Lucas 19
19
Skꞌaneal Naj Zaqueo
1Jix apni Jesús bꞌey conobꞌ Jericó. Catuꞌ jix ecꞌabꞌ yul conobꞌ tuꞌ. 2Ey jun winaj caw bꞌeom tituꞌ, Zaqueo sbꞌi naj. Yaaw tejom el toolabꞌal bꞌey jun conobꞌ tuꞌ. 3Jaꞌ naj Zaqueo tuꞌ, caw chi yoche cꞌal chi yil yin Jesús, tzet utbꞌil yili, cꞌam cꞌal chi skeꞌ pax yiloni, yutol caw ecꞌal ánima chi too bꞌululoj yin scꞌul Naj yet chi bꞌeyi. Yetoj pax oj yu yaliẍ steel naj Zaqueo tuꞌ. 4Yuxan jix bꞌabꞌitoj naj sattaj catuꞌ jix atoj skꞌabꞌ jun teꞌ sicómoro stiꞌ bꞌe tuꞌ, catuꞌ oj yilon yin Jesús yet oj ecꞌ yich teꞌ tuꞌ. 5Jaꞌ yet jix ecꞌ el naj yich teꞌ teꞌ tuꞌ, jix atoj tꞌanan Jesús yin naj, catuꞌ jix awi atoj Jesús tet naj jaxca tiꞌ:
—Zaqueo, eyantej eyman, yutol jaꞌ bꞌey ja na oj jin apnoj wakꞌ jin posada, ẍi atoj Jesús tet naj.
6Jix yabꞌ cꞌal naj Zaqueo jun tuꞌ, catuꞌ jix eytej yin eymanil. Catuꞌ jix chaꞌle apnoj Jesús yin tzalacꞌulalil bꞌey sna.
7Jaꞌ yet jix yilon ebꞌ ánima jaxca tuꞌ, caw ey tzet chi yal ebꞌ yin Jesús, yutol jix apni yakꞌ sposada bꞌey sna jun pena sbꞌeybꞌal. 8Catuꞌ jix a linan naj Zaqueo tuꞌ, catuꞌ jix yalon tet Naj Kaawil tuꞌ jaxca tiꞌ:
—Jaꞌ tinaniꞌ Mamin, jantaj tzet ey, ey jin an, snan cꞌal oj wakꞌ tet ebꞌ mebꞌa. Ta ey ebꞌ jix wetne an, ta ey ebꞌ jix welkꞌane stumin an, canel oj yun wakꞌon sqꞌuexel tet ebꞌ an, ẍi naj Zaqueo tuꞌ.
9Jix yalon Jesús tuꞌ jaxca tiꞌ:
—Jaꞌ tinaniꞌ jix jul scolbꞌanil spixan ebꞌ bꞌey jun na tiꞌ. Jaꞌ naj Zaqueo tiꞌ, caw yel yicꞌaal naj Abraham. 10Jain tiꞌ Akꞌbꞌil Wopiso yu Dios xol ebꞌ ket animail an, jix jin jul yu jin seyon ecꞌ ebꞌ qꞌueynajtoj, catuꞌ chin colon can el ebꞌ an, ẍi Jesús.
Skꞌaneal Laonebꞌ Chꞌen Tumin
11Jaꞌ yet lalan yabꞌen ebꞌ tzet chi yal Jesús, ey jun skꞌaneal jix yaltej tet ebꞌ, yutol lalan yapni ebꞌ scawilal Jerusalén, catuꞌ jix snaꞌon ebꞌ tol oj waꞌxoj oc naj Yaawil yul yibꞌankꞌinal tiꞌ yu Dios yin eymanil. 12Jix yalon Jesús tet ebꞌ jaxca tiꞌ:
—Jaꞌ junel ey jun winaj yicꞌaal ebꞌ naj yaaw. Jix awteletoj bꞌey jun conobꞌ naat yu stoo ẍaꞌon yopiso, catuꞌ oj oc yaawil bꞌey jun conobꞌ tuꞌ. 13Jaꞌ yet cꞌamto chi toi, catuꞌ jix yawten laonwan ebꞌ smooso. Ey wan chꞌen tumin ey yip sat jix yakꞌ can yul skꞌabꞌ junjun ebꞌ. Laan cꞌal sbꞌisil chꞌen jix yakꞌ can tet ebꞌ. Catuꞌ jix yalon can tet ebꞌ jaxca tiꞌ:
—Akꞌwej negocio yetoj wan chꞌen tumin tiꞌ masantaꞌcꞌal chin juli, catuꞌ che yakꞌon chꞌen junelxa ey jin an, ẍi naj tet ebꞌ. Jix lawi cꞌal tuꞌ, jix too naj. 14Jal pax ebꞌ yet conobꞌ caw chi chichon oc scꞌul ebꞌ yin. Yuxan tzajan stoo cawan oxwan ẍejabꞌ ebꞌ yintaj. Jix bꞌet yalon ebꞌ tet ebꞌ chi aon oc yopiso naj tuꞌ jaxca tiꞌ: “Jaꞌ jun winaj tuꞌ, caw cꞌam chi yal cu cꞌul chi oc naj kaawil oj bꞌey cu conobꞌ,” ẍi ebꞌ. 15Jix akꞌle cꞌaltaꞌ yopiso yoc yaawilal. Catuꞌ jix julecꞌ bꞌey sconobꞌ. Jix yawten ebꞌ smooso bꞌey jix yakꞌ can chꞌen tumin tuꞌ, yu yabꞌen naj Jantajxa yuneꞌ chꞌen jix yakꞌ ganar junjun ebꞌ. 16Yuxan jix jul jun bꞌabꞌel mooso, catuꞌ jix yalon jaxca tiꞌ: “Patrón, jaꞌ chꞌen ja tumin, jix ja wakꞌcan ey jin an, laonebꞌ yuneꞌ chꞌen jix yakꞌ ganar,” ẍi naj tet naj. 17Jix yalon naj tuꞌ: “Watxꞌ xin, jaach tiꞌ caw watxꞌ jix ja wun ey jin an. Caxcꞌal txenne chꞌan jix wakꞌ yul ja kꞌabꞌ, caw watxꞌ cꞌal jix ja wute ja naꞌbꞌal yetoj, yuxan, tol chi waoc ja wopiso yin yaawil yibꞌan laonebꞌ conobꞌ,” ẍi naj tet smooso tuꞌ. 18Catuꞌ jix julecꞌ junxa smooso. Jix yalon naj tet spatrón tuꞌ jaxca tiꞌ: “Patrón, jaꞌ chꞌen ja tumin jix ja wakꞌ ey jin an, joebꞌxa sbꞌisil yuneꞌ chꞌen jix yakꞌ ganar,” ẍi naj tet spatrón. 19Yuxan jix yal pax naj patrón tuꞌ tet naj jaxca tiꞌ: “Watxꞌ xin, jaach tiꞌ oj wakꞌ ja wopiso ja woc yin yaawiloj yibꞌan joebꞌoj conobꞌ,” ẍi naj patrón tet naj. 20Jix lawi tuꞌ xin, jix jul junxa naj mooso. Jix yalon tet spatrón tuꞌ jaxca tiꞌ: “Patrón, jaꞌ chꞌen ja tumin tiꞌ, cꞌubꞌabꞌil chꞌen wu yul jun jin txꞌambꞌal an. 21Jain tiꞌ, chin xiw ey jaach an, yutol wotaj caw chꞌaan jaach. Yutol jaach tiꞌ, tuxa cꞌal cha chaꞌ tzet chi yakꞌ ganar junojxa ánima. Tuxa cꞌal cha jatxꞌa bꞌey tzet awbꞌil yu junojxa,” ẍi naj tet spatrón. 22Jix yalon naj patrón tet naj tuꞌ jaxca tiꞌ: “Jaach tiꞌ, mooso jaach toni, caw pena jaach. Yu wan jix ja wal tiꞌ, oj jin naꞌoc ja win an. Ilaꞌ tol ja wotajxa tol chꞌaan jin an. Tuxa cꞌal chin chaꞌ tzetyetal chi yakꞌ ganar wanxa ánima. Chin jatxꞌon a bꞌey ma waw an. 23¿Tzet yuxan, ma ja watoj chꞌen maanil tet junojxa mactxequel, yet watxꞌ chi yakꞌ ganar niꞌoj yuneꞌ chꞌen? Kꞌinaloj ta jix ja watoj chꞌen maanil, jaꞌ yet jix jin juli, jix jin chaꞌon yuneꞌ chꞌen,” ẍi naj patrón tet naj. 24Catuꞌ jix yalon tet ebꞌ eyecꞌ yetoj tuꞌ jaxca tiꞌ: “Iꞌwej ecꞌ chꞌen tet naj. Che yakꞌon chꞌen tet naj ey laonebꞌ sbꞌisil yuneꞌ chꞌen jix yiꞌ yu naj tuꞌ,” ẍi naj tet ebꞌ. 25“Jaach patrón, jaꞌ naj cha wal tol chi akꞌle chꞌen tet naj tuꞌ, eyxa laonebꞌ yuneꞌ chꞌen yet naj,” ẍi ebꞌ tet naj. 26Caw yel chi wal ey jex, jaꞌ mac eyxa yet, oj akꞌle cꞌal tet. Jal mac cꞌam yet, oj iꞌle ecꞌ niꞌoj tzet eyxa tet. 27Jaꞌ ebꞌ chi jowi oc win an, ebꞌ jix ochen tol ma jin oc yin wopiso tiꞌ an, chi too je yiꞌ ebꞌ. Jaꞌ yet chi jul ebꞌ, che yakꞌon cam ebꞌ jin sattaj, ẍi naj.
Yet Jix Apni Jesús Bꞌey Conobꞌ Jerusalén
(Mateo 21:1-11; Marcos 11:1-11; Juan 12:12-19)
28Jix lawi yalon Jesús jun skꞌaneal tuꞌ, jix ẍaꞌon pax bꞌe stoo bꞌey Jerusalén yetoj ebꞌ scuywom. 29Jaꞌ yet jix apni ebꞌ scawilal conobꞌ Betfagé yetoj Betania, bꞌey wonan Olivo, jix ẍejon bꞌabꞌoj cawan ebꞌ scuywom. 30Jaꞌ yet cꞌamto chi too ebꞌ, catuꞌ jix yalon tet ebꞌ jaxca tiꞌ:
—Asiꞌwej bꞌey jun aldea cu cawilal tiꞌ. Ey jun noꞌ bꞌuru oj ilcha je yu tituꞌ, txuan oc noꞌ. Cꞌamto junoj mac chi a yibꞌan noꞌ. Che tiel noꞌ, catuꞌ che yiꞌontej noꞌ ey jin an. 31Ta ey mac chi alon ey jex jaxca tiꞌ: “¿Tzet yuxan che tiel noꞌ?” ta ẍi, quey tiꞌ chi yun je yalon jaxca tiꞌ: “Tol ey tzet oj oc noꞌ yu Naj Kaawil,” je chi tet, ẍi Jesús tet ebꞌ. 32Jix too ebꞌ cuywom tuꞌ. Jix ilcha yu ebꞌ jaxca cꞌal jix yun yal-le tet ebꞌ yu Jesús tuꞌ. 33Jaꞌ yet lalan stion el noꞌ bꞌuru ebꞌ tuꞌ, jix apni wan yaaw noꞌ, catuꞌ jix yalon tet ebꞌ jaxca tiꞌ:
—¿Tzet yuxan che tiel noꞌ? ẍi ebꞌ yaaw noꞌ tuꞌ tet ebꞌ.
34—Tol ey tzet oj oc noꞌ yu Naj Kaawil, ẍi ebꞌ.
35Catuꞌ jix yiꞌontej noꞌ ebꞌ bꞌey Jesús tuꞌ. Jix yaatoj junjun spichil ebꞌ skꞌaanoj yichin noꞌ, catuꞌ jix ale atoj Jesús yibꞌan noꞌ yu ebꞌ. 36Jaꞌ yet lalanxa sbꞌeyi, catuꞌ jix cꞌoli slitxꞌbꞌa ey spichil ebꞌ sattaj yul bꞌe bꞌey lalan sbꞌey Jesús tuꞌ.#19:36 Chi ey spichil ánima cꞌal xaj teꞌ yul bꞌe, yu xꞌoxon el ebꞌ tol chi tzala ebꞌ yet chi jul junoj rey ma junoj mactxequel miman yeloc apnoj. 37Jaꞌ yet lalanxa yapni bꞌey spacꞌanil wonan Olivo tuꞌ, jix a yaw masanil ebꞌ scuywom yin ip yu tzalacꞌulal. Jix cꞌoli yalon watxꞌ kꞌane ebꞌ tet Dios yu wan milagro jix yil ebꞌ. 38Jix yal ebꞌ jaxca tiꞌ:
—Kalwej watxꞌ kꞌane tet Naj cu Reyal jix chejletej yu Dios. Caw ey watxꞌcꞌulal satcan, miman ojabꞌ yeloc apnoj cu Diosal,#Salmos 118:26. ẍi ebꞌ.
39Ey pax wan ebꞌ Fariseo eyecꞌ xol ánima tuꞌ. Jix yal ebꞌ tet Jesús jaxca tiꞌ:
—¿Tzet yuxan cꞌam cha tenchane wan ja cuywom tiꞌ? ẍi ebꞌ tet Jesús.
40Jix yalon Jesús tet ebꞌ jaxca tiꞌ:
—Chi wal ey jex, ta chi tzꞌini ey ebꞌ, catuꞌ cꞌamxa mac chi a yaw, jaꞌ wan chꞌen tiꞌ oj a yaw, ẍi Jesús tet ebꞌ.
41Jaꞌ yet jix yilontoj conobꞌ Jerusalén Jesús yet jix apni scawilal, caw jix okꞌ yu. 42Catuꞌ jix yalon jaxca tiꞌ:
—Jaꞌ yet jun cꞌu tiꞌ, jex a conobꞌ, tol oj wal jix naꞌcha el je yu tzet utbꞌil che yute je chaꞌon swatxꞌcꞌulal Dios. Jal tinaniꞌ xin, cꞌam chi skeꞌ snaꞌcha el je yu, yutol ewbꞌabꞌil xa el ey jex. 43Yuxan ey jun tiempoal oj juloj. Jaꞌ ebꞌ chi jowi oc yin jun conobꞌ tiꞌ, oj oc joyan ebꞌ, catuꞌ oj yaon oc colal ebꞌ yinlaj, yet oj yakꞌlen jowal ebꞌ yetoj tuꞌ. 44Oj makꞌle ey bꞌulan masanil jun conobꞌ tiꞌ sat txꞌotxꞌ yu ebꞌ. Oj smakꞌon cam ebꞌ ánima ebꞌ. Jaꞌ chꞌen chꞌen latzꞌbꞌil yin snail bꞌey jun conobꞌ tiꞌ, oj ecꞌ bꞌulna masanil chꞌen. Queytuꞌ oj yun can eloj, yutol jaꞌ yet jun tiempoal tiꞌ, jix jul Dios jex scoloni, ma cꞌal pax naꞌcha el je yu, ẍi Jesús.
Ebꞌ Ujtebꞌil Eltej Yu Jesús Yul Stemplo Dios
(Mateo 21:12-17; Marcos 11:15-19; Juan 2:13-22)
45Jix lawi jun tuꞌ xin, jix octoj Jesús tuꞌ yul stemplo Dios. Jix yujten eltej ebꞌ chi txonwi, cꞌal ebꞌ chi manwi. 46Jix yalon tet ebꞌ jaxca tiꞌ:
—Yalnaj can Dios yul An Juun Tzꞌibꞌebꞌilcan jaxca tiꞌ: “Jaꞌ jin na an, yet cꞌal txa yei,”#Isaías 56:7. ẍi yul An Juun. Jal jex jaex tiꞌ, jaxca junoj nachꞌen bꞌey chi yewbꞌa el sbꞌa ebꞌ elkꞌom, queytuꞌ che yute,#Jeremías 7:11. ẍi Jesús tet ebꞌ.
47Junjun cꞌal cꞌu sbꞌetecꞌ Jesús cuywa bꞌey yul stemplo Dios tuꞌ. Jaꞌ ebꞌ yaaw yakꞌomal xaambꞌal ebꞌ Israel tet Dios, yetoj ebꞌ cuywam yin sley Moisés, cꞌal ebꞌ yaaw conobꞌ tuꞌ, jix sey ebꞌ tzet chi yute yakꞌon cam Naj ebꞌ. 48Ma cꞌal naꞌcha tzet chi yute ebꞌ, yutol eyoc scꞌul masanil ánima yabꞌen tzet chi yal Jesús.
Currently Selected:
Lucas 19: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.