1 Pédrochi 3
3
Unilalacanan, sonalacanan payinunca
1-2Sonalanan tencachique unilalabe mantainola joe. Junni yalachi unilala weyanlari pansile Diosichi fiquica merátuchi timin jotonan, yalachi sonalaca seque nenaminlaca quirato Jesucrístobe cayainilaichunae. Nula sonalari respetaito seque nenaminlaca quirato, nulachi unilalanan pansile cayailaichunae payitusanan. 3Junni moso sonala jono muquilaquinari, jamoleri moso itolajona! Aca jera moso suwan, óroca quica jun win winquin, uraran tsanpa pun, quitori, jamoleri moso jolajochunae. 4Man malon fecáriri moso ilaichunae; junteri poleniichunae.
Nula mantimini uyan tala moso ilaina! Paituto, seque tenca calaquina! Tsanquitori, jamoleri moso itolajochunae; tencabinan moso jolajochunae. Diosiri junca tsara se joe tichunae. 5Matu mate Diosibe penenamin sen sonalari yalachi unilalaca meráminla joto, tsanque moso jominlanue. 6Sara tinun sona tsan jominue matute Abrahanchi sona. Yari Abrahanbe merámin joto, chiqueca mantamin joe tinue. Junni nulari natiya jeleratuto seque nenatori, ya sona cuwenta jolajochunae.
7Unilalanan nulachi sonalaca seque tenca tan nenalarana! Diosi sonalacanan laquirato, yalacanan numatotiya jamochi sonnato polesa carichunae nulaca cuwenta. Jun tenchi sonalaca fe cumana jolajoe tito, yalaca seque cuidailaina! Tsanquitunari, Diosibe rocainasa merátuchunae.
Seque quinun tenchi padeseino jonunca
8Junni jeralelabe man fiquiman pano muquee. Man junni tenca calaquina! Laqui jominlabe pelaquiilaina! Acola tala cuwenta beco beco laquiracaalaquina! Weyanlaca fe joyoe tituto, laquiramin tenca jolajona! 9Seiton quiminlacanan beconan seiton quitulajona! Yucacuraminlacanan beconan yucacuratulajona! Te, uyan quiraque nenalarana! Diosiri nulaca seque quichun cayaisa tie. Junni nulanan uyanlachi tenchinan Diosibe rocainola joe yape yalacanan ticatiya seque quisa. 10Diosichi Pilabi junca itsanque chuteca joe:
Seque pansi sonnano muquinari, tencabe nenalarana! tinue seitonque patuchun.
Nene patulajona! tinue.
11Seiton quinanunca jera telaquepoto, seque nenalarana! tinue.
Pataatuchique tenfelaina!
12Miya Diosiri senlaca sele cuidaichunae.
Tsanque seque nenato yabe rocailainari, meráchunae tinue.
Seitonlaca mantimini paimin joe tinue.
Diosichi Pilabi tsanque chuteca joe.
13Junni seque nenachique tenfelainanari, tsachila nulaca pailaituchunae. 14Junnasanan, pansile seque nenanun tenchi casticaquilaquinari, pansi jolajochunae. Jun tenchi paiminlaca jele tituto, wepanatulajona! 15Jesucrístoca Miya joeque seque tennalarana! Pansile weyanlari nulabe panhalaquichunae ti quichun Jesucrístobe cayailaiyunque. Tsanlatinari, tuca tenca calaquina! niyaque beconan manpano jonunca. Fe joyoe tituto, respetaito, cuenta jera quiniquintsan jochunae. 16Junni Jesucrístoca tenca calaquito, nulaca culpa quituntsanque seque nenalarana! Junni nula Crístochi tsachila joto seque nenaminlaca quirato, epele yucacuraminlari luilaichunae. 17Aman pansile Diosi nulaca padeseiniisa tichunae. Tsan jonari, seiton quinun tenchi padeseitulajona! Padeseinola jotori, seque quinun tenchi padeseilaina! Ya fe se jochunae.
18Jesucrístori jun tsanhinue. Sen jotonan, jerale seitonlachi tenchi puyanue yalachi jutsaca piyarito Diosibe cayaisa carichun. Yachi pucari puyaca josanan, Diosichi Tenca yaca mansoncarinue. 19Junto Diosichi Tencachi mantate doramin puyaca junlaca meracaribi jica jominue. 20Ya puyaca junla matu mate Diosica merátumin jominlanue. Jun mate Diosi yalaca casticaquituto, duque méraminue Noé barco quinasanan. Jun barcobi ochuca tsachilasiri mapiya mate se lolainue. 21Pibi mumunhiminlari jun cuwenta se lolaichunae. Junasanan mumunhinun piri to midicaca cuwenta jutsaca mantsaletumin joe. Mumunhinaminlari Diosibe rocaiminla jochunae culpa iton joyoeque tenhichun Jesucristo mansonhica jonun tenchi. 22Crístori jamochi loto, Apa Diosichi tsa tede nanchi mantato pechue. Junni jerale jamochi nenaminla, anjelilanan, mantá tanlanan, yabe mantaiminla joe.
Currently Selected:
1 Pédrochi 3: cof
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.