LAW MA NIR-NIRAMNA 30
30
BAKŊA VI AGUR HIƊI LEMWEL
1Yoboyna vi Agur,
goora vi Yake.
Dita valamu kay sa ma yum Itiyel hiɗi Ukal.
2Gasiya, nan ɦay-ɦaya suw san gigekaw,
yamda-wida vi sa-wurana may kanɗi;
3nan may hatay yaldaɗi,
nan may wi wida vi sa peldetnaɗi.
4Nam ma jik kulo hay wuralawna,
hot jikay gaa'a nam mi gige?
Sa ma mok simeɗna hay ɓalamu nam mi gige?
Sa ma ɗut niyna hay sligara valamu mi gige?
Sa ma ŋaɓ sin-nagata mi gige?
Sa namna yum anige?
Sem goora valamu ya' anige?
Naŋ wum su?
5Yoboyna vi Lawna kaf waki wak',
namu mi marayta vi nisi sa gar kay tuwsi talamu.
6Cuk va vun yoboyna valamɗi,
kay la li naɗi nam ɗawn ma gataŋu,
naŋ ma muɗ ki sa ma sinda nala.
7Nan min jobaŋ kay slen ma':
telem goy kanɗi jew mitta vanu!
8Gaŋ ir ɗutta hiɗi sinda goy gine hiɗi nanu,
naŋ ma lan goy haw co'-co'ɗi,
lan faray zututɗi kaw,
vulan tina ma nan as ŋom tuwan hiɗi namu tuta.
9Kay ta ala: la nan faray ŋolo,
yan ma jokaŋu,
nan ma di ala Ma-Vatɗina kayn mi gige?
Lebo la nan hawi,
nan ma cap goy kula,
semda vaŋ muɗ kiran puru.
10Naŋ ma ŋul sa ma gorvona vun mulamnaɗi,
kay la naɗi nam ɗawn ma ŋulaŋu,
naŋ ma muɗ joo'o.
11Jaf mara ka'a, ma ŋul busiya,
May subur susiɗi,
12Jaf mara ka'a ɗuw tuwam peldete,
may bay por goyo kay liwista valamu.
13Jaf mara ka'a sli yam tuwam kulo'o,
vokom kulo tuni tiriŋ'.
14Jaf mara ka'a siyam hiliw-hiliw' ki kew-gaferaŋa nala,
kay vat sum sa joona goy kay nagata,
kay vat sum sa hawna goy jar sum-wurana.
15Nulɗayna gurona valam ka ma':
yisi ala vula, vula!
Slen ka ɦidi hayam may hobɗi,
sle hena ka fiɗi,
nam may di ala asaya noŋɗi:
16Sle namna kayni: liyna vi sa mitina,
cata ta getayta, nagata ta hob hiɗi niy noŋɗita,
kuta, ta di ala asaya noŋɗita.
17Sa ma burah bulumu hiɗi sa ma ɗuw gatta vi sulumu birek-ceke,
gaw-gawna ma kel lokŋa ma com iramu,
gurona vi bakŋa ma mutumu.
18Slen ka ɦidi nam suwan yanu,
slen ka fiɗi noŋo ma nan wum cawamɗina:
19Baŋal bakŋa hay dukalawna,
baŋal guyna kulo kay hiɗiyna,
baŋal lumna goloŋ kay niyna,
baŋal sana vo hay ziyna vi goot-cata.
20Cata bulota kaw hagata va' ki kayn nala:
Na' ti'e, bugolda ɦas vuna' goyo,
bugolda na' di ala:
Nan may li joo noŋɗi.
21Slen ka hiɗi nam wir nagata;
slen ka fiɗi noŋo ma nagata as ziyimɗi:
22Gorvona ma co a ti mulu,
sa ma ɦay-ɦayna ma co a fi fu ma tina,
23cata ta viyuwta ta co a sli jufu,
gorvota ta co a yaw vocona vi mula'ta.
24Gaa kay nagata muuriyan ka fiɗi nam guray suw kafe,
may yalla valam suw kafe;
25telella, sle ma donota valam mayɗi,
may tok tina valam kulo hay cayda.
26Kosomna mi sle ma dono valam mayɗi,
may jugoɗ zulla kulo jar hiɗiyna;
27Baara mulla valam mayɗi,
may tuɗ kuɗ tuwam hay vokŋa vokŋa;
28huɗoŋolla, san as vum hiɗi ɓam ɦawa,
may ɦarmat kalaf hay deŋel ziyna vi mulla.
29Slen ka hiɗi tu'da valam jifiy ŋolo,
slen fiɗi lo ma giɗay ŋaa'a ku'u:
30Zlona, mulla vi muuriyana,
deŋ goy ŋorom merɗek kay va noŋɗi;
31kulumna ma ganay ŋaana,
lebo ɦu-ŋekŋa;
hiɗi mulla ma sa col digamɗina.
32La naŋ ka hobay hiɗi suburta,
lebo la naŋ ka hiɗi darta joota,
ŋaat tel tuwaŋu.
33Kay miira ma gujomna vul mula,
cinna ma mokom ɗeŋŋa vul busuwna,
kay ɦiyda ta ɗeŋga mar cirepta kaw.
Currently Selected:
LAW MA NIR-NIRAMNA 30: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001