Hechos 1
1
I. BEDANQUIN CHIAID
(1.1-26)
Nuquin Papan Aton Mayan Bëda menete chiaid
1Ducas nebi. Esusën tauaquin nabanaidbëta aidën chuibanaidtedi mibi tantiamenu, quequin ënden dada uaondambi, chuiquid tapa Teopido.#1.1 Aden ambi ënden dada uaid Ducasën Dada uaid nepanëdash. 2Aden Esus abuc indoaid yacno cuëscaquin chuiquin dada uaondambi. Abuc nidnun Esusën: Ubi chuibenneta, quequin abëd icquido chuiquin Nuquin Papan Mayan Bëdan tantiamiacpadombuen dadpen chuibampanëdash. 3Cueste napotiaidën dectanac uënësash uincuenshun: Uincuenobique. Is, quequin Esusën abëd icquidouidtsëqui ismebampanëdash. Ma abimbo iquec, quequin tantiaquin ubi chuibennenu, queshun aden ismebampanëdash. Adec 39tedec ushquin ismebennequin: Nuquin Papan namiacno tabadte iquec, quequin Esusën chuibampanëdash. 4Aden shubu dadpen icquid Edusaden yacnoshon ambi: Ubi chuibenneta, caidobëd tabadquimbi Esusën nadopanëdash: Edusaden yacno tabadquin umbi chiannebued Cun Pan Aton Mayan Bëda mibitedi menetequid caimbudta. 5Nuquin Papa tantiaquid nec, quequin acten mentopadennec Uan acten mentoanquidën. Padnuen iuecpactsëcshun umbi chiannebuedquio: Ubi tantiaquid nec, quequin Nuquin Papan aton Mayan Bëda mibitedi menendac, quepanëdash Esus.
Esus abuc nidte chiaid
6Adshobien abëd iccuededquid abentsëcshun Esus chuiquin: Iuen matses utsibon iuaquin namiaido nuquin matses isadaidbo nec. Adquid icsho issun ¿nëbimbobida mimbi nuquin matsesën chuiquid tapa icmetsiashe? Tantianu. Chui, Icbo, capanëdash. 7Adoaquien Esusën: Aden nuquin matses chuiquid icmete uëshë chote tantiesa mibitedi nec. Nuquin Papanuidtsëqui ambi tantiacpadën adquid icmendac, capanëdash. 8Aden chiashic: Aton Mayan Bëda Nuquin Papan mibitedi meniac aidënquio bëdambuen tantiamiac nadatiambocquin naquin ubi chuibennequidquio mibitedi iquendac. Edusaden yacnoshomba mimbi ubi chuibanendac. Adoshombic nidaid cuëshë Udea yacnocquidobëta nidaid cuëshë Samadia caid yacnoquido chuibanendac. Adoshombic ënapenquio nidshun nidaid utsi utsiec yacnoshontsen adembidi mibitedishun chuibanendac, quepanëdash.
9Aden ambi: Ubi chuibenneta, caido ënquin chuishobi Esus abuc indopanëdash. Aden indosho isec aido tabadnubi abu ushun Esus bëtinsho padpiden istiapimbo icpanëdash.
10Adec Esusbëd chobuedo abuc isec tabadnubien dada daëd dashcute ushumboshëcquid dasiuidquid isadcuenec choash tabadec:#1.10 Nuquin Papabëd icquido ambi budmiaido nepanëdash. 11Nidaid Cadidea yacnouësh choquido ¿atotsi quiash abuc isec tabadec ne? Abuc indosho mimbi isbued Esus abu ushun choec budsho mimbi padpiden isuaindac, quepanëdash abuc isbededec tabadquido chiec.
Matias, Esus chuibenneta, quequin iccuededquidon chiaid
12Aden Esus abuc indosho isash abëd macuësh Odibos caid yacno chobuedo shubu dadpen icquid Edusaden yacno niduapanëdash. Chonoadtemaid uëshë nec, quiash ënapen nidenquio ictanec chopanëdash. 13Aido Edusaden yacno choash shubu abuc quënë icquidën abi tabadbocno dectatoash tabaduapanëdash. Aid quënë nuntan Esusën: Ubi chuibenneta, caido nëidtedi icpanëdash. Nëidic Petedo. Utsibic Uan. Utsibic Santiaco. Utsibic Andedes. Utsibic Uedipe. Utsibic Tomas. Utsibic Badtodome. Utsibic Mateo. Utsibic Adpeon mado Santiaco cuëmëdquid. Utsibic aton matses isadaidbo iuaquido chuiquid bunesa Simon cuëmëdquid. Utsibic Santiaco utsin mado Udas cuëmëdquid. 14Aidtedi Esusën: Ubi chuibenneta, caido quënë nuntan tabadnubi Esusën tita Madia yec Esus tantiaquid chido utsibo yec Esusën utsibo yec quec ambobidi iccuededtennequin: Nuquin Papa chuinuna, quequin chiannepanëdash.
15Aido 120ted iccuedednubi nënantanquio nidtoshon Petedon naden chuipanëdash: 16-17Tantia, cun utsibo, Udas padon naid chuibannu. Abëd icquid icquimbi Esus chieshënquido Udasën Esus bedmiondash, quequin nuquitedi tantiec. Aden Udasën nate chuiquin Nuquin Papan Mayan Bëdan tantiamiacpadombuen nuquin tsusedpa Dabidën dada uapampic.#1.16-17 Aden dada uampid Dabidën Cuëd. 41.9 tantiaquin dada uapanëdash. Min onqueten dada uabi icnuc chotaquën onqueten dada uaid Cuëd. 41.9 ista. 18Aden Esus bedmeshun Udasën ambi piucquid bedbued meneuac abi menequidën aid piucquidën tiedëmpi bedpanëdash. Adquid icnubi aid tiedën Udas tëtaniadash pobidisquiash paëdec aton pucu tishidpanëdash. 19Pucu tishidec intac chiuidaid icsho tantiaquin Edusaden yacnocquidtedishun tiedëmpi bedaid aton onqueten intac tiedëmpi quequin Asedama cabededpondash. 20Adembidi ëndenquimboshë Udas tishabicnuc chuiquin Nuquin Papan Mayan Bëdan tantiamiacpadombuen tsusedpa Dabidën cuëdënte naden dada uapampic:
Ma adequi aton shubu mosadpanuna.
Adecbidi aid shubun ma matses nibëdquid icpanuna, quequin chuipampic.#1.20 Aden dada uampid Dabidën Cuëd. 69.25 tantiaquin dada uapanëdash. Min onqueten dada uabi icnuc chotaquën onqueten dada uaid Cuëd. 69.25 ista.
Aden chuishumbic cuëdënte utsitsen naden Dabidën dada uapampic:
Aidën nabanuidbued ma utsin nabampanuna,
quequin Dabidën chuipampic, quepanëdash Petedo.#1.20 Chotaquën onqueten dada uaid Cuëd. 109.8tsen isbanta.
21Aden chiampid tantiashic: Udas nibëdnuc: Esus chuibenneta, quequin abentsëc chuinuna. Nëid quënë nuntan nuquibëd capuquido dada dadpen iqueque. Esus chuibenneta, canun nadquid dada abentsëc chuinuna. Tantia. 22Uanën Esus acten mentosho isash niamëdenquio yec Esusbëd capucuenneshun Esus indosho isquidquio icsho: Esus chuibenneta, quequin nuquitedishun abentsëc chuinuna. Adoac Esusën: Ubi chuibenneta, caidobëtan Esus uincuenaid chuibantiad, quepanëdash Petedo ambo iccuededquido chiec.
23Aden Petedon chiaquien abëd iccuededquidon: Mimbi chuibocpadquid nëid daëd iquec. Abentsëc Ose cashun Badsabas cashumbic Usto quequin cuënaid iquec. Utsibic Matias iquec, quepanëdash. 24Adshun Nuquin Papa chiec nadec iccuededquido onquepanëdash: Nëid daëd iqueque. Is, Papa. Matses abitedishun tantiaid tantiaquid mibi neque. ¿Mitsicquidimbi: Esus chuibenneta, cape? Ubitedi tantiame, Papa. 25Udas padon icsambuen nash chian annëdënquiacno nidbuedën nabanuidbued namenu, quequin mimbi bëdambuen isaid abentsëc ubi isme, Papa. Aden mimbi ismiac: Mibitsen Esus chuibennequid icta, caindambi, quequin Nuquin Papa chuibededpanëdash. 26Aden chuitanquimbic aid daëd abi cuëmëdquid abentse abentsen dada uatempin dada uashun tëchun sandoshon cadotanniac dada uaidëmpi abia puduenaid istanquin: Matias cuëmëdquid nec, quequin isbededtanquin: Esusën: Ubi chuibenneta, caido 11ted icbuedi nëbi Matiasbëd 12ted yanosh, quequin nuntan iccuededquidtedishun tantiabededpanëdash.
Currently Selected:
Hechos 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.