1 Tesaronika 3
3
Haga Myẽꞌym 3
Pauru Tipoꞌoro Timoteu Tawa Tesaronika Kape Ipiok Hamo
1Karãpe yt urutuwat kuap i ehowawiat pote pyno uruipoꞌoro Timoteu ihaꞌat ehowawiat hamo are aikotã eweikupteꞌen hap kuap hamo uruehatꞌat kahato hawyi. Uruipoꞌoro miꞌi pykai uruto urutukupteꞌen tawa Atena pe. 2Miꞌi hawyi uruekatuwy Timoteu uruipoꞌoro ehewowi Iesui ehay etiat urupotpap hap moherep ehepiat hamo katupono Tupana eropat hat kahato Timoteu aiꞌewywuat sese. Miꞌi uruipoꞌoro pote eimoehãite kahato ehepiat imohey hap upi. Yt uruikyꞌesat i eihep imohey hap kaipyi hoꞌopot hap. 3Katupono Iesui mohey raꞌyn ahepiat pote iꞌatumikyryꞌi kahato miitꞌin ahete miꞌi pykai Tupana yt tipyhyp hin i katupono miꞌi hap kaipyi aikuap pywuat tomohey hap sese iꞌewyte yt tokyꞌe i haria kuap hamo. 4Saꞌawyꞌi urutukupteꞌen eiwywuat turan -Tuut aru ehepiat hoꞌopot hap urutoꞌe. Miꞌi hawyi putꞌok e raꞌyn ehete uruꞌe hap ewy. Koitywy ewehãꞌãg naꞌyn iꞌewyte eweikuap taꞌyn miitꞌin mikyryꞌi ehetiat hap. 5Saꞌawyꞌi tawa Atena pe areineꞌen turan ehewowi yn uiwanetup hap. Wẽtup eꞌat pe haty kahato uhete katupono yt atikuap i aikotã som eweikupteꞌen hap. Miꞌi hawyi yt ahupit kuap i raꞌyn mesuwat haty hap hawyi atipoꞌoro Timoteu iꞌatuepiat imohey hap kuap hamo are sio ahiag iꞌatuiãꞌãg moityꞌi hawyi imohey hap pun haria wo raꞌyn tukupteꞌen hawyi uipotpap hap topyhuꞌat yt kat hamo i hap kuap hamo atipoꞌoro Timoteu.
6Mio tã are turan Timoteu putꞌok e raꞌyn uruete. Miꞌi hawyi sehay wakuat kahato tohenoi uruepe ehetiat -Taꞌi sakpoꞌe te taꞌatumohey hap e. Taꞌi Tupana kyꞌe hap te toineꞌen itote e. Aikyꞌe hap wuatꞌi eꞌat piat toineꞌen ne e. Iꞌatuehatꞌat kahato te ti aikyꞌewi e. Taꞌatukyꞌesat kahato teꞌeraꞌakasa ahowawiat hap e aikotã saꞌawyꞌi aito ahehatꞌat iꞌatukyꞌewi hap ewy e Timoteu uruepe ehehay tohenoi. 7Miꞌi hawyi urusatyꞌi hap tuweityk taꞌyn uruete. Waku sakpoꞌe taꞌatumohey kahato te urutoꞌe. Miꞌi hawyi yt uruhoꞌopot kahato i raꞌyn katupono Timoteu mienoi ehetiat urumowepiit kahato. 8Pyno Iheg me kahato o eweikupteꞌen imohey hap ete. Miꞌi tupono waku pe eweikupteꞌen maꞌato yt pote yt uimowepiit hin i. 9Miꞌi hap uruikuap hawyi poꞌog poꞌog urutuwehum Tupana ete -Waku kahato En urutoꞌe katupono tawa Tesaronika piaria emohey kahato te waku kahato urutoꞌe. 10Tupana urupowyro o miꞌiria kapiat uruꞌakasa hamo urutoꞌe katupono urutuwat teran i raꞌyn emohey haria yt ihãite i te rakat moehãite hamo urutoꞌe aat kaꞌap Tupana pe. 11-Uruꞌywot uruhẽtup urukaꞌiwat Iesui set upi etum o uruepe muap mekewat Tesaronika kapiat uruwat hamo urutoꞌe Tupana pe. 12Uruiꞌatukyꞌe kahato eipe. Miꞌi hap ewy atikyꞌesat eiwoꞌope eiwoꞌokyꞌe hap miꞌi pote ahẽtup Tupana pe -Etiꞌatumoesaika o poꞌog poꞌog Iesui mohey haria ekyꞌe poꞌog hamo iꞌewyte iraniaꞌin atukyꞌe hamo are. Miꞌi hap ti ahẽtup Tupana pe ehupi. 13Eiwoꞌokyꞌe kahato pote Tupana eimoesaika wakuat nug hamo aikotã toꞌowywuat hamo. Miꞌi pote ti aru karãpe Tupana tuut Tosaꞌyru wywo teropat haria wywuat turan ehewaku kahato hap toipuẽti eikai katupono miitꞌin kyꞌe kahato haria eipe pote. Miꞌi hap uruikuap taꞌyn uruto Pauruꞌin.
Currently Selected:
1 Tesaronika 3: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.