Proverbios 23
23
1Da ivita da 'arquia'axaua ca sallaxanec,
qalaq 'auaỹamaxatchiguiñi da 'arhuennataxac
da 'auatato'ot camaye.
2Na'aictaxa da ỹataqta huo'o na 'arqouaxa,
qalaxaye ỹataqta 'ana'añaxateguet,
3qataq saishet da 'auqopitta'a ne'ena no'on nallec,
cha'aye ishet da choche 'am ipe'etaqchet.
4Saishet qome da ỹapaguec da 'arhuogoxo da 'anshetaique da 'am sallaxanec,
saishet da 'aỹa'agaqnauec de'era 'arhuennataxa.
5Cha'aye da ỹoqta 'aumeteeta damaye,
nache ishet da 'aula'a da qaica de'era nsallaxa,
cha'aye damaye ỹataqta sa ilaua'ague da jec,
'eco' da huo'oi naua laua't 'eeta'am na vi'ic da huaỹo.
6Saishet da 'auqui'iỹa'ai' ca shemataqaic,
qataq saishet da 'auqopitta'a na no'on aloq,
7cha'aye namaye 'eeta'am ca qoue da huetangui ana nqoichiqui,
cha'aye camaye 'am iỹaxana da 'arquia'axaua qataq 'anỹomaxaua,
qalaxaye saishet da ỹoqta 'eesa da lhuennataxa,
8cha'aye da ime, nache ishet da 'auanolec cam qollec,
nache deqat na no'on 'ara'aqtacpi
nache qaica ca naigui.
9Saishet qome da 'aua'axaỹaqchetec
ca 'ara'aqtac ca qaica ca ỹaỹaanapec,
cha'aye camaye ishet da choche ỹe'eeta'ape
naua ỹaanaxanaxaiqa 'ara'aqtaqa.
10Saishet qome da 'anqochenaxat
ana togoshaapec na'anaxanaqtepi,
qataq saishet da 'anamataxaalec
da 'auacona ca na'alhua ca qaicaua caua lta'al,
11cha'aye Ñim mpaxattalec namayepi ỹataqta 'añaxaic,
qaq Ñimaye ishet da 'am dataỹa'aguet da iueelec namayepi.
12Qaq ỹoqo'oye 'oxotoigui añi 'arquiyaqte da napaxaguenataxanaxac,
qataq 'auachaigui ye 'antoonaxac da nauattonaxanaxac.
13Saishet da 'aỹa'axaañi da 'auapaxagueetac ca nsoqolec,
cha'aye na'aictaxa da qalota da qaiuaxan
qalaxaye saishet da ileu,
14ỹoqo'oye da 'aurolec ca sansatta nhuaxanaguec,
nache ishet da 'anca'alaxateeguesop da nleuaxa.
15'Am ỹalcolec, qom ivita da 'am ỹaanaxanaxaic,
nache nataqa'en aỹem ỹataqta lta'araic qome da ñetonaxac.
16Ỹataqta lta'araic da ñetonaxac,
qom sa'axaỹa da ỹaỹamaqchiyiñi naua 'artaxaỹaxaco.
17Saishet qome da 'anquiỹatega na 'etaxaloxoicpi,
nachaqrato' da huo'o naq 'enec 'anqa'en Ñim Nataxala',
18'auennata'a qome da 'aỹa'ague,
yaqto' da 'anaquitaxac saishet da nlaguiñi.
19'Am ỹalcolec, ỹataqta 'ana'axaỹaxan qome
yaqto' 'am ỹaanaxanaxaic,
qataq 'alotegue da no'on ñecỹaxac.
20Qataq saishet qome da 'aualecta'aguet
na nỹomtapigui na lataxa,
qataq na sa ỹala'ac da lquia'axac,
21cha'aye na nỹomaxaicpi qataq na sa ỹala'ac
da lquia'axac taỹa'a da ỹataqta choxoraq,
qataq ca hualaic ivitta'a da ỹaatañi ca pannaxaic.
22Ỹataqta 'aualaxaguet ca 'arta'a maye 'am lo'onatac,
qataq saishet da 'auo'otan aca 'arate'e qom mashe ỹa'axaina'.
23'Anmitaique qome da 'eesa lataxac, naỹaanec,
napaxaguenataxanaxac qataq da nauattonaxanaxac,
¡qalaxaye saishet qome da 'aumen!
24Ca lta'a ca ñalec no'on da lataxac qataq ỹaanaxanaxaic,
camaye ỹataqta huo'o da ntonaxac qataq machiguiñi,
25¡qaq ỹoqo'oye 'auo'otec qome da ỹataqta
machiguiñi ca 'arta'a qataq aca 'arate'e
qataq 'auo'otec da lamaicỹaxac aca 'am lo'onatac!
26'Am ỹalcolec, ỹataqta aỹem 'aualaxaguet qome,
qataq 'aulotelec da 'am sachaxana ỹecỹaxac,
27cha'aye aca 'alo quisheguetaxai
'eeta'am aca qaỹoqchiguingui nshere,
qataq aca ỹaqa'a 'alo 'eeta'am aca sa lcagui nshere,
28qataq acamaye 'eeta'am ca cachaxaic da dauanaxaatac,
nache ỹo'ot da qalota na ỹalleppi na daqat naqa'en.
29¿Negue't ca nque'eteetac? ¿Negue't ca huo'o da nqui'ic?
¿Negue't ca ncotatac qataq ntogottac?
¿Negue't ca choche qaique'emaqchet da qaica ca ỹasouaxat?
¿Negue't ca toiguilo naua la'ai'te?
30Qomye nacheca ca saishet da ỹaxaañi na lataxa,
qataq ỹe'egueeta'ague na ỹotta'a't lataxa.
31Ỹoqo'oye saishet qome da 'aulotagui da ltogaxa ca lataxa,
huo'otaq da chañi da huetangui aca ỹomaxaqui,
qataq da huesotteguet da lamaic da qanỹomigui,
32qalaxaye yem taỹa'a loga't 'eeta'am ca na'araxanaq,
da denagaxan nache yo'oq na lshenataxanaxa.
33Nache ỹo'ot da 'aula'a na ỹoxosa'a,
qataq da 'auennataxan nache 'anasaxarec naua qauema,
34ivira'a naqa'en da 'eco' qouetalec na laiñi aca auaxai,
qataq 'eeta'am da qonetangui aca notaxaqui,
qataq 'eco' qouetasheguemec na lsheenec aca nalloxolate.
35Nache choche qonetac:
«Aỹem qaiuaxaatac co'ollaxa qalaxaye sañanom,
aỹem qaỹalasheetac qalaxaye sañanom,
qalaxaye qom choche ñelouec
nache qaltaq selaique ca lataxa.»
Currently Selected:
Proverbios 23: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.