1 Timoteo 6
6
Laj Pablo quixye chanru teꞌxba̱nu li mo̱s riqꞌuineb lix patrón
1Eb li mo̱s aj pa̱baneleb teꞌx-oxlokꞌi lix patroneb re nak ma̱ ani ta̱majecua̱nk re lix cꞌabaꞌ li Dios chi moco teꞌxtzꞌekta̱na li katijbal. 2Moco xban ta nak rech aj pa̱baneleb lix patrón nak incꞌaꞌ teꞌxqꞌue saꞌ xnakꞌeb ru. Tento aj ban cuiꞌ nak teꞌxqꞌue xchꞌo̱l chi trabajic xban nak rech aj pa̱banelil li nequeꞌcꞌuluc re li cha̱bil cꞌanjel nequeꞌxba̱nu ut xban nak raro̱queb ajcuiꞌ xban li Dios. At Timoteo, aꞌan aꞌin li ta̱chꞌolob xya̱lal chiruheb laj pa̱banel.
Eb laj balakꞌ incꞌaꞌ us xnaꞌlebeb
3Cuan li nequeꞌcꞌutuc re jalan tijleb li moco ya̱l ta. Moco nequeꞌxpa̱b ta li ya̱l li quixcꞌut chiku li Ka̱cuaꞌ Jesucristo. Jalan cuiꞌ lix pa̱ba̱leb. 4Eb li cui̱nk aꞌan ma̱cꞌaꞌ nequeꞌxnau. Junes xnimobresinquil rib nequeꞌxba̱nu. Caꞌaj cuiꞌ xcuechꞌinquil ribeb chirix a̱tin nacuulac chiruheb. Ut riqꞌuin aꞌan nachal li cakali̱nc, li hoboc, li kꞌaba̱nc ut li cuiba̱nc chꞌo̱lej. 5Eb li cui̱nk aꞌin, junes cuechꞌi̱nc nequeꞌxba̱nu. Moco tuktu ta xcꞌaꞌuxeb ut moco ya̱l ta li nequeꞌxye. Nequeꞌxcꞌoxla nak riqꞌuin lix pa̱ba̱leb teꞌxtau xtumineb. Ma̱junaji a̱cuib riqꞌuineb aꞌan. 6Ya̱l nak kꞌaxal lokꞌ li pa̱ba̱l chokꞌ reheb li nequeꞌxcꞌojob xchꞌo̱l riqꞌuin li joꞌ nimal joꞌ chꞌinal cuan reheb. 7Ma̱cꞌaꞌ cuan ke nak coyoꞌla saꞌ ruchichꞌochꞌ ut ma̱cꞌaꞌ ajcuiꞌ takacꞌam nak toca̱mk. 8Joꞌcan nak cui cuan katzacae̱mk ut cui cuan katꞌicr re xtzꞌapbal kib, cꞌojcꞌo̱k kachꞌo̱l riqꞌuin aꞌan. 9Abanan eb li nequeꞌrahoc ru li biomal, nequeꞌxqꞌue rib chi a̱le̱c ut nequeꞌxba̱nu li yibru aj naꞌleb. Aꞌan napoꞌoc ru lix cꞌaꞌuxeb ut riqꞌuin chixjunil li incꞌaꞌ us nequeꞌxba̱nu, nequeꞌxsach lix pa̱ba̱leb. 10Li xrahinquil ru li tumin, aꞌan xxeꞌ xto̱nal chixjunil li ma̱usilal. Cuanqueb li queꞌxtzꞌekta̱na lix pa̱ba̱l xban xrahinquil ru li tumin. Ut qꞌuila raylal queꞌxbok saꞌ xbe̱neb. Ut nequeꞌyotꞌotꞌnac saꞌ xchꞌo̱leb riqꞌuin li incꞌaꞌ us nequeꞌxba̱nu.
Laj Pablo quixye re laj Timoteo chanru nak ta̱cꞌanjelak chiru li Dios
11Ut la̱at, at Timoteo, la̱at aj cꞌanjel chiru li Dios. Ma̱ba̱nu li ma̱usilal li nequeꞌxba̱nu eb aꞌan. Qꞌue ban a̱chꞌo̱l chi cua̱nc saꞌ ti̱quilal. Chara li Dios ut chatpa̱ba̱nk chiru. Charaheb la̱ cuas a̱cui̱tzꞌin. Chacuy li raylal ut chatcua̱nk saꞌ tu̱lanil. 12Yal a̱kꞌe chi qꞌui̱c saꞌ la̱ pa̱ba̱l ut qꞌue a̱chꞌo̱l chire̱chaninquil li junelic yuꞌam, li bokbilat cuiꞌ xban li Dios. La̱at xaye ut xacꞌutbesi chi tzꞌakal la̱ pa̱ba̱l chiruheb nabal. 13Saꞌ xcꞌabaꞌ li Dios li naqꞌuehoc yuꞌam, la̱in nintzꞌa̱ma cha̱cuu nak ta̱ba̱nu la̱ taklanquil. Ut nintzꞌa̱ma ajcuiꞌ cha̱cuu saꞌ xcꞌabaꞌ li Jesucristo li quichꞌoloban xya̱lal chi ma̱cꞌaꞌ xxiu chiru laj Poncio Pilato. 14Ut la̱ taklanquil, aꞌan aꞌin: chaba̱nu chixjunil li taklanbilat cuiꞌ xban li Ka̱cuaꞌ. Ti̱cak la̱ chꞌo̱l ut ma̱cꞌaꞌak a̱kꞌusbal toj retal ta̱cꞌulu̱nk cuiꞌchic li Ka̱cuaꞌ Jesucristo.
Lokꞌoninbilak taxak li Dios anakcuan ut chi junelic
15Nak tixtau xkꞌehil li Dios tixcꞌutbesi cuiꞌchic chiku li Jesucristo. Li Dios, aꞌan kꞌaxal lokꞌ ut junaj ajcuiꞌ. Aꞌan li Rey li kꞌaxal nim xcuanquil saꞌ xbe̱neb chixjunileb li rey li cuanqueb saꞌ ruchichꞌochꞌ. Ut aꞌan ajcuiꞌ li Ka̱cuaꞌ li kꞌaxal nim xcuanquil saꞌ xbe̱neb chixjunileb li cuanqueb xcuanquil. 16Li Dios yoꞌyo chi junelic. Ma̱cꞌaꞌ xticlajic ut ma̱cꞌaꞌ rosoꞌjic. Aꞌan cutan saken chi junelic ut ma̱ ani naru na-oc riqꞌuin xban nak kꞌaxal lokꞌ. Incꞌaꞌ ilbil ru chi moco na-ileꞌ ru saꞌ ruchichꞌochꞌ. Chikaqꞌuehak taxak xlokꞌal ut chikalokꞌonihak taxak xban nak kꞌaxal nim lix cuanquilal anakcuan ut chi junelic. Joꞌcan taxak.
Laj Timoteo tixqꞌue xnaꞌlebeb li biom
17Ta̱chꞌolob xya̱lal chiruheb li biom nak incꞌaꞌ teꞌxkꞌetkꞌeti ribeb chi moco teꞌxcꞌojob xchꞌo̱l saꞌ xbe̱n li biomal li na-osoꞌ. Cheꞌxqꞌue ban xchꞌo̱l chixyoꞌoninquil li yoꞌyo̱quil Dios. Aꞌan naqꞌuehoc ke chi nabal chixjunil li cꞌaꞌak re ru. 18Chaye reheb nak cheꞌxba̱nu li us. Chinumta̱k lix cha̱bilaleb. Cheꞌxnauhak sihi̱nc chi nabal ut chi anchaleb xchꞌo̱l. 19Cui nequeꞌxba̱nu chi joꞌcan yo̱queb chixcꞌu̱lanquil lix ra̱baleb saꞌ choxa ut riqꞌuin aꞌan cꞌojcꞌo̱k xchꞌo̱leb. Cheꞌxba̱nuhak chi joꞌcan re nak ta̱cua̱nk lix yuꞌameb chi tzꞌakal re ru ut chi numtajenak xsahil xchꞌo̱leb.
Laj Pablo quixrak lix hu riqꞌuin xqꞌuebal xnaꞌleb laj Timoteo
20At Timoteo, cua̱nk saꞌ a̱chꞌo̱l li tijleb qꞌuebil a̱cue xban li Dios. Ma̱qꞌue xcuanquil li joꞌ ma̱joꞌil serakꞌ ut li cuechꞌij ib xban nak ma̱cꞌaꞌ na-oc cuiꞌ. Cuan li nequeꞌyehoc re nak cha̱bil naꞌleb, abanan moco ya̱l ta. 21Ninye aꞌin xban nak cuan li queꞌpa̱ban re li naꞌleb aꞌin ut xban aꞌan, queꞌxcanab xpa̱banquil li tzꞌakal ya̱l. Aꞌ taxak li rusilal li Dios chicua̱nk e̱riqꞌuin.
Currently Selected:
1 Timoteo 6: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.