1 Jṉ. 2
2
Jesukrístu Yusan áujturmaitji
1Yus shuartiram tunaanum iniaara̱i̱rum tusan ju̱ papí áateajrume. Túrasha Yus shuar yajauch túramtaiṉkia ii Aparí̱i̱n iin chichamprútma takakji. Nuka Jesukrístuiti. Nisha nekasa nuja̱i̱ métek ayamprutmaitji. 2Jesukrístu ii tunaari̱n asakártaj tusa jarutramkamiaji. Túrasha aya íiniunkechu antsu ashí shuara tunaari̱n asakártaj tusa jarukmiayi.
3Yus tana nu umirkurkia nuikia Yus nekas nékaitji. 4Tura shuar “Yusan nékaitjiai” táyat Yus tana nuna umirchakka wáitrawai. Nekasa nuka ni enentái̱n atsawai. 5Antsu shuar Yus tana nuna umireakka Yusan ti shiir aneawai. Túrakur Niji̱a̱i̱ tsaniṉkiar pujamu nékaji. 6“Yusja̱i̱ tsaniṉkia wekaajai” tana nú shuar Jesukrístu wekasamia núnisaṉ wekasatniuiti.
Yamaram akupkámu
7Yatsuru, yamaram akupkámun áattsujrume. Áyatik yámankamtaikniumia̱ antukmiarum nunak tájarme. Ashí atumín jintintiámu yaunchu akupkámuiti. 8Túmaitiat nekas yamarma áitkiasnak áateajrume. Nu akupkámun Krístusha nekas iniakmasmai. Atumíincha nu akupkámu nekas paant awajsamuiti. Nuja̱i̱ kiritin meṉkaatemka asamtai tura nekas tsáapniṉkia paant tsáapnirtasa pujakui nu akupkámun ataksháa áateajrume.
9Shuar “tsáapninium pujajai” táyat chíkich Yus shuaran nakitiakka tuke kiritniunam wekaawai. 10Yus shuaran aneana nu nekas tsáapninium pujawai. Nisha iniaatsuk chikichnasha yajauch túramun aju̱a̱rchamniaiti. 11Tura shuar chíkich Yus shuaran nakitiakka kiritniunam tuke wekaawai. Tura kiritniunam iimiu asa itiuraani̱ wea nuna nékatsui.
12Uchitirmincha, Jesukrístu jakamuja̱i̱ atumí tunaarí̱ tsaṉkurnaru asakrumin ju̱na áateajrume. 13Úuntirmincha yámankamtaikniumia̱ tuke pujuuya nu nekáa asakrumin ju̱na áateajrume. Úuntmarutirmincha iwianchi uuntri̱ nupetka asakrumin ju̱na áateajrume.
Uchitirmincha, Yus Apa nekáa asakrumin áateajrume. 14Úuntirmincha yámankamtaikniumia̱ tuke pujuuya nu nekáa asakrumin ju̱na áatjarme. Úuntmarutirmincha atumí enentái̱ji̱a̱i̱ Yus chicham umirkarum kakaram asarum íwianch nupetka asakrumin ju̱na áatjarme.
15-17Aya aentsnumia̱ ana nu yakiya̱nchuiti. Apa Yus súsachuiti. ¿Warimpiait nu? Ju̱i̱ti, ame aya̱shim wakerana nusha ame iisam takustaj támena nusha tura naṉkamantu ajastin. Nuka ju̱ nuṉkanmaya̱ áiniawai. Shuar aya nunak wakerak Yúsnaka aneatsui. Kame ju̱ nuṉkasha amuukattawai. Ashí nu wakeruktincha ti nekas amuukattawai. Túrasha shuar Yusa wakeramuri̱n umíana nu tuke iwiaaku pujustatui Yusja̱i̱. Nu asamtai atumsha ju̱ nuṉkanam ana nu pachikiairap. Tura aya ju̱yá̱ ana nu aya tákustin enentáimsaip.
Nekas chicham tura wait chicham
18Uchiru, amuukatin tsawant jeatémayi. Atumsha Kristu nemasri̱ tátin antukuitrume. Yamaikia untsurí Kristu nemasri̱ wantinkiarmatai amuukatin tsawant jeatémayi. 19Nusha ii we̱a̱k ármayi. Túmaitiat nekas Yus shuar ácharmayi. Nekas Yus shuar áiniaka tuke iiji̱a̱i̱ irunar pujuara̱a̱yi. Tura jíinkiarmatai nekas Yus shuarcha ainia nu paant nekanamniaiti.
20Antsu atumniaka Yusa Shiir Wakaní̱n Kristu suramsamtai ashí paant nékarme. 21Nékachuitrume tu enentáimkiun áattsujrume. Antsu nekas chicham ana nu neka asakrumin paant áatjarme. Wáit chichamsha nekas chichamsha peṉké nushaachuk ainia.
22Wáitrin ju̱i̱ti. Jesusan “Yus anaikiamunka Krístuchuiti” tana núiti. Núiti nekas Kristu nemasri̱. Yus Apancha ni Uchirí̱ncha nakitia asa Kristu nemasri̱nti. 23Yusa Uchirí̱n nakitiáinia nu Yus Apaja̱i̱sha tsaniṉ pujatsui. Tura Yusa Uchirí̱n shiir awajea nu, Yus Apaja̱i̱sha tsaniṉ pujawai.
24Yámankamtaikniumia̱ antukmiarum nu atumí enentái̱n pujurtamsati. Nu túrakrum atumsha Yusa Uchirí̱ji̱a̱i̱sha Yus Apaja̱i̱sha tuke tsaniṉkrum pujustatrume. 25Jesukrístusha Niji̱a̱i̱ tuke iwiaaku pujustinian tsaṉkatramkaitji.
26Anaṉkartin írunkui ju̱na áatjarme. 27Atumniasha Jesukrístu Yusa Shiir Wakaní̱n suramsakrumin, nú Wakan tuke pujurtamkurmin shuar jintintrámatin atsumatsrume. Antsu Yusa Wakaní̱ ashí jintintramprume. Ni jintintrammasha imiá nekas asa wáitchaiti. Tuma asamtai Ni jintintramna áintsarum Krístuja̱i̱ tuke tsaniṉkrum pujustarum.
28Yamaikia uchiru, Krístuja̱i̱ tuke tsaniṉkrum wekasatarum. Nu túrakrikia Ni támatai natsamtsuk ti shiir iṉkiunaiktatji. 29Atumsha Jesukrístu tí peṉkera nu nékarme. Núnisaṉ ashí shuar péṉkeran túruinia nuka Yusa uchirí̱ áiniawai. Nusha nekaatarum.
Currently Selected:
1 Jṉ. 2: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.