TITUS 3
3
1Naŋ ma gisi humsiya kay nisi ma hum kuɗ sa guvernera hiɗi sa ŋom nagata, hum gatta, tuwsi koti kot kay lop ma ŋaana pet, 2di joo kay saɗi, gar ci wayɗi, li sumun ŋali, hobay hiɗi ŋalda tam sumun kaf. 3Kay nay jewe ay si sum sa bay-yalla, ŋel vunu, viy goyo, muɗi gorvo vi niŋata hiɗi darta vi slen mara'a mara'a, lakay hay ɦiyda, hunaya, lakay hay gawta jar-tuwsiya kaw. 4May wulini hay li ma ŋaata vi Lawna ma su'da vaya hiɗi ti-kamda valamu kay sumuna maawa goy haraŋi, 5nam suɗayawa goyo, may kuɗ lopna vay ma ŋaana may nay lumnaɗi, may kuɗ lamanda valamu, hay muzta hiɗi vu'da wulita hay mu'da wulita vi Ŋusta-Peldetta; 6ta nam ɦoka'awa ŋolo kaya hay Yesu Kristu ma su'da vaya, 7kay hay li ma, nay muɗawa ɗigere kuɗ slugota, valam muɗna, nay ma muɗ yaw vocota hay cubta-sle'ta vi irita vatɗita.
8Yoboyn kayni hay liyamu, nan min ala naŋ ma col kalam dono'o, kay nisi sa viy kuɗ Lawna ma vul tuwsi goyo kay li lop ma ŋaana. Kayni mi va ma ŋaana ma gut kuɗ sumuna!
9May ci-way ma hay liyamɗina naŋ ma telem goyo; labara vi jafna, law ma mar ɓurawta ci-wayta kuɗ lawta vi vun-ma-gatna, kaf naŋ ma kal tuwaŋ hayamɗi, kay nam cani waa'a, as gutaŋɗi. 10Sa ma ɓuraw jar sumuna la naŋ gatamawa sem kepe, la sem mara kep lo ni, gum iram goy gine hiɗi naŋu, la nam humaŋɗi. 11Kay naŋ ma wi ala sa ma ki kayn nala nam ɓulakiya, nam li suluku, nam ka kitat kay tuwam ɗeŋe kaw.
Dita tam Titus kay tuwamu
1 Kor 16:20-24
12Hay li ma nan gaŋ Artemas lebo Tikikus aysawa, naŋ ma li koloyo kay co tanu hay Nikopolis, kay nan var ala nan ma ci cayda haya. 13Naŋ ma kot tuw Zenas ma wi vun-ma-gatna hay rogoyta valamu, hiɗi Apolos kaw, kay va ma kiɗa goy kisi hay rogoytɗi. 14Sa fayna kaw naŋ ma hatsi a li lop ma ŋaana, kay gut hay law ma co kisi koloy witna, kay nisi ma lak bay vuɗ jafnɗi.
15Nisi kaf sa ka hiɗi nanu gaŋ deɓisa. Gaŋ deɓ mi nisi sa minay hay vida.
Slugota mus hiɗi nigi kaf musge!
Currently Selected:
TITUS 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001