San Mateo 26
26
Lëë xaa xñabey chakladzy kuty Jesús
(Mr. 14:1‑2; Lc. 22:1‑2; Jn. 11:45‑53)
1Loxsye ngo lëë Jesús chëb lo xpëëdscuel:
2—Nan do gon nii schopak kpidz chak falt parñee kak paskw, aan lëë meñ jkëë mguiy nii pxaal Dios lo crusy.
3Leñ tse go gak lëë xaa nii xñabey lo pxosy ni lëë xaa kol nii xñabey lo meñ Israel ptyop chilidzy Caifás. Lëë Caifás nak xaa nii mastre non lo pxosy. 4Lëë xaa bitiits dyon xa kñaasy xaa Jesús tsiin kuty xaa xaa. 5Per lëë gak xaa chëb:
—Kñaasty no xaa na lni parñee kak nxoldy meñ.
Lëë tu kwnaa xchoob aceit nii xlyaa nex lo kik Jesús
(Mr. 14:3‑9; Jn. 12:1‑8)
6Lëë Jesús so Betania, aan lëë xaa kwey lidzy Simoñ nii byodz lady. 7Lëë Jesús sobyaw tsiñee lëë tu kwnaa ptsiñ noy tu bot aceit nyazh nii xlyaa nex, aan lëë me pchoob aceit xlyaa nex ko lo kik Jesús. 8Per lëë xpëëdscuel Jesús blëë, aan lëë xaa chëb:
—¿Penak nii lika kwxiñ aceit ke? 9Nchilo ndyow par kak meñ prob yudar.
10Lëë Jesús biñ nii nchenee xaa, aan lëë Jesús chëb:
—Klëëdy to lo kwnaa re, por tu buen beeñ me. 11Ni tugak kaa kan do meñ prob, per naa lëdy tugak kan do naa. 12Lëë kwnaa re kwtëëb aceit nii xlyaa nex ladyaa parñee tsel xixkwaa xcuerpaa tse nii lëën jkyeetsy. 13Nli xñen nii kchë laañee kluuy meñ xtiits Dios, lëë meñ kseety nii beeñtsyey kwnaa re, aan singo mod lëë meñ ksaladzy me.
Lëë Judas xyub dyon xa kyab Jesús ña xaa xñabey
(Mr. 14:10‑11; Lc. 22:3‑6)
14Lëë tu xpëëdscuel Jesús nii pcholë Judas Iscariote kukëb lo xaa nii xñabey lo pxosy:
15—¿Pa lal kizh to naa deelñee jkon Jesús ña do?
Lëë xaa xñabey go ptee kalyptsii pes plat. 16Aan destye wor go lëë Judas kwëkyub dyon xa jko xaa Jesús ña xaa xñabey.
Lultime paskw nii kwte Jesús ksa xpëëdscuel
(Mr. 14:12‑25; Lc. 22:7‑23; Jn. 13:21‑30; 1Co. 11:23‑26)
17Tse nii chislo lni nii xtyaaw kyaxtily nii xkyëdy levadur, lëë xpëëdscuel Jesús big aan lëë xaa chëb lo Jesús:
—¿Pa kyokuuñloo noo nii tyaaw xtsee no na paskw?
18Lëë Jesús chëb:
—Kol tsi lidzy tu xaa nii kxalaa lëë do aan kol këb: “Lëë maestre në nii lëë xwor xaa kutsiñ, aan lëë xaa kiid ksa xpëëdscuel xaa parñee tedy xaa paskw liidzyoo.”
19Lëë xpëëdscuel Jesús kwey, aan lëë xaa beeñlo nii ktyaaw paskw.
20Tsiñee lëë lyu pkyey, lëë Jesús kwsob lo mezh ksa xpëëdscuel. 21Aan mentre ncheyaw xaa, lëë Jesús chëb:
—Nli xñen nii misme tu do kakniladzy naa.
22Kchësy xpëëdscuel xaa pteenë, aan lëë xaa bislo tuga xaa xñabtiits, xñee xaa:
—¿Pe lëdy naaw?
23Tsigo lëë Jesús chëb:
—Xaa nii noyaw leñ tu kyonaa, xaa go kakniladzy naa. 24Lëë mguiy nii pxaal Dios te kchë kyalnë nii kë leñ kitsy nii kë xtiits Dios. Per ¡brobsye xaa nii kakniladzy xaa! Masy buen nyi xaa go nyaldy xaa.
25Tsigo lëë Judas, xaa nii kukëb lo xaa xñabey xa jkaa Jesús chëb:
—Maestre, ¿pe lëdy naaw?
—Misme chuwoo pchoow —chëb Jesús.
26Lëë Jesús kwxeñ tu kyaxtily, aan loxsye pteedy xaa skizh lo Dios, lëëw kwtiisy xaa lo xpëëdscuel xaa, chëb xaa:
—Kol kaawoo, xcuerpno.
27Ni lëë xaa kwseñ tu vas nii no viñ, aan loxsye pteedy xaa skizh lo Dios, lëëw pteeso xaa lo xpëëdscuel xaa, chëb xaa:
—Kchësy to, kol ki viñ re, 28por tu cheñno. Lëëw kxee parñee ktsily Dios xtol meñ. 29Ni kidre gaan viñ, sink lëën kwës axte nii klyañ do laañee xñabey Tat Tios tsiin tyow no viñ kub nii no siko.
Lëë Pedre këb nii xyuumbeydy Pedre Jesús
(Mr. 14:26‑31; Lc. 22:31‑34; Jn. 13:36‑38)
30Loxsye biily Jesús ksa xpëëdscuel, lëë xaa si kiy nii lë Olivos. 31Siko lëë Jesús chëb:
—Kchësy to ksaan naa na kyool. Por leñ kitsy nii kë xtiits Dios xñee nii lëë xaa kuty xaa nii xkyë lo mëkwxiily aan lëë mëkwxiily kchoots klyaal. 32Per tsiñee lëën kpañ, kloon ka Galilea lo do.
33Tsigo lëë Pedre chëb:
—Nikxe kchësy xcombañeraa ksaan lii, per naa ksandyaa lii.
34Lëë Jesús chëb:
—Na kyool kazh tson vuelt këëboo nii xyuumbeydyoo naa antes nii jkwetsy nguidy kol.
35Lëë Pedre chëb:
—Nikxe kety no tusyke, këbtyaa nii xyuumbeydyaa lii.
Aan kchësy xpëëdscuel xaa chëb singo.
Lëë Jesús chutiitsni Dios laañee lë Getsemaní
(Mr. 14:32‑42; Lc. 22:39‑46)
36Tsiñee lëë Jesús ptsiñ tu laañee lë Getsemaní, lëë xaa chëb lo xpëëdscuel xaa:
—Kol sob nu, mentre lëën kakutiitsni Dios.
37Lëë xaa sini Pedre ni chop xiñ Zebedeo, aan lëë xaa pteenë, 38ni lëë xaa chëb:
—Mban xtee styoon. Kol kwës nu dyon, aan kol kwena.
39Lëë Jesús si par kaan, aan loxsye psoxib xaa ni pkiitsy kë xaa lyu lëë xaa chëb:
—Tat Tios, pteelaa naa lo kyalnë re, per kuuñtsyeydyoo nii chakladzyaa, sink beeñtsyey nii chakladzyoo.
40Tsi lëë xaa ptsiñ laañee psaan xaa ksa tson xpëëdscuel xaa nii kuni xaa, lëë xaa nche nixyesy. Por ngo lëë xaa chëb lo Pedre:
—¿Pe ni tu wor nawen pchilody ngwena do? 41Kol kwena ni kol kutiitsni Dios parñee jkaaldy xaatox to, por ndaan no styoo do, per lëë lady to mban now.
42Lëë xaa kwey stub, aan lëë xaa chëb:
—Tat Tios, deelñee no nii teedyaa lo kyalnë re, beeñtsyey nii klyañ styool.
43Tsiñee lëë xaa bikche, lëë xpëëdscuel xaa nche nixyesyak, porñee xekwtre xaa mgaal aan lika xtiib lo xaa. 44Lëë xaa si stub. Lëë gaaw byon vuelt, aan misme tiits nii chëbak xaa klo chëb xaa lo Dios. 45Tsi lëë xaa bikche, lëë xaa chëb lo xpëëdscuel xaa:
—¿Pe bii nche nixyesy to nawen ni nche kxiladzy to? Lëëw na, lëë wor kutsiñ nii lëë mguiy nii pxaal Dios jkaa ña meñ ngoptol. 46Kol tsische tsiin kyoo no, por lëë xaa nii jko naa ña xaa xñabey sëëd kexle.
Lëë meñ xñaasy Jesús
(Mr. 14:43‑50; Lc. 22:47‑53; Jn. 18:2‑11)
47Lëë Jesús bii nonee tsiñee lëë tu xpëëdscuel xaa nii pcholë Judas ptsiñ ksa tubtsoon meñ nii noy spad ni yag. Lëë xaa nii xñabey lo pxosy ni lëë xaa kol nii xñabey pxaal kchë meñ go. 48Lëë Judas chëb kazh lo meñ go:
—Xaa nii nagon kawaa tu pxit kwesy, xaa gow. Kol naasy xaa.
49Lëë Judas pkëëptyux Jesús, ni lëë xaa ptee tu pxit kwesy Jesús. 50Loxsye ngo lëë Jesús chëb lo Judas:
—Deelñee pe cos tsiiñ sëëdoo, klyëëdyoo beeñtsyeyo.
Tsigo lëë meñ kwnaasy Jesús aan lëë meñ biy xaa.
51Tsiñee kon tu xaa nii no xlad Jesús ngo, lëë xaa kwlii xispad xaa aan lëë xaa pchug tu tyag xmos xaa nii xñabey lo pxosy. 52Per lëë Jesús chëb:
—Psoob xispaadoo xlugaro. Porque kchësy meñ nii xtily con spad, kety con spad. 53¿Pe nandyoo nawen nii deelñee kakladzyaa schilo kñen lo Tat Tios parñee kxaal xaa tub yox xangly xaa kla naa? 54Per deelñee kñen lo Tat Tios parñee kteelaa xaa naa, ¿xa kak cumplir xtiits xaa tsigo?
55Loxsye ngo lëë Jesús chëb lo meñ:
—¿Penak nii con spad ni con yag sëëdnaasy to naa nyak xaa ngbaan? Ksatyee tse kwson leñ lidzy Dios beeñ ksedyaa meñ aan penak nii kwnaasty to naa. 56Per lëë do chuuñtsyey nrii parñee kuñ do cumplir nii kwnee kchë profet nii biid penaadle.
Loxsye ngo so gak Jesús lëë xpëëdscuel xaa pxooñ.
Lëë Jesús so lo xaa xñabey
(Mr. 14:53‑65; Lc. 22:54‑55, 63‑71; Jn. 18:12‑14, 19‑24)
57Lëë meñ kuni Jesús lidzy pxosy nii mastre non nii lë Caifás. Siko nche mbës maestre ley ni kchë xaa kol nii xñabey. 58Lëë Pedre kunal sit sit, per lëë xaa ptsiñ axte lo xley Caifás aan lëë xaa kwsob lady xaa nii xkyënap lidzy Dios parñee kan xaa dyon pe cos kuñ meñ Jesús.
59Lëë kchë xaa nii xñabey lo pxosy ni lëë xaa non kwëkyub dyon pe cos jkëëkiy xaa Jesús parñee kchilo kñab xaa kety Jesús. 60Ndaly meñ kwnee contre Jesús, per ptsyoldy xaa xñabey pe cos nguëëkiy xaa Jesús. 61Singo nche xaa tsi lëë schop xaa chëb:
—Ptsyon noo kwnee xaa gue nii lëë xaa knitylo lidzy Dios, aan tsonak kpidz me lëëw ksaa xaa stub.
62Tsigo lëë xaa nii mastre non lo pxosy kuso, aan lëë xaa chëb lo Jesús:
—¿Penak nii xñeedyoo? ¿Pe nli kchë nii xkëëkiy meñ re lii?
63Per koñee kwneedy Jesús. Por ngo lëë xaa nii mastre non lo pxosy chëb:
—Pkon Dios loo noo dyon, nii nli lii nak Crist nii no kxaal Dios.
64Tsigo lëë Jesús chëb:
—Nliw, naa nak Crist, ni san gaa to naa tsi lëën soob kwi Dios nëzli, ni san do tsi lëën kchukë lo xkey parñee kyelyaa stub.
65Tsiñee lëë xaa nii mastre non lo pxosy biñ ngo, lëë xaa pchos xab xaa, porñee singootyee blëë xaa, aan lëë xaa chëb:
—Tiits ntseeb kwnee xaa re lo Dios, ni ¿pa jkiiñre gaa no meñ nii jkëëkiy xaa? Misme lëë do biñ kchë tiits ntseeb nii kwnee xaa. 66¿Pe në do dyon xa kak xaa?
Tsigo lëë meñ chëb:
—No nii kety xaa, por no xtol xaa.
67Wor go kazh lëë meñ pchoo mxeñ lo xaa ni lëë meñ ptee xcheñ xaa. Aan tsi lox ptee meñ xcheñ xaa, 68xñee meñ lo xaa:
—Deelñee nli lii nak Crist, ¡kwnë dyon cho kwtiñ lii!
Lëë Pedre xñee nii xyuumbeydy xaa Jesús
(Mr. 14:66‑72; Lc. 22:56‑62; Jn. 18:15‑18, 25‑27)
69Lëë Pedre sob lo ley, tsiñee lëë tu kwnaa nii xkyë tsiiñ siko chëb lo xaa:
—Wil lë no xlad Jesús Galilea.
70Per lëë Pedre chëb:
—Nandyaa pe xñeel.
71Loxsye ngo lëë Pedre kwey chu puert nii kë chu nëz, aan lëë stu kwnaa kon xaa aan lëë me chëb lo meñ:
—Wi meñ gue no xlad Jesús Nazaret.
72Per lëë Pedre pkon Dios chëb:
—Xyuumbeydyaa xaa gue.
73Kok xtsedyako, lëë xaa nii nche siko big lo Pedre aan lëë xaa chëb:
—Nli gaa na wil lë no xlad Jesús, por si xñeepee xaa xñeel.
74Tsigo lëë Pedre pkon Dios stub chëb:
—Xyuumbeydyaa xaa gue.
Aan wor go kazh lëë tu nguidy kol pkwetsy. 75Lëë Pedre gaa psaladzy nii lëë Jesús chëb: “Tson vuelt këëboo nii xyuumbeydyoo naa antes nii jkwetsy nguidy kol.” Lëë Pedre pchoo siko aan lëë xaa biiñ.
Currently Selected:
San Mateo 26: ztq
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.