israel pa̱i ai cuasaye'ni? Iquëre yëquë tutupi pa̱nita'a Maija'quëre yëquë ai oi do'ipi ne co'yarena, cu'iyeje̱ ñajë mësaru yëquëse'ere ai ñañë. 13Iquë ju̱'iquëre cato, mai aiohua'i, Abraham Diusupi Isaac cui'ne Jacobo Diusupi ne co'yapi. I̱ necaiquë Jesuni jerepa pa'ire i̱ñoquë. Mësaru pa̱i ëjaëna tse̱ani i̱sirena, Pilato de'oquë api cuasani joyesi'i caquëna, mësaru ë̱sehuë. Ja̱je pa'ina, mësaru ë̱sesiquë pa'iyere i̱ñoquë yo'opi. 14Iquë de'oye nuiñe yo'oquëni joyeye ë̱sejë pa̱ire huaiquëni joyejë̱'ë, cahuë, mësaru. 15Ja̱je yo'oni pa'iye i̱si Ëjaëni mësaru huani je̱ohuë. Ja̱je yo'osicohua'ita'are Maija'quëpi huajëquëre huëopi, i̱te. Ja̱ yo'ose'e yëquëpi ñasicohua'i a'ë. 16Iquë mësaru noni ñaquëre, Jesure necaiquëre pare asa do'ipi tutu i̱sipi. I̱sina, ñañë, mësaru. Jesure necaiquëre pare asa do'ipi iquëre ju̱'iñe ti peoquëre pare ne co'yapi, mësarupi ñañë, si'aohua'i i̱ti yo'ose'e.
17Asayë, yureta'a mësaru Jesure huai maca yo'ose'e. Mësaru cui'ne mësaru ëjaohua'i cato ja̱re cajë yo'oyë, cuasama'pë coa noni huesë huani je̱ohuë. 18Ja̱je yo'ojëna, Maija'quë cato i̱te quëacohua'i ja̱'re Cristo ju̱'iñe pa'iji tsoe hue̱'ña case'ere yo'o ti̱'api. 19Ja̱je pa'ina, mësarupi Maija'quëna daijë̱'ë. Dani ja̱'në yo'ose'e je̱ojë'ë, mësaru co'aye yo'ose'ere të̱no je̱ocaija̱'quëre. Ja̱je yo'ojëna, ñani Maija'quëpi de'oye pa'iye i̱si'ñe pa'i api. 20Tsoe hue̱'ña mësarute i̱sisi'i, Cristore cuasa nëosiquëni Jesuni jëjo daoquë mësaruna. 21Ja̱je pa'iquëta'are yure cato i̱te quëacaicohua'i tsoe hue̱'ña pa'isicohua'i ja̱'në ca'ñeje pa'ye si'a co'amaña ne de'hua macaja̱'a Cristo ma'tëmore pa'ija̱'quë api. 22Ja̱je pa'ina, mai aiohua'ire Moisés quëapi, ñeje: ‘Ëjaë Diusupi yë'ëje̱ pa'ire i̱te quëacaija̱'quëre neja'quë api, mësaru aquëni. Si'aye i̱ caye de'oye sehuocaijë̱'ë. 23Si'aohua'i i̱ caye sehuocaima'cohua'i cato, pa̱i pa'i daripëpi ti̱rona nejosicohua'i pa'ija̱'cohua'i a'ë.’
24Si'aohua'i Maija'quëre quëacaicohua'i Samuel pa'inëpi de ñata dao mu'seña cato iye mu'seña pa'i ja̱'ñere cahuë. 25Ja̱je pa'ina, mësaru a'ë, i̱te quëacaicohua'i mamajë Maija'quë i̱sisi'i ca nëose'ere pacohua'i, Abrahamre ca nëose'e pacohua'i. I̱ case'e cato caji: ‘Më'ë tsëcapë acohua'ija̱'a iye yeja pa'icohua'i si'aohua'i de'oye pa'iye i̱si cua̱ñoja'cohua'i a'ë.’ 26Ja̱je pa'ina, mësarupi co'aye pa'iyere je̱oni po̱nëjëna, de'oye pa'iye i̱sisi'i caquë Maija'quëpi i̱ mamaquëre ju̱'isiquëni huëoni mësaruna du'ru jëjo daopi.”
Currently Selected:
Hechos 3: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.