Jer 42
42
Xikyma'n xjal te Jeremiy tu'n tna'n Dyos kyi'j
1Eb'jo'k lq'e kykyaqilju' kynejel xjal te q'oj tk'i'xi' Joanan tk'wal Karea, ex Asariy tk'wal Osayiy, ex kykyaqilju' xjal, ch'i'n kyoklen ex nimaq kyoklen, 2tk'etz Jeremiy t-sanjelal Dyos, xikyma'n te:
—Kxel qqani'n jun xtalb'ile' teya, lan kub' t-xk'a'yu'na: Kub'sana twitz Qman Dyos, ju' nnajb'ena te, qi'je'. Nimtoqqe' qb'aj nejtl, atzu'n ja'lo naqtal jte'xtl qb'aje' kse'n ntka'yi'na lu. 3Kub'sana te Qman Dyos ja nnajb'ena'ya tu'n ttzaj tyek'u'n alkye b'e kxel qiq'i'ne', ex titi' kqb'incha'ye', chechij.
4Xitzun ttzaq'we'n Jeremiy kye:
—B'a'n. Chin kub'sale' twitzju' Qman Dyos ati qib'aj, kse'nx saj kyqani'ne' weye', ex kxel nma'nwe' kyeye' tkyaqilju' matzaj ttzaq'we'n weye', mixti'te kb'el wewa'ne', chij. 5Xikyma'ntzuntz te Jeremiy:
—Awtju' Qman Dyos nnajb'ena te tz'ok te jun tziyal axxi'x tu'n tok miltz'uj qi'je' qa min xxiqb'incha'ne' ktzajel toqxena'n qeye'. 6Qama kub'ju' ttzaq'web'l toj qwitze' mujqa min, kxel qb'i'n qeye' Qman Dyos jaxxa' qma'ne' teya tu'n tkub'sana twitz, tu'n qxi'tzuntze' toj b'a'n, chechij.
Ttzaq'web'l Qman Dyos te tna'j Dyos Jeremiy.
7Yajxi'tzuntl toj lajoj q'ij, tzaj yolin Qman Dyos te Jeremiy, 8e'tzajtzun ttxko'n Joanan tk'wal Karea, exqe' kynejel xjal te q'oj ate'toq tuk'i'l, ex kykyaqilju' xjal ch'i'n kyoklen ex nimaq kyoklen, 9ex xitma'n kye: Lu xtma Qman Dyos, ju' kyqaniye' tu'n txinma'ne' kykub'sb'ile' twitz, ikjalu:
10Qama che kyajtene' toju' tx'otx' lu, knb'incha'ye' tu'n kytene' b'a'n, lay che kub' nxitu'ne', che b'el wawa'ne' ex lay che jaw nxb'oq'i'ne', qu'n ktzajel nb'ise' tu'n tpaj matxitoq tzaj nq'o'ne' xitb'il lu kyi'je'. 11Lan che xob'e' teju' nimaqkawil aj B'ab'ilon, ju' inxi'x che xob'e' te. Lan che xob'e' te, qu'n intinwe' kyuk'i'le' klolkyeye' ex kotpil kyeye' toj tq'ob'. Ayine' Dyos Manb'aj nchin yolin. 12Ktzajel q'aq'an nk'u'je', ex knb'incha'ye' tu'n ttzaj q'aq'an tk'u'j kyi'je' ex tu'n kykyaj q'o'ne' tu'n toj kytx'otx'e', chi Dyos.
13Qatzun min kyajb'ile' tu'n kykyaje' toju' tx'otx' lu, qa min xxikyb'i'ne' Qman Dyos, 14exqa makub' kyxima'ne': Ate b'a'n qo xe'lqe' najal Ejipt, ja lay qila'tle' q'oj, ex lay qb'iye' chun, ex lay qokyime' tu'n we'yaj, qa chechije', 15kyb'intz petzune' ju' ate'xe' toj Juda, a ntma'n Qman Dyos kyeye' ikjalu: Qa axi'x tok kyximju'ye' tu'n kyxi'ye' najal Ejipt, 16kpomelte' q'oj ex we'yaj ju' nche xob'e' te na'tz, ex axtzu' che kyimela'ye' na'tz. 17Kykyaqilju' nche ximan tu'n kyxi' najal toj Ejipt, che kyimel na'tz tu'n q'oj, we'yaj mo tu'n tx'u'j yab'il. Mix-a'lo'te kjel anq'in, mix-a'lo'te ktzaqpajel toju' xitb'il tzul nq'o'ne' kyi'je', chi Dyos.
18A ntma'n Qman Dyos nimtipumal, ikjalu:
Se'nxtzu'n saj txqan ntx'u'jile' kyi'ju' najlqe' toj Jerusalen, ikxtzu'n ktzajel ntx'u'jile' kyi'je' qama che'xe' Ejipt. Che okyele' te jun yek'b'il toj qanb'en taq'wix, ex lay kyiltlju'ye' najb'il lu, chi Dyos.
19A tchaq'b'il Qman Dyos kyeye' ate'xe' toj Juda tu'n lalun che'xe' Ejipt. Kyb'inku'ye' b'a'nxi'x ja'lo. 20Mixyab'a'n nkyb'incha'ne', aye'xna'ye' ẍetzaj q'mante tu'n nkub'sane' te Qman Dyos, kymaye' ikjalu: Kub'sana qi'je' te Qman Dyos, ex q'mantza tkyaqilju' matchaq', tu'n qb'inchanteye', chechije'. 21Matzun b'ajx nma'ne' ja'lo titi' saj tma'n Qman Dyos tu'n txinma'ne' kyeye', aye'tzunkye' min kyajb'ile' tu'n t-xikynima'ne'. 22Tu'ntzun tpaju', kyb'inku'ye' b'a'nxi'x, che kyimele' toju' tnam jakyajb'ila'ye' tu'n kyxi'ye' najal, tu'n q'oj, we'yaj ex tx'u'j yab'il, chi Jeremiy.
Currently Selected:
Jer 42: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999