Luka 21
21
Mot ma dato omiy
(Mar 12.41-44)
1Yecu otiŋo waŋe malo, ci oneno lulonyo kun gibolo motgi i canduk lim i ot pa Lubaŋa. 2Oneno dato mo ma lacan, ma obolo cente aryo ma rom ki cente abic me kare-ni. 3Owaco ni, “Adada awaco botwu ni, dato man ma lacan-ni obolo lim madwoŋ makato dano ducu; 4pien gin ducu gugito but limgi madwoŋ-ŋi aye gubolo, ento en i canne-ni, obolo lim ducu ma tye bote, ma konyo kwone.”
Yecu otito pi muko ot pa Lubaŋa woko
(Mat 24.1-2; Mar 13.1-2)
5Ka onoŋo jo mogo i kin lupwonnyene gubedo ka lok pi ot pa Lubaŋa, kit macalo gideyo kwede ki godi mabeco ki gityer ma gimiyo pire, ci Yecu owaco ni, 6“Gin magi ducu ma wuneno-ni, kare bibino, ma pe gibiweko got acel mo ma ododde i wi wadi ma pe gibicoro woko piny.”
Can ma bipoto i lobo
(Mat 24.3-14; Mar 13.3-13)
7Lupwonnye gupenyo Yecu ni, “Lapwony, man bitimme awene, dok kit gin aŋo ma binyuto ka man doŋ cok timme?” 8Yecu ogamo ni, “Wugokke, ŋatti mo owek rwenyowu; pien jo mapol gibibino i nyiŋa, ma giwacci, ‘An aye a en!’ dok ni, ‘Kare doŋ onyiko cok!’ Pe wulubgi. 9Dok ka wubiwinyo pi lweny ki pi arubaruba, pe wubed ki lworo, pien meno koŋ myero otimme, ento agik pe bibino oyotoyot.”
10Lacen owaco botgi ni, “Rok bilweny ki rok wadi, ker bilweny ki ker wadi; 11ki oyeŋyeŋ madoŋo biyeŋo lobo, kec laparanat ki two gemo mapatpat bipoto i kabedo mapol; ki gin ma miyo lworo mako dano, ki lanyut madoŋo bene, bia ki i polo. 12Ento ma peya gin meno ducu otimme, koŋ gibimakowu, gibilibowu, gibiterowu i nyim kacokke, gibitweyowu i mabuc, gibikelowu i nyim luker ki i nyim luloc pi nyiŋa. 13Man aye bibedo kare botwu me tito lok me caden i koma. 14#Luka 12.11, 12 Pi meno, wumok i tamwu ni pe wubitamo con kit ma wubidok iye, 15pien abimiyowu twero me dok ki ryeko, ma ŋat mo i kin lukworwu pe bitwero ette i kome, kadi pyem kwede. 16Kadi wa lunyodowu ki omegiwu ki wadiwu ki luremwu bene gibidobowu, jo mogo i kinwu gibinekogi; 17dano ducu bimon kwedwu pi nyiŋa. 18Ento yer wiwu acel mo pe birwenyo. 19Ka wudiyo cwinywu, ci wubilaro kwowu.
Yecu otito pi keto Jerucalem
(Mat 24.15-21; Mar 13.14-19)
20“Ento ka wuneno mony orumo Jerucalem, ci wuŋe ni kare me ketone doŋ onyiko cok. 21Jo ma tye i Judaya myero guriŋ i wi godi, jo ma tye i gaŋ myero guriŋ woko ki iye, jo ma tye woko i kin paco pe dok gudony i Jerucalem. 22#Koc 9.7 Pien kare meno bibedo kare me culo kwor, ki cobo lok ducu ma yam gicoyo. 23Dok mon ma giyac gibineno cam i kare meno, ki mon ma gidoto litino bene! Pien can man madit bipoto i lobo, ki kiniga madwoŋ bipoto i kom jo me rok man. 24Gibinekogi ki pala lucwan, gibiterogi me bedo opii i kin rok ducu; Lurok gibinyono Jerucalem piny, nio ka kare pa Lurok ocobo kakare.
Kit ma Wod pa dano bidwogo kwede
(Mat 24.29-31; Mar 13.24-27)
25 #
Ic 13.10; Ejek 32.7; Joel 2.31; Yabo 6.12, 13 “Lanyut binen i kom ceŋ, i kom dwe ki i kom lakalatwe, rok mapol ma i wi lobo bikumo kun noŋo cwinygi oŋabbe aŋaba pi mor me biamwonyi. 26Kom dano bimyel ki lworo, ka gibitamo gin ma bipoto i kom lobo; pien twer ducu ma i polo biyeŋŋe. 27#Dan 7.13; Yabo 1.7 Lacen gibineno Wod pa dano kun bino i wi pol ki tek ki deyo madit. 28Ka gin magi ocako timme, myero wunen malo, myero wutiŋ wiwu malo, pien kare me kokowu doŋ onyiko cok.”
Pwony i kom yat oduro
(Mat 24.32-35; Mar 13.28-31)
29Dok obolo carolok botgi ni, “Koŋ wunen yat oduro, ki yadi mukene ducu; 30ka doŋ olot, wuneno piwu kenwu, ci wuŋeyo ni oro doŋ cok. 31Kit meno wun bene, ka wuneno gin magi otimme, myero wuŋe ni ker pa Lubaŋa doŋ onyiko cok. 32Ada awaco botwu ni, yalwak me kare man pe bitum nio waŋ ma lok magi ducu otimme. 33Polo ki lobo gibitum, ento lokka pe bitum.
Wubed ma waŋwu twolo
34“Ento wugwokke kenwu, cwinywu owek doko nwaŋ pi woro cam, ki mero koŋo, ki pi lok me kwo man ma miyo wubedo ki tam mapol, wek nino-nu pe obin oumwu atura macalo akum; 35pien bibino i kom jo ducu ma bedo i wi lobo ducu. 36Ento wubed ma waŋwu twolo i kare ducu, kun wulego ni myero wubed ki tek me bwot ki i lok magi ducu ma bitimme, ki cuŋ i nyim Wod pa dano.”
37 #
Luka 19.47
Nino ducu onoŋo Yecu pwonyo i ot pa Lubaŋa dyeceŋ, ento dyewor woto buto i wi got ma gilwoŋo got Jeituni. 38Odiko con dano ducu gibino bote i ot pa Lubaŋa ka winyo lokke.
Currently Selected:
Luka 21: Aco85
Highlight
Share
Copy
Want to have your highlights saved across all your devices? Sign up or sign in
Acholi Bible © Bible Society of Uganda, 1985.