2a Timoteo 3
3
Sbꞌeybꞌal Ebꞌ Ánima Yet Slawubꞌal Tiempoal
1Sowalil chi kotajne eloj, tol jaꞌ yet cꞌamto chi jul jun slawubꞌal cꞌual tuꞌ, ey jun tiempoal oj juloj tol caw ey smey. 2Ilaꞌ, tol ey ánima oj scamcꞌulne sbꞌa xꞌojli. Asan yin chꞌen tumin oj yaoc snaꞌbꞌal ebꞌ. Oj smeyne sbꞌa ebꞌ, oj yiꞌa can sbꞌa ebꞌ. Comon cꞌal oj bꞌuchwa ebꞌ yin Dios. Ma xa sjije ebꞌ tzet oj yal smam cꞌal xutx. Ma xa yal yu diosalil ebꞌ yu tzet oj ẍaꞌ. Junelne cꞌam swatxꞌil oj yute sbꞌeybꞌal ebꞌ. 3Cꞌam niꞌoj scamcꞌulal ebꞌ, cꞌam bꞌey oj okꞌ scꞌul ebꞌ yin junojxa mactxequel. Oj xijwoj a kꞌane ebꞌ. Ma skeꞌ smitxꞌon oc tucan smimanil ebꞌ. Caw jow ebꞌ. Oj oc ebꞌ acꞌulal yin masanil tzet watxꞌ. 4Jaꞌ yet oj jul jun tiempoal tuꞌ, oj snaꞌa kꞌane ebꞌ yin yamigo. Cꞌamxa chi xiw ebꞌ yunen tzet man watxꞌoj. Oj tzꞌaj yaloc sbꞌa ebꞌ jelanil. Asan yin tzet oj yoche oc ebꞌ yetoj smimanil bꞌey oj yaoc snaꞌbꞌal ebꞌ. Jal yin Dios xin, cꞌam niꞌoj scamcꞌulal ebꞌ. 5Oj tzꞌaj yal ebꞌ jaxca tiꞌ: “Jaꞌ yin Dios chi kaoc cu naꞌbꞌal,” ẍi ebꞌ, oj tzꞌaj yalon ebꞌ. Jal sbꞌeybꞌal ebꞌ oj txꞌoxon eloj tol manaj Dios eyoc yetoj ebꞌ.
Manche ja junbꞌane ey ja bꞌa yetoj ebꞌ, Jaꞌ tiꞌ ja wet, tol chach el xol ebꞌ. 6Jaꞌ xol ebꞌ chi wal tiꞌ, ey ebꞌ ewantaj oj octoj yul-laj na. Catuꞌ oj yetnen ebꞌ ix ix cꞌam snaꞌbꞌal, ebꞌ ix etexnaj xa el snaꞌbꞌal yu tzet man watxꞌoj. Jaꞌ ebꞌ ix tuꞌ, caw ey tzet man watxꞌoj chi yoche oc ebꞌ. 7Jaꞌ ebꞌ ix ix tuꞌ, chi tzꞌaj cuywoj sbꞌa ebꞌ ix tobꞌalkꞌinal, cꞌam pax bꞌakꞌin oj yotajne el jun cuybꞌanil jaꞌcaw yel ebꞌ ix. 8Jaxca jix yun ẍichon oc scꞌul naj Janes yetoj naj Jambrés yin naj Moisés yet peyxa,#3:8 Janes, cꞌal Jambrés sbꞌi cawan ebꞌ jix yun caabꞌ oxebꞌ milagro jaxca yet naj Moisés chi bꞌinatej bꞌey Éxodo 7:10-13. jaxca tuꞌ oj yun ẍichon oc scꞌul ebꞌ chi cuywa tuꞌ yin cuybꞌanile caw yel. Tuxa ton jix etex el snaꞌbꞌal ebꞌ. Cꞌamxa chi yaoc scꞌul ebꞌ yin Dios. 9Jal pax ebꞌ tuꞌ, man oj yakꞌ ganar ebꞌ, yutol oj txeclo el ebꞌ sattaj masanil ánima, tol cꞌam snaꞌbꞌal ebꞌ. Jaxca jix yun xeclo el ebꞌ jix chichon oc scꞌul yin Moisés, queyton tuꞌ oj yun xeclo el ebꞌ.
Wan Slawubꞌal Ẍejbꞌanil Naj Timoteo Yu Naj Pablo
10Jal jaach, jaach tiꞌ, ja wotaj ton jin cuybꞌanil, cꞌal jin bꞌeybꞌal, cꞌal tzet chi wute jin naꞌbꞌal. Jix ja wil tzet utbꞌil chi wute waon oc jin cꞌul yin Naj Kaawil. Jix ja wil pax jin mimancꞌulal. Jix ja wil pax jin camcꞌulal. 11Yetoj pax oj, jix ja wil jin tecꞌanil xol tzet chi ale oc wibꞌan, cꞌal wanojxa tzet chi wabꞌ syaꞌil. Ja wotajxa tol caw jix jin etnele yet jix jin ecꞌ bꞌey conobꞌ Antioquía, yetoj bꞌey conobꞌ Iconio, cꞌal bꞌey Listra. Miman syaꞌilal ecꞌ wilnaj bꞌey wan conobꞌ tuꞌ, scolnaj jin pax el Naj Kaawil yul skꞌabꞌ masanil. 12Yal cꞌal mac chi yoche tol watxꞌ chi yute sbꞌeybꞌal, jaxca tol chi sjunbꞌane sbꞌa yetoj Cristo Jesús, caw yel ey tzet oj ale oc yibꞌan yu ebꞌ yet animail. 13Jal ebꞌ cꞌam swatxꞌil sbꞌeybꞌal xin, cꞌal ebꞌ etnem ánima, oj tojcan ebꞌ xol tzet man watxꞌoj. Chi yetne ebꞌ junoj mactxequel, catuꞌ chi etnele pax ebꞌ. 14Jal jaach, jaach tiꞌ xin, tecꞌan cꞌal cha wute ja waon oc ja cꞌul yin wan cuybꞌanile cuybꞌilxa ja wu, yutol xax ja waoc ja cꞌul yin wan tuꞌ. Ja wotaj pax mac jix jaach cuyon can yin. 15Yin tax cꞌal ja yaliẍal jix cꞌoli ja cuyon an slibro Dios. An chi akꞌon jelanbꞌoj cu naꞌbꞌal, yet watxꞌ chi cu colchai, yet chi kaon oc cu cꞌul yin Cristo Jesús. 16Jaꞌ Dios jix akꞌon tzꞌibꞌele An Juun bꞌey ey can skꞌane. Watxꞌ An Juun yin cu scuyoni. Watxꞌ An Juun yin cu stenchaneni. Chi Waꞌxi oc cu naꞌbꞌal yu An Juun. Chi cu scuy An Juun tzet chi kute cu jichlonen oc cu bꞌeybꞌal. 17Jaxca ton tiꞌ yopiso An Juun Tzꞌibꞌebꞌilcanoj, yet watxꞌ tzꞌajan chi naꞌcha el ku, cꞌal skeꞌon ku kunen yochwan Dios, jaon yet jon xa tiꞌ.
Currently Selected:
2a Timoteo 3: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.