1 Juan 2
2
Li Jesucristo aj jalol a̱tin chikix chiru li Dios
1Ex inherma̱n, chanchanex li cualal incꞌajol. Aꞌ cꞌaꞌak re ru aꞌin nintzꞌi̱ba e̱re re nak incꞌaꞌ texma̱cobk. Cui ut cuan junak ta̱ma̱cobk, cuan jun aj jalol a̱tin chikix chiru li Acuabej Dios, aꞌan li Jesucristo li ti̱c xchꞌo̱l. 2Li Jesucristo quicam re xtojbal rix li kama̱c. Moco caꞌaj ta cuiꞌ xban li kama̱c la̱o. Quicam aj ban cuiꞌ re xtojbal rix xma̱queb chixjunileb li cuanqueb saꞌ ruchichꞌochꞌ. 3Cui la̱o nakaba̱nu li cꞌaꞌru naraj li Dios, relic chi ya̱l nak la̱o reho chic li Dios. 4Li ani naxye, “la̱in rehin li Dios”, ut cui incꞌaꞌ naxba̱nu li cꞌaꞌru naraj li Dios, aꞌan aj ticꞌtiꞌ. Moco ya̱l ta ru li yo̱ chixba̱nunquil. 5Li ani napa̱ban re li ra̱tin li Dios, relic chi ya̱l nak naxra li Dios chi tzꞌakal. Riqꞌuin aꞌan nakanau nak la̱o reho chic li Dios. 6Li ani naxye nak re chic li Dios, tento nak junelic cha̱bilak lix yuꞌam joꞌ xyuꞌam li Jesucristo.
Li chakꞌrab kꞌaxal nim xcuanquil
7Ex inherma̱n, moco toj acꞌ ta li chakꞌrab yo̱quin chixtzꞌi̱banquil e̱riqꞌuin. Aꞌin aꞌan ajcuiꞌ li chakꞌrab li quiqꞌueheꞌ chak e̱re junxil. Ac e̱rabiom chak chalen nak xepa̱b li Cristo. 8Abanan chanchan acꞌ ajcuiꞌ li chakꞌrab xban nak kꞌaxal nim xcuanquil. Ut li chakꞌrab aꞌan, aꞌin nak te̱ra e̱rib che̱ribil e̱rib. Joꞌ quixba̱nu li Jesucristo, joꞌcan ajcuiꞌ takaba̱nu la̱o. Li ra̱tin li Jesucristo naxcutanobresi kanaꞌleb. Nak nakacanab li ma̱cobc, chanchan nak yo̱ chi numecꞌ li kꞌojyi̱n. Ut nak nakapa̱b li ra̱tin li Jesucristo, chanchan nak yo̱ chi cha̱lc li cutan. 9Li ani naxye nak xcutanobresi̱c lix naꞌleb xban li Cristo, ut xicꞌ naril lix herma̱n aꞌan toj cuan ajcuiꞌ saꞌ xkꞌojyi̱nal ru li ma̱c. 10Li ani naxra lix herma̱n, aꞌan cutanobresinbil lix naꞌleb xban li Cristo. Ut ma̱ ani nachꞌinan xchꞌo̱l xban. 11Li ani xicꞌ naril lix herma̱n, aꞌan toj yo̱ ajcuiꞌ chi be̱c saꞌ xkꞌojyi̱nal ru li ma̱c. Ut incꞌaꞌ naxnau bar yo̱ chi xic xban nak li ma̱c naramoc re lix ya̱lal chiru. 12Nintzꞌi̱bac e̱riqꞌuin, ex herma̱n, xban nak cuybil sachbil chic le̱ ma̱c xban li Dios saꞌ xcꞌabaꞌ li Jesucristo. 13Nintzꞌi̱bac ajcuiꞌ e̱riqꞌuin, la̱ex yucuaꞌbej, xban nak ac xepa̱b li Dios Cꞌajolbej li cuan chalen chak najter nak toj ma̱jiꞌ naxyoꞌobtesi chak li ruchichꞌochꞌ. Nintzꞌi̱bac e̱riqꞌuin la̱ex li toj sa̱jex xban nak xecuy xnumsinquil li a̱le̱c li naxqꞌue laj tza. Ut nintzꞌi̱bac ajcuiꞌ e̱riqꞌuin la̱ex cocꞌal xban nak ac xepa̱b li Acuabej Dios. 14Xintzꞌi̱bac e̱riqꞌuin la̱ex yucuaꞌbej, xban nak ac xepa̱b li Dios Cꞌajolbej li cuan chalen chak najter nak toj ma̱jiꞌ naxyoꞌobtesi chak li ruchichꞌochꞌ. Xintzꞌi̱bac e̱riqꞌuin la̱ex li toj sa̱jex, xban nak cau e̱rib ut li ra̱tin li Dios nacana chi junelic e̱riqꞌuin ut xecuy xnumsinquil li a̱le̱c li naxqꞌue laj tza. 15Ex inherma̱n, me̱ra chic ru lix ma̱usilal li ruchichꞌochꞌ chi moco li cꞌaꞌak re ru cuan saꞌ ruchichꞌochꞌ. Cui cuan junak naxra ru li cꞌaꞌak re ru aꞌin, moco naxra ta li Acuabej Dios. 16Chixjunil li ma̱usilal cuan saꞌ ruchichꞌochꞌ moco riqꞌuin ta li Dios nachal. Li ma̱c li naxrahi ru li tzꞌejcualej ut li xrahinquil ru li cꞌaꞌak re ru nakil riqꞌuin xnakꞌ ku moco riqꞌuin ta li Dios nachal. Joꞌcan ajcuiꞌ li kꞌetkꞌetil. Chixjunil aꞌin moco riqꞌuin ta li Dios nachal; xnaꞌleb ban li ruchichꞌochꞌ. 17Li ruchichꞌochꞌ ta̱osokꞌ joꞌ ajcuiꞌ li ma̱usilal. Abanan li ani naba̱nun re li naraj li Dios, aꞌan cua̱nk chi junelic.
Li xicꞌ nequeꞌiloc re li Cristo
18Ex inherma̱n, yo̱ chak chi nachꞌoc rosoꞌjiqueb li cutan. Ac xerabi resil nak ta̱cha̱lk jun li xicꞌ na-iloc re li Cristo. Aꞌan li anticristo nayeman re. Ut anakcuan ac cuanqueb nabal li xicꞌ nequeꞌiloc re li Cristo. Joꞌcan nak nakanau nak yo̱ chi cuulac xkꞌehil rosoꞌjiqueb li cutan. 19Saꞌ kaya̱nk xeꞌel li xicꞌ nequeꞌiloc re li Cristo, abanan moco kech aj pa̱baneleb ta nak xeꞌcuan. Cui ta eb aꞌan kech aj pa̱banelil, cuanqueb raj chi junelic saꞌ kaya̱nk. Abanan xeꞌel saꞌ kaya̱nk re nak ta̱nauma̱nk nak ma̱cuaꞌeb kech aj pa̱banelil. 20Ut la̱ex ac santobresinbilex xban li Santil Musikꞌej li qꞌuebil e̱re xban li Jesucristo, ut nequenau chic lix ya̱lal. 21Moco xban ta nak incꞌaꞌ nequenau lix ya̱lal nak nintzꞌi̱bac e̱riqꞌuin. La̱ex nequenau lix ya̱lal ut nequenau ajcuiꞌ nak ma̱ jun ticꞌtiꞌ na-el saꞌ li tzꞌakal ya̱l. 22¿Ani laj ticꞌtiꞌ nak nequecꞌoxla la̱ex? Aꞌan li nayehoc re nak li Jesucristo, ma̱cuaꞌ aꞌan laj Colonel li yechiꞌinbil xban li Dios. Li nayehoc re chi joꞌcan, aꞌan li anticristo li xicꞌ na-iloc re li Cristo. Aꞌan li natzꞌekta̱nan re li Acuabej Dios ut li Cꞌajolbej. 23Li ani naxye nak li Jesucristo ma̱cuaꞌ Ralal li Dios, li nayehoc re aꞌan ma̱cꞌaꞌ li Acuabej Dios riqꞌuin. Ut li ani naxye nak li Cristo, aꞌan li tzꞌakal Ralal li Dios, aꞌan cuan li Acuabej Dios riqꞌuin. 24Li cꞌaꞌru xetzol chak chalen saꞌ xticlajic le̱ pa̱ba̱l chicua̱nk saꞌ le̱ chꞌo̱l. Cui te̱cꞌu̱la saꞌ le̱ chꞌo̱l li cꞌaꞌru xerabi chak chalen saꞌ xticlajic le̱ pa̱ba̱l, cua̱nkex riqꞌuin li Cꞌajolbej ut riqꞌuin li Acuabej Dios. 25Li yuꞌam ma̱cꞌaꞌ rosoꞌjic, aꞌan li naxyechiꞌi ke li Jesucristo. 26Nintzꞌi̱ba aꞌin e̱riqꞌuin chirixeb li xicꞌ nequeꞌiloc re li Cristo xban nak eb aꞌan teꞌraj e̱balakꞌinquil. 27Abanan incꞌaꞌ tento ta̱cua̱nk junak aj tzolol e̱re re xcꞌutbal che̱ru cꞌaꞌru li ya̱l ut cꞌaꞌru li incꞌaꞌ ya̱l xban nak qꞌuebil e̱re li Santil Musikꞌej xban li Jesucristo. Li Santil Musikꞌej cuan e̱riqꞌuin ut aꞌan li naqꞌuehoc e̱naꞌleb. Li cꞌaꞌru naxcꞌut che̱ru li Santil Musikꞌej tzꞌakal ya̱l. Moco ticꞌtiꞌ ta. Joꞌcan nak chexcua̱nk chi sum a̱tin riqꞌuin li Jesucristo joꞌ naxcꞌut che̱ru li Santil Musikꞌej. 28Ut anakcuan, ex herma̱n, ninye cuiꞌchic e̱re nak chexcua̱nk chi sum a̱tin riqꞌuin li Jesucristo re nak ma̱cꞌaꞌak le̱ xiu nak tol-e̱lk cuiꞌchic li Ka̱cuaꞌ Jesucristo. Sahak ban saꞌ kachꞌo̱l chixcꞌulbal chi ma̱cꞌaꞌak kaxuta̱n. 29La̱ex nequenau nak li Cristo ti̱c xchꞌo̱l. Ut chenauhak ajcuiꞌ nak chixjunileb li nequeꞌba̱nun re li ti̱quilal, aꞌan tzꞌakal ralal xcꞌajol li Dios.
Currently Selected:
1 Juan 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.