Hechos 3
3
Petedon caputiapimbo icquid bëdanmiaid
1Adnubien uëshë budec 3 yannuc aton matses isadaidbon nadedniacpadec Petedobëd Uan Nuquin Papa tabadte shubu dapa yacno Nuquin Papa chiec nidpanëdash. 2Ambo nidnubien dada caputiapimbo yec uishcaid puduedte Shëcuë Bëdaidquio quequin cuënaid yacno utsibon buanshun dectanaid icpanëdash. Aidi anin tishacchobi yec caputiapimbocquid nepanëdash. Adquid icsho badiadquidën badiadquidënquien buandednequin aid shëcuë cuëmano nanded nandedac uequimbi utsi utsiec chochosho issun: ¡Piucquid ubi mene! cabampanëdash. 3Adnubien Petedobëd Uan chosho issun: ¡Piucquid ubi mene! capanëdash caputiapimbocquidën.
4Adoaquien Uambëd nidtuidshun Petedon caputiapimbocquid bëisquin: Ubi daëdi is, capanëdash. 5Adoac: Ubi piucquid menec, quequin tantiaquin aid daëd issobien 6Petedon: Piucquid cuna nibëdec. Umbi tantiaid Esuquidistu Nasaded yacno iccondaidën bëdanmiacpadec bëdanec nidtoash nidec nid, capanëdash. 7Aden chuitanquin caputiapimbocquidën mëdante abiucquio bedtanquin Petedon nidtomiac badedquio taëshbëd taë uidënquio yanec nidtopanëdash caputiapimbocbuedi. 8Bëdambo yanec puduanec capuampanëdash. Adec bëdanash Petedobëd Uan chedobëd capuashic Nuquin Papa tabadte shubu dapa daquënë uaidën puduedash: Nuquin Papa bëdamboshë iquec, quequin aid tantiec pudundotan pudundotanec cuishonquequiopanëdash. 9Adec pudundotannec cuishonquec capushobien isquidon nadobededpanëdash: 10Nuquin Papa tabadte shubu dapa daquënë uaidën puduedte shëcuë Bëdaidquio quequin cuënaid yacno tsadunac tsadec: Piucquid ubi mene, quebuedi capueque. Is, quec tantiadempambo yec dacuëdec tabadquin isbededpanëdash.
Nuquin Papa tabadte shubu dapa cuishubu uaidënshun Petedon chuibanaid
11Aden caputiapimbocquid bëdanmiac Petedobëta Uan nianmenquio yec aidobëd chuiquid tapa Sadomonën Nuquin Papa tabadte shubu dapa cuishubu uampidën puduednubien iccuededquid titinquianec choquin tsibananash auëshquiotsen tantiadempambo yec tabaduapanëdash. 12Adec tabadsho issun Petedon naden chuibampanëdash: Cun matses isadaidbo ¿Atotsi quiash: Padtec, quequin ubi daëdi mibitedishun bëise? ¿Ubi daëdshun nacta nëid capupadic? ¿Ubi bëdambocquid icquindambi nadatiambocquin nadio? 13Aidi Abadauan yec Isac yec Acobo yec nuquin tsusedpabo yec quequidon Papa campidën naid nec. Aidëmbi ambi nidaidën chomiaid icsho Esus nëbi abitedishun Icbombo icmiac Nuquin Papan dayun tabaduaic. Aidi Aton Papa yacno nidabicsho bedmeshun Pidato meniaquien: Nëid dada icsambuen naisa neque. Nidmenu, quequin tantiaquin Pidaton chiaqui: Icsambocquid neque. Uënës uamequimbien ictiad, quequin mibitedishun chuipondac.#3.13 Buan. 3.6bëta Buan. 3.15 tantiaquin nëid dada uapanëdash. 14Esus icsaisa yec bëdamboshëcquid nec, quequin utsin tantianubi aid bunenquio icquin: Chieshëmënec cuessunnianquid quënën tsadunaid chicquin Esusded cuidta, quequin mibitedishun chuipondac. 15Aden mibitedishun Esus uënës uamepondac. Aiduidtsëqui Nuquin Papabëd matses tabadmequid icsho uënës uamiacshobien Nuquin Papan uincuenmepaccondash. Aden uincuenmiacsho ubitedishun ispondambi. 16Esusën nëid bëdanmec, quequin umbi abimbo tantianubi nëid dada uishcash uesho mimbi isbededbuedi bëdanash bëdambuec capusho mibitedishun isec.
17Cun matses isadaidbo mibitedi neque. Tantia. Chuinu. Nuquin Papan Chomiaidquio nec, quequin tantienquio icquin min chuiquidobëtan mibitedishun Esus uënës uamiondac. 18Adote chuiquin Nuquin Papan: Umbi Chomiaid Quidistu Mesias caid matsesën uënës uaendac, quequin ambi oncamiaidtedi Nuquin Papan dada uamiampicpadembi napondash.#3.18 Isa. 52.13 bedanquin Isa. 53.12 tsiccuëscaquin dada uaid tantiaquin aden Ducasën chuipanëdash. 19Nëbi mimbi icsambuen naid ënshun Nuquin Papa tantiata. Ma mimbi icsambuen naidtedi tantienquio yec bëshumpanu. 20Ëndenquimbo Ambi tantiampicpaden Chomiaid Mesias caid Esusën ma mibitedi bëdambo icmepanuna. 21Nuquin Papan abitedi bëdambo icmete uëshë choabicnuc ambi chiampicpadequi nëbi Esus abuc aton Papabëd tabadec. Adec tabadte chuiquin Nuquin Papan oncamiaidon utsin utsinquien dada uapampic. 22Adembidi nuquin tsusedpabo Moisesën naden chuipampic:
Ambi oncamiaid ubipadquid utsi iuecshun Nuquin Papan chomendac. Aidi isadaidbo nendac. Aid choshon chuibansho tantiashun aidën chiactedi bëdambuen nabanta.
23Aidën chiacpadombuen naisa Nuquin Papan: Cun matses nec, catiapimbo iquendac, quequin Moisesën dada uapampic.#3.23 M.I.Ch. 18.15-19 tantiaquin nëid dada uapanëdash. Adembidi Moisesën Chuibanampid chotaquën onqueten dada uaid iqueque. D.N.Ch. 23.29 isbanta.
24Adombuembidi Samuedën chuibampampic. Adombuembidi aid tsibanquido Nuquin Papan oncamiaid utsibon matsesën nëbi natequid chuibanuapampic. 25Nuquin Papan oncamiaidon tsiuecquido yec aidën madobimbuecquido mibitedi nec. Tsusedpa Abadauanën tsiuecquidobidi mibitedi neuaic. Aidon tsiuecquido nidaid abitedi yacnocquido icsho Nuquin Papan Abadauan chiampicpaden bëdambuen isaido mibitedi nec. Naden Abadauan Nuquin Papan chuipampic:
Mibi ënden uënësampid icnuc iuecquimbocshon aton matsesbëta matses utsi utsien min tsiuecquidën bëdambuen isquin bëdambo icmendac, quepampic,#3.25 Ene. 12.3 isquinc Ene. 22.18 isquinc Ene. 26.4 isquinc casho tantiaquin nëid dada uapanëdash.
26Aden Abadauan ambi chiampicpadquid aidën tsiuecquid Nuquin Papan Mado choacsho mimbi uënës uamepondac. Aden uënës uacsho Nuquin Papan uincuenmeshun nuquin matsesëmba ambi icsambuen naid ënsho ma ambi bëdambuen isaid icpanuna, quequin Petedon chuipanëdash.
Currently Selected:
Hechos 3: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.