Génesis 2
2
1Qaq 'era da 'eetec, da ime na piguem qataq ana 'alhua, qataq 'enauac na huetalecpi naamaye. 2Qaq co'ollaq ivita so na'a'q siete, nache Ñim Lo'onatac 'Enauacna, imat nam lo'onatacpi nache nmatec. 3Nache Ñim Lo'onatac 'Enauacna ỹaalec da no'on la'aqtac se'eso na'a'q siete, qataq iỹotauga da yaqto' qaỹo'oxoren Ñimaye, cha'aye se'eso na'a'q huetoigui da nmateeguesop 'enauac na lo'onatacpi.
4Qaq 'era da na'aqtaguec co'ollaq Ñim Lo'onatac 'Enauacna, ỹo'ot na piguem qataq ana 'alhua.
So shiỹaxaua qoỹanalec ye 'alhua le'enaxat Edén
Qaq Ñim Nataxala' co'ollaq ỹo'ottac na piguem qataq ana 'alhua, 5nache saxanaxa co'ollaxa da huo'o aca ñaxat ana qo'oipaq qataq na 'auaqpi, cha'aye Ñim Nataxala' saxanaxa da ỹauo'o ca auot da yaqto' talec ana 'alhua, qataq saxanaqca ca ishet da do'onataxaalec. 6Qaq nachaqnata na 'etaxat da chegoqtapoigui ana 'alhua, nache icottalec 'enauac ana 'alhua. 7Qaq huaña nache Ñim Nataxala', ỹo'ot so shiỹaxaua ỹachegoxotaigui na 'alhua. Ime, nache iquichichiguilo naua nmic lauaco, qataq ỹanem da lca'alaxa. Nache so shiỹaxaua huo'o da lca'alaxa.
8Ime, nache Ñim Lo'onatac 'Enauacna maye Nataxala', ỹo'ot so nanqa' ana nañiguishe, huaigui naqa'en yem 'alhua Edén yem pa'aigue da nala' lliguisheguem. Ime, nache ỹanalec so shiỹaxaua maye lo'onatac. 9Ime, nache ñaxaalec naqa'en 'enauac ana ỹotta'a't no'on qo'oipaq, anam huo'o ana ala maye ishet da qanallec. Qaq na laiñi som nanqa' ana nañiguishepi, qalaq ỹanangui aso qo'oipaq maye chegaqaigui da nca'alaxa, qataq aso qo'oipaq maye chegaqaigui da qaỹauatton da no'on qataq da qauem.
10Qaq so 'alhua maye le'enaxat Edén chegoqchiguiña so tala, qaq somaye cuatro soua la'auaxaco, nache ipettalec so nanqa' ana nañiguishe. 11Qaq so hua'auñi se'eso tala le'enaxat Pisón, somaye imata da coleesop ye 'alhua maye le'enaxat Javilá, yem huaña na oro. 12Qaq nam oro maye huaña yi'iye 'alhua qalaq ỹataqta no'on, nataqa'en huaña na no'on qo'oipaq lcha'q, qataq na no'on coma' maye le'enaxat ónice. 13Qaq so lỹa tala qalaq le'enaxat Guihón, qaq nacheso so imata da coleesop ye 'alhua maye le'enaxat Cus. 14Qataq so lỹa tala qalaq le'enaxat Tigris, maye nacheso som connegue da nala' lliguisheguem yem 'alhua maye le'enaxat Asiria, qaq so lỹa tala qalaq nacheso so le'enaxat Éufrates.
15Qaq Ñim Nataxala', co'ollaq mashe ỹanalec so shiỹaxaua yem nanaxanaqa' maye huaña ye Edén da yaqto' do'onataxaalec qataq ilo'ogue, 16nache ỹanem da la'aqtac, 'eeta':
«'Am ishet da qollec ana ala 'enauac ana qo'oipaqpi maye huaigui na nanaxanaqa', 17qalaxaye nacharata ara qo'oipaq maye chegaqaigui da qaỹauatton ca no'on, qataq ca qauem, saishet qome da qollec ana ala aramaye, cha'aye qom qollec nache 'aleu.»
18Qaq ime nache Ñim Lo'onatac 'Enauacna maye Nataxala' 'enapeco': «Sa ỹaỹamaxañi da 'oonolec da shiỹaxaua. Aỹem so'ot qome ca ntaunaxaua.»
19Nache Ñim Nataxala' ỹachegoxotaigui na 'alhua da ỹo'ot 'enauac na shiguiỹacpi, qataq 'enauac na maỹopi, nache ỹauegueua'a so shiỹaxaua da yaqto' somaye ỹo'ot na le'enaxatpi. Qaq na le'enaxatpi na shiguiỹacpi maye se'eso shiỹaxaua ỹanagui, qaq nachena na le'enaxatpi co'ollaxa. 20Nache so shiỹaxaua ỹauo'o na le'enaxat 'enauac na shiguiỹacpi maye huauec qataq na maỹopi maye huaỹotac, qataq 'enauac na shiguiỹacpi maye ishet da nlopi, qalaxaye namayepi qaica ca taiguet da ntaunaxaua somaye. 21Qaq huaña, nache Ñim Nataxala' ỹasaxalec so lta'araic lo'ochaxa so shiỹaxaua, qaq co'ollaq do'ocheta somaye, nache nqateua'a so 'oonolec lcheshet. Ime, nache qaltaq ỹe'eguelaxatta't na lapat. 22Nache Ñim Nataxala' ỹachegoxotchigui se'eso ncheshet da ỹo'ot aso 'alo. Ime, qaq ỹauegueua'a som ỹale. 23Qaq somaye co'ollaq ila'a asomaye, nache ỹa'alaxalec 'enapeco':
«¡Ana'ana nachana ana maiche ỹapachiyaxaua, qataq maiche ipi'inecỹaxaua! Anamaye le'enaxat qome ‹'alo,› cha'aye Ñim Lo'onatac 'Enauacna ỹachegoxotaigui nam ỹale.»
24Qaq ỹoqo'oye ca ỹale ca'ai qome ca lta'a qataq aca late'e, da yaqto' lmayaxaua aca lhua, nache caamaye 'eeta'am da 'oonolec shiỹaxaua.
25Qaq so ỹale qataq aso 'alo, soomaye huetrauec co'ollaxa, qalaxaye soomaye saishet da ncoqta'ape.
Currently Selected:
Génesis 2: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.