Doma 3
3
Nuquin Papan icsambuen naquido cuidte chiaid
1Adshumbic naden chuinu. Tantia. ¿Udiubo icacta bëdambo icpatsiash? ¿Ada shui dëbid detemiac bëdambo icpatsiash? 2Ai, bëdambo iquec, caimbi. Nuquin Papan: Naden nata, quequin Umbi Chiaid ma isadaidbomba tantianu, quequin Ambi Chiaid dada uamepampic.#3.2 Cuëd. 147.19-20 isbanta. 3Isadaidbo utsi utsiec Ambi Chiaid niacquido icsho issun ¿ada Nuquin Papan ambi chiacpadombuen nainquio icpatsiash? 4Natsiash, caimbi. Aden ambi chiacpadombuen naquidquio Nuquin Papa nec. Matses abitedimbo muaquido icnuc Nuquin Papan naden chuiquin dada uamiampid iquec:
Abimbo chuiquidquio icquin ambi chiacpadombuen naquidquio nec.
Adquid icquin: Icsambocquid cuidquid nebi, quequin mibi icsambuen chuishunquido dëniacquin cuidquidquio nec,
quequin dada uamepampic.#3.4 Cuëd. 51.4 isbanta. 5Matsesën icsambuen naquid icquimbi: Nuquin Papa tantiamequid nebi. Ubi icsambuec tabadsho issun naden tantiatsiash: Icsambocquidpenquio Nuquin Papa nec. Icsaisambo yec bëdamboshëcquid nec. Aidëmbi matsesën icsambuen nasho issun cuidendac, quequin chiaid icnuc abi tantiamequid icshobi Nuquin Papan ubi cuidac icsambo iquec, quequin tantiacbimbuen tantienquio icnuna. 6Nuquin Papa muesambo nec. Muaquid yec: Matses icsambuen naquido cuidenquio iquembi, quetsempanëdash.
7Nadembidi icsambuen tantienda. Ubi muaquidquio icnubi adquidpenquio Nuquin Papa nec. Bëdamboshëcquid yec muesambo nec, quequin matsesën tantiatsiash. Aden matses tantiamequid icsho ¿atotsi queshun Nuquin Papan ubi cuidpatsiash? quequin icsambuen tantienda. 8Aden icsambuen chiec nuqui nadtsiac. Nuquin Papa tantiamequid iquequi icsaquionona, nuqui quetsiac. ¿Adendambi chuibandio? Padenquio. Pabado: Nuquin Papa tantiamequid iquequi icsaquionona, quiosh, quequin mibi mua uaosh, quequin chuituidoshi. Ubi aden mua uaquin chuishunquido Nuquin Papan cuidtequidombo nendac.
Matses abitedimbo icsambuen naquido nec, quiaid
9Tantia. Chuinu. ¿Atotsibi quio? Nuquitedi isadaidbo yec bëdambuec tabadnubi matses utsibo icsambuen naquido nec ¿quectabi icpe? Padenquio. Isadaidbo yec Isadaidpembo yec matses utsibo yec quec abitedimbo icsambuen naquido nec, quequin mibitedi chiombi.
10Naden chuiquin Nuquin Papan dada uamepampic:
Nuquin Papan chiacpadombuenuidi naquidquio matses abentsëc nibëdec.
11Nuquin Papa tantiaquin naquidquio nibëdec.
Nuquin Papa tantiate bunquidquio nibëdec.
12Abitedi Nuquin Papa tantienquio yec podquied icsambocquidën nidacbimbuec iquec.
Abitedimbo icsambocquido nec.
Ambi Chiaid bëdambuen naquidquio nibëdec.
Abentsëc adquidquio nibëdec.#3.10-12 Cuëd. 14.1-3 issun Cuëd. 53.1-3 isbanta.
13Matses uënësacsho chococaid shëcuë shëcniac icsambo nuadacbimbuec
matses icsambuec onquec.
Aton anan bëdambuen chiacbimbuen chiec mua uanquido nec.
Adquid icquin nisin pequin icsa uacbimbuen icsa uanteuidi bunec icsambuec onquequido nec.#3.13 Cuëd. 5.9 issun Cuëd. 140.3 isbanta.
14Aton anan onquec nëishash chieshëmënec:
Uënëschitoshon, quequin icsambuenuidi chuiquido nec.#3.14 Chotaquën onqueten Cuëd. 10.7 isbanta.
15Chieshec nëishash badedquio nidshun intac mëyanmequin cuessunianquido nec.
16Abi nidacno natiamequin chieshënquin icsa uaquin
nibëdanmequid nec. 17Aido bëdambuec tabadte tantienquio icquido nec.#3.15-17 Isa. 59.7-8 isbanta.
18Nuquin Papan cuidnushe, quec dacuëdenquiocquido aido nec,
quequin chuiquin dada uamepampic.#3.18 Chotaquën onqueten Cuëd. 36.1 isbanta.
19Naden nuquitedi tantiec. Nuquin Papan: Naden nata, quequin chuiquin Moises dada uamiampid tantiaquido yec isadaidbo: Aidën chiaid tantiaquin: Aiduidi naquidquio nebi, quequin abimbo chuitiapimbo iquec. Adenquio yec matses abitedi: Ambi Chiaid niac niacquin tantienquio yanquimbimbi icsambuen nachitoc, quesho Nuquin Papan cuidtequido yec matses abitedimbo otacquio tabadendac. 20Aden Ambi Chiaid niaquesambo nibëdnuc: Ambi Chiaidtedi naquidquio nebi, quesho Nuquin Papan ubi bëdambuen isec, quequin nuquitedi abimbo chuitiapimbo iquec. Nuquin Papan Chiaid issun: Ambi Chiaid niac niaquec icsambuen naiquien nuquitedi tabadchitec, quequin tantiamenuen Nuquin Papan: Naden nata, quequin chuiquin Moises dada uamiampid nec.#3.20 Chotaquën onqueten Cuëd. 143.2 isbanta.
3. Esuquidistu tantiasho Nuquin Papan matses bëdambuen isquin abëd tabadmete chiaid
(3.21-31)
21Ambi chiacpadombuenuidi natiapimbo yec matses icsambuec tabadsho issun ëndenquimboshë Nuquin Papan ambi matses bëdambuen iste chuiquin Moisesbëta ambi oncamiaido dada uamepampic. 22Aden ambi chuiquin dada uamiampicpadombuen nëbi abi tantiamequid Esuquidistu uidtsëqui tantiasho Nuquin Papan matses bëdambuen isec icsambuen naisabimbuecnuc. Isadaidbobëtambi matses utsibontsen Esus tantiasho adoendac. 23Matses abitedi icsambuen naquido yec Nuquin Papa bëdamboshëcquidbëd ictiapimbo yec uannombo iquec. 24Adquid bëdambuen istiapimbo icbuedëmbi Nuquin Papan: Ubi piucquid mene, quenquio icquin nëbi nuquitedi icsambuen naid bedshunec abided cuidadaid Esuquidistu tantiasho bëdambuen isec icsambuen naisabimbuecnuc. 25Nuquin Papan namiac Esuquidistu intac mëyanec uënësaid Esus tantiasho Nuquin Papan nuqui icsambuen naondaidtedi tantienquio yec bëshunquin nuquitedi bëdambuen isquin cuidenquio iquendac. 26Icsaquido cuidquid icquimbi Nuquin Papan badedquio chieshtoshon cuidenquio icquid nec. Adquid icquin Nuquin Papan abi isaisa yacpadombuembidi nëbi Esus tantiasho icsambuen naisabimbuecnuc bëdambuen isquin nuqui cuidenquio iquendac.
27-28Umbi aden chuisho tantiash: Ambi chiacpadombuenuidi umbimbo nasho Nuquin Papan ubi bëdambuen isec, quequin mimbi abimbo chuitiapimbo iquec. Nuquin Papan: Naden nata, quequin Moises chiampicpadombuenuidi matsesën natiapimbo icsho bëdambuen istiapimbo icbuedi nëbi Esus tantiasho Nuquin Papan nuqui bëdambuen isec, quequin nuqui tantiec. 29¿Isadaidbouidtsëquida Nuquin Papan: Cun matses nec, quequin bëdambuen ispatsiash? Padenquio. Matses abitedishun Esus tantiasho Nuquin Papan bëdambuen isendac. 30Abipadquid utsi nibëdnuc Nuquin Papa abentsëcquiobi iquec. Adquid icquin ambi chiacpadombuen isadaidbon Esus tantiasho: Nëid shui dëbid dëtemequid nec, quenquio icquin Nuquin Papan bëdambuen isec. Adembidi: Nëid shui dëbid dëtiacmaid nec, quenquio icquin Esus tantiasho bëdambuen isec. 31Adoaid yec: Nuquin Papan: Naden nata, quequin chuiquin Moises dada uamiampid niac niaquec icsambuec tabadnuna ¿quecta icpec? Padenquio. Adenquio icquin Esus tantiaquin Nuquin Papan: Naden nata, quequin chiacpadombuen natiadquio nuqui yanendac.
Currently Selected:
Doma 3: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.