2 Pedro 2
2
Eb li xicꞌ nequeꞌiloc re li Cristo
1Queꞌcuan ajcuiꞌ chak profeta aj balakꞌ saꞌ xya̱nkeb laj Israel junxil. Joꞌcan ajcuiꞌ saꞌ e̱ya̱nk la̱ex, teꞌcua̱nk aj tzolonel aj balakꞌ. Chi timil ut saꞌ mukmu teꞌrocsi li balakꞌ aj naꞌleb re xsachbal xpa̱banquil li Dios toj retal teꞌxtzꞌekta̱na li Ka̱cuaꞌ Jesucristo li quicam saꞌ xcꞌabaꞌeb. Ut riqꞌuin li nequeꞌxba̱nu, nequeꞌxsach ribeb chi junaj cua ut yo̱queb chixbokbal raylal saꞌ xbe̱neb. 2Nabaleb telajeꞌxic saꞌ li ma̱usilal li yo̱queb chixyebal eb aꞌan ut xma̱queb aꞌan ta̱majecua̱k li kapa̱ba̱l li tzꞌakal ya̱l. 3Eb aꞌan aj ticꞌtiꞌeb. Caꞌaj cuiꞌ le̱ tumin nequeꞌraj. Xban xrahinquil ru li tumin nequeꞌbalakꞌic riqꞌuin ticꞌtiꞌ. Lix rahobtesinquileb aꞌan ac tenebanbil chak saꞌ xbe̱neb najter xban li Dios. Incꞌaꞌ chic ta̱ba̱yk. Cuulac ban re xcutanquil nak teꞌsachekꞌ ruheb. 4Li Dios incꞌaꞌ quixcuy xma̱queb li ángel li queꞌma̱cob chiru. Quixcuteb ban saꞌ xbalba saꞌ chamal jul kꞌojyi̱n xsaꞌ. Bacꞌbo̱queb chi cadena quixcanabeb toj ta̱cuulak xkꞌehil li rakba a̱tin. Joꞌcan ajcuiꞌ tixba̱nu reheb laj balakꞌ. Incꞌaꞌ tixcuy xma̱queb. 5Li Dios incꞌaꞌ quixcuy xma̱queb li queꞌcuan saꞌ ruchichꞌochꞌ najter. Quixtakla ban chak li butꞌi haꞌ saꞌ xbe̱n li ruchichꞌochꞌ re nak teꞌosokꞌ chixjunileb laj ma̱c. Caꞌaj cuiꞌ laj Noé laj yehol resil li ti̱quilal quicoleꞌ rochbeneb li cuukub chic lix comoneb. 6Joꞌcan ajcuiꞌ li Dios quixrak a̱tin saꞌ xbe̱neb laj Sodoma ut laj Gomorra. Quixsacheb nak quixcꞌat lix tenamiteb. Junes cha quicana. Li Dios quixba̱nu chi joꞌcan chokꞌ retalil chiruheb chixjunileb li yo̱keb chi ma̱cobc mokon re nak teꞌxucuak xban li cꞌaꞌru ta̱cha̱lk saꞌ xbe̱neb. 7Quixcol laj Lot li ti̱c xchꞌo̱l. Aꞌan cꞌajoꞌ nak narahoꞌ saꞌ xchꞌo̱l xban nak numtajenak li ma̱usilal li nequeꞌxba̱nu li cuanqueb aran Sodoma. 8Laj Lot, aꞌan ti̱c xchꞌo̱l. Ut nak cuan saꞌ xya̱nkeb laj Sodoma junelic ra saꞌ xchꞌo̱l chirilbal, ut chirabinquil lix ma̱usilal lix naꞌlebeb. 9Joꞌcan ajcuiꞌ anakcuan. Li Dios naxtenkꞌaheb li ti̱queb xchꞌo̱l re nak incꞌaꞌ teꞌxqꞌue rib chi a̱le̱c. Ut eb li incꞌaꞌ ti̱queb xchꞌo̱l tixcanabeb chixcꞌulbal li tojba ma̱c nak tixtau xkꞌehil li rakba a̱tin. 10¿Ma tojaꞌ ta chic incꞌaꞌ tixqꞌueheb saꞌ tojba ma̱c li nequeꞌxrahi ru li tzꞌajbe̱tal aj naꞌleb ut nequeꞌxtzꞌekta̱na lix cuanquilal li Cristo? Eb aꞌan joskꞌeb ut kꞌetkꞌeteb. Incꞌaꞌ nequeꞌxucuac chixmajecuanquileb li ángel li cuanqueb saꞌ xnimajcual cuanquilal. 11Eb li ángel cuanqueb xnaꞌleb ut nim xcuanquil chiruheb laj tzolonel aj balakꞌ. Abanan li ángel incꞌaꞌ nequeꞌxmajecuaheb li cui̱nk aꞌin chiru li Ka̱cuaꞌ. 12Aꞌut eb laj tzolonel aj balakꞌ chanchaneb li xul. Ma̱cꞌaꞌ nequeꞌxpa̱b. Yal re chapecꞌ ut re camsi̱c nak nequeꞌyoꞌla. Yo̱queb chixmajecuanquil li cꞌaꞌak re ru incꞌaꞌ nequeꞌxtau ru. Eb aꞌan jun osoꞌjiqueb nak teꞌosokꞌ. 13Chi joꞌcan teꞌxcꞌul xkꞌajca̱munquil lix ma̱usilaleb queꞌxba̱nu. Eb laj tzolonel aj balakꞌ junelic saheb saꞌ xchꞌo̱l chixba̱nunquil li incꞌaꞌ us, usta chi cutan. Xuta̱nal chokꞌ e̱re nak cuanqueb saꞌ e̱ya̱nk xban nak nequeꞌcuulac chi cuaꞌac saꞌ le̱ ninkꞌe. Eb aꞌan junes ma̱cobc nequeꞌxcꞌoxla. 14Aꞌaneb aj muxul caxa̱r. Caꞌaj cuiꞌ ixk nequeꞌxcꞌoxla ut incꞌaꞌ nequeꞌxcanab ma̱cobc. Nequeꞌoc chixkꞌunbesinquileb li toj kꞌuneb xchꞌo̱l. Eb li cui̱nk aꞌin cꞌaynakeb chixrahinquil ru li biomal. Eb aꞌan majecuanbileb chi junaj cua xban li Dios. 15Nak nequeꞌxcanab li ti̱quilal, nequeꞌxic chi joꞌ ma̱joꞌ. Nequeꞌxba̱nu joꞌ quixba̱nu laj Balaam li ralal laj Beor. Laj Balaam quiraj xtaubal xtumin riqꞌuin xba̱nunquil li ma̱usilal. 16Joꞌcan nak quikꞌuseꞌ xban jun li bu̱r. Yal xul. Incꞌaꞌ naa̱tinac. Ut laj Balaam quirabi xya̱b xcux li bu̱r joꞌ xya̱b xcux li cui̱nk nak quiyeheꞌ re xban li bu̱r nak tixcanab xba̱nunquil li ma̱usilal. 17Eb laj tzolonel aj balakꞌ chanchaneb lix julel haꞌ li ma̱cꞌaꞌ haꞌ chi saꞌ. Ma̱cꞌaꞌ na-oc cuiꞌ. Chanchaneb li chok li nacꞌameꞌ yalak bar xban li ikꞌ. Eb li cui̱nk aꞌin teꞌxic saꞌ lix kꞌojyi̱nal ru li xbalba li ac yi̱banbil chokꞌ reheb. 18Nequeꞌoc chi yehoc xni̱nkal ru a̱tin saꞌ lix majelal xnaꞌlebeb. Ut riqꞌuin li ma̱c naxrahi li tzꞌejcualej yo̱queb chixkꞌunbesinquileb li cristian li toj queꞌel chak saꞌ xya̱nkeb. 19Eb laj balakꞌ nequeꞌxye: Libre chic texcua̱nk, chanqueb. La̱ex chic yal e̱re cꞌaꞌru te̱ba̱nu, chanqueb. Ut incꞌaꞌ nequeꞌxqꞌue retal nak aꞌan eb li cꞌayinbileb chi cꞌanjelac chiru li ma̱c xban nak li ani toj nanumta li ma̱usilal saꞌ xbe̱n, toj cuan rubel xcuanquil li ma̱c. 20Li ani nequeꞌxpa̱b li Ka̱cuaꞌ Jesucristo, nequeꞌxcanab ajcuiꞌ xmuxbal rib riqꞌuin li cꞌaꞌru cuan saꞌ ruchichꞌochꞌ. Abanan cui teꞌoc cuiꞌchic chi ma̱cobc ut cui ta̱numta̱k cuiꞌchic li ma̱c saꞌ xbe̱neb, kꞌaxal cuiꞌchic yibak ru lix naꞌlebeb chiru nak queꞌcuan junxil nak toj ma̱jiꞌ nequeꞌpa̱ban chak. 21Kꞌaxal us raj chokꞌ reheb nak incꞌaꞌ ta queꞌxnau xbehil li ti̱quilal chiru nak ac nequeꞌxnau ru, ut queꞌxcanab cuiꞌchic xpa̱banquil lix chakꞌrab li Dios li quikꞌaxtesi̱c reheb. 22Cuan jun li a̱tin nayeman naxye:
Li tzꞌiꞌ naxlou cuiꞌchic lix xaꞌau xcaꞌ sut, ut nayeman ajcuiꞌ nak li a̱k li atesinbil, naxtolcꞌosi cuiꞌchic rib saꞌ sulul. (Prov. 26:11)
Eb li cui̱nk aj balakꞌ chanchaneb li xul aꞌan xban nak queꞌoc cuiꞌchic xba̱nunquil li ma̱usilal.
Currently Selected:
2 Pedro 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.