Fa‘ata‘oto 4
4
O le Apoapoa‘iga ‘ina ‘ia Sā‘ili le Poto
1Fa‘alogo mai ia, ‘outou le fānau e,
i le a‘oa‘o atu a le tamā ma ua‘i mai o ‘outou taliga ‘ina ‘ia fa‘aatamamaiina ‘outou.
2Auā ‘ou te avatu ‘iā te ‘outou le poto e lelei;
‘aua ne‘i tou tu‘ulafoa‘i i la‘u ‘upu e a‘oa‘o atu.
3Auā o a‘u nei, o le atali‘i o lo‘u tamā, o le pele to‘atasi a lo‘u tinā.
4Na ia a‘oa‘o mai ‘iā te a‘u ma na fai mai ‘iā te a‘u,
“‘Ia tāofi a‘u ‘upu i lou loto, ‘ia tausiusi i a‘u poloa‘iga ‘e te ola ai.#Levi 18.5; 1 No 28.9; Isai 55.3
5‘Ia maua le poto, ‘ia maua le atamai;
‘aua ne‘i galo ‘iā te oe o nei mea;
‘aua fo‘i ne‘i e liliu ‘ese i ‘upu a lo‘u gutu.
6‘Aua ‘e te lafoa‘i ‘iā te ia, ‘ona tausia lea o oe e ia;
‘ia e alofa ‘iā te ia, ‘ona leoleoina lea o oe e ia.#2 Tesa 2.10
7O le poto o le mea sili lea, ‘ia maua le poto;
o mea uma ‘e te maua ia maua mai ai le atamai.
8‘Ia e vivi‘i ‘iā te ia, ‘ona fa‘aeaina lea o oe e ia;
na te fa‘amamaluina oe pe a e fusi ‘iā te ia.#1 Samu 2.30
9Na te avatu le pale matagofie i lou ulu;
o le paleali‘i lālelei na te foa‘iina atu ‘iā te oe.”
10Fa‘alogo mai, lo‘u atali‘i e, ma e talia a‘u ‘upu,
‘ona fa‘ateleina ai lea o tausaga o lou olaga.
11‘Ou te fa‘asino ‘iā te oe le ala o le poto;
‘ou te ta‘ita‘iina oe i ala sa‘o,
12A e savali e lē fa‘alavelaveina lau la‘asaga;
a e momo‘e ‘e te lē tausuai.#Sala 18.36; Fa‘ata 3.23
13‘Ia e tāofi mau i ‘upu e a‘oa‘oina,
‘aua ne‘i tu‘uina atu; ‘ia e leoleo i ai; auā o lou ola lava lea.
14‘Aua ‘e te alu i le ala o ē agasala;
‘aua fo‘i ‘e te ui i le ala o ē fai amio leaga.#Sala 1.1
15‘Ia e fa‘amamao i ai, ‘aua ne‘i ui atu i ai,
‘ia e ‘alo ai ma alu ‘ese.
16Auā latou te lē momoe, se‘i ‘iloga ‘ua latou faia se mea leaga;
‘ua ‘ave‘esea fo‘i o latou moe, pe ‘āfai latou te le‘i fa‘atausuaiina nisi.#Sala 36.4
17Auā ‘ua latou ‘a‘ai le areto a le agasala;
‘ua latou inu fo‘i le uaina a le sauāga.
18A o le ala o ē amiotonu, e tusa ia ma le malamalama o le ao,
o lo‘o tupu pea lona malamalama e o‘o i le totonu o le la.#Iopu 11.17; 22.28; Sala 84.7; Isai 62.1; Tani 12.3
19O le ala o ē amio leaga e tusa lea ma le pogisā;
latou te lē iloa le mea latou te tausuai ai.#1 Samu 2.9; Iere 52.9-10; Iere 23.12; 1 Ioane 2.10
20Lo‘u atali‘i e,
‘ia e fa‘alogo mai i a‘u ‘upu;
‘ia ua‘i mai ou taliga i mea ‘ou te fai atu ai;
21‘aua ne‘i te‘a ‘ese ia mea i ou mata;
‘ia e tausi i ai i totonu o lou loto;
22auā o ia mea o le ola lea i ē ‘ua maua;
ma le mea e mālōlō ai o latou tino uma.#Teu 32.47; Fa‘ata 8.35
23‘Ia sili ‘ona leoleoina o lou loto i le leoleoina o mea uma;
auā e tupu mai ai le amio.
24Tu‘u ‘ese ‘iā te oe le gutu fa‘api‘opi‘o ma laugutu fa‘atu‘i‘ese,
‘ia mamao ia ‘iā te oe.
25‘Ia va‘ai sa‘o ou mata i ou luma ma ou laumata,
‘ia fa‘asagatonu ia i ou luma.#Epe 12.2
26‘Ia mafaufau i le ala o ou vae;
‘ona fa‘atumauina ai lea o ou ala uma.#Epe 12.13; Fa‘ata 5.6, 21
27‘Aua ne‘i afe i le itū taumatau po o le itū tauagavale;
‘ia ‘alo ‘ese ou vae i le leaga.
Currently Selected:
Fa‘ata‘oto 4: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.