YOSUWA 22
22
SLEN MA LI CAWNA HAY IRITA VI Yosuwa
Jaf sa hay gal kuɗuwu vi Yordan
1Yosuwa yi jafna vi Ruben, jafna vi Gad hiɗi gal-jafna vi Manase. 2Nam di tisi ala: Slen ma Musus ma sunda vi Ma-Vatɗina dumna nigi laawa kuɗum kafe, nigi humawa kuɗanu hay slen ma nan digit kafna. 3Nigi may hin guro-biyogin goyɗi ir buur ŋolo ta-ta vaydi, nigi li kuɗ gatta ta Ma-Vatɗina Lawna vigi vulgita. 4Wulin kayni Ma-Vatɗina Lawna vigi vul tun-sukkawa mi guro-biyogina, ki nam di tigi nala, wulin kayni sligi hagata kay hot vo hay guɗukŋa vigiya, hay nagata vigiya, ta Musus sa ma sunda vi Ma-Vatɗina vulgita goy bugol Yordan.
5Wulin kayni vun-ma-gatna hiɗi gatta ta Musus sa ma sunda vi Ma-Vatɗina vulgiya nigi ma li kuɗa'a, nigi ma min Ma-Vatɗina Lawna vigiya, poygi hay hagata valam kafe, ligi kuɗ vun-ma-gatna valamu, jungi tuwgi talamu, nigi ma sunum hiɗi dikgi kaf, hiɗi ciwta vigi kaf kaw. 6Yosuwa gi bol kisiya, nam gisi irsiya, nisi kalay hay guɗukŋa visiya visiya. 7Musus vul hagata mi gal-jafna vi Manase hay Basan goy gal hena vi Yordan, Yosuwa vul nagat mi gal-jaf hena kat guro-biyomna sa ka hay gal ma vulatina vi Yordan, hay liy ma Yosuwa gisi irsi hay guɗukŋa visiya, nam gisi bolo,
8nam disi ala: Hotgi hay guɗukŋa vigiya hiɗi farayn ŋolo, hiɗi luwayn dak-dak, hiɗi doorot ŋolo, hiɗi or ŋolo kaw, hiɗi wayna, kawayna hiɗi sligara kaw, sle ma nigi tum ɓuraŋ kay sa gawt kigina nigi ma ɓurawam hiɗi guro-biyogina.
9Jafna vi Ruben, jafna vi Gad hiɗi gal-jafna vi Manase hotay bugolsiya, hay li ma nisi hin sa Israyella hay Silo, hay nagat Kanaan, nisi kay tuwsiya kalay hay nagata vi Galaad, nagata ta Ma-Vatɗina vulsita kuɗ dita vi Musus.
10Hay li ma nisi co kel Yordan, ta ka hay nagata vi Kanaan tuwa, nisi (jafna vi Ruben, Gad hiɗi gal-jafna vi Manase) in giwin-ma-ɗifinna ma ŋolo kel niy-lumna. 11Sumuna co labara tam sa Israyella ala: Humgiya, jafna vi Ruben jafna vi Gad hiɗi gal-jafna vi Manase in giwin-ma-ɗifinawa ɗiger vok nagata Kanaan, kel Yordan, hay galla vi sa Israyella. Giwin-ma-ɗifinna namna ŋol ku'u. 12Hay li ma sum sa Israyella hum labara kayni, nisi tok tuwsi kaf hay Silo kay tuɗ dursiya. 13Sum sa Israyella gi Fineyas goora vi mul-ma-ɗifinna Eliyazar kat jafna vi Ruben, Gad hiɗi gal-jafna vi Manase hay nagata Galaad. 14Sa ŋulona vi jafna sa doogon kuɗumu, sa kuɗ jafn kep kep jar sa Israyel kafe; nisi kaf si sa ŋulona vi jafna visiya jar vokŋa vi sa Israyella. 15Nisi kalay kat jafna vi Ruben, jafna vi Gad hiɗi gal-jafna vi Manase, hay nagat Galaad, nisi ka disi ala: 16Humgi va ma tokŋa vi Ma-Vatɗina dumina: Nigi li bay-ɗigerta ta ŋol ki kayn nala kat Lawna vi sa Israyel kay mige? Vaydi nigi cali goy gine hiɗi Ma-Vatɗina, nigi in giwin-ma-ɗifinna kay yaw kulo vaydi kat Ma-Vatɗina kay mige? 17Joota ta nay la'ay hay Pewor kayni kirgi kiɗay su? Kay ta-ta vaydi kaw bakmarana ma nig gaa jar tokŋa vi Ma-Vatɗina nay bay por goy kalam ŋaa tuwa.#22:17 Ɗuw Ŋɓ 25:1-9. 18Vaydi nigi muɗ ŋorgiyawa mi Ma-Vatɗina! La nigi yaw kulo vaydi kat Ma-Vatɗina, jifin ɗawn namu dikam ma ɓulak kat tokŋa vi Israyel kafe. 19La nagat ta vuli ir migit kayni kirgi liwisi, hotgiyay hay nagata ta ir vi Ma-Vatɗina, liyn ma ziyna vi Ma-Vatɗina ka hayna; gargi liyna vigi jarma'a; may a nigi yaw kulo kat Ma-Vatɗina, nigi yaw kulo katma kaw, hay li ma nigi in giwin-ma-ɗifinna mara'a, hin giwin-ma-ɗifinna vi Lawn goyo kayn joo'o. 20Hay li ma Akan goora vi Zerak li bay-ɗigerta kuɗ sle ma telayna, ɦiyda vi Ma-vatɗina fok kulo kayni kay sa Israyel kafɗi su? May ba goy kuɗ joota valam kayni may mi nam valam kepɗi.
21Jafna vi Ruben, jafna vi Gad hiɗi gal-jafna vi Manase hot dit tam sa ŋulona vi vokŋa vi sa Israyel ala: 22Lawna, Lawna Ma-Vatɗina, Lawna, Lawna Ma-Vatɗina win mi nam kepe, sa Israyella ma wi kayni kaw. La numa yaway kulo kat Ma-Vatɗina, la numa muɗi bay-ɗigere kat Ma-Vatɗina, nam ma suɗma goyo hay fatta vayditɗi. 23La numa in giwin-ma-ɗifinnawa, hin Ma-vatɗinawa goyo, la numa inim kayni kay ŋal ɗifin kulo kalamu, kay li vulda kulo kalamu, Ma-Vatɗina ma jobma'a. 24A'a, may naɗi, numa li kayni hiɗi varta ala: a vok ɗaw kaw gurona vigi ma silak gurona vuma ala: Va ma ka jargi hiɗi Lawna vi Israyel mi migeɗi. 25A nisi ma di ala Ma-Vatɗina bur Yordan jaraya, numa hiɗi nigi jafna vi Ruben hiɗi jafna vi Gad nigiya galla vigi may tam ma-Vatɗinɗi, a nisi ma di naɗi. Kay kuɗ dita vi gurona vigiya, gurona vuma ɗawn ma li nar kuɗ Ma-Vatɗinɗi. 26Kuɗ kayni numa di ala numa ma li lopo kay in giwin-ma-ɗifinna, may kay ŋal ɗifin kalamɗi, kay li ɗifin mara kalamɗi kaw, 27may ki di-goyta jarma numa hiɗi nigi nala, jar jafna vuma ma bugolmana kaw, ala numa ka girif gaa vok Ma-vatɗina hiɗi ɗifinna vuma ma ŋal-goyna, hiɗi faray ma numa ka ŋatamna, hiɗi ɗifinna vi lop ma slugona, kay a vok ɗaw kaw, gurona vigi ma silak gurona vuma ala galla vigi may tam Ma-Vatɗinɗi, a nisi ma di naɗi. 28Numa di ala: la vok ɗaw kaw nisi di ki kayn nala tuma numa'a lebo tam gurona vuma'a, numa ɗawn ma hotsi dit ala: Sargi jifna vi giwin-ma-ɗifinna ma sumayma kotomna tige; may kay ŋal ɗifini lebo kay li ɗifin mara kulo kalamɗi, may ki di-goyta jarma numa hiɗi nigi nala. 29Kay yaw kulo'o kat Ma-Vatɗina, kay cal goy vaydi hay hagata vi Ma-Vatɗina, kay in giwin-ma-ɗifinna kay ŋal ɗifin kalamu, kay li vulda kalamu lebo kay li ɗifin mara'a kalamu, a hin giwin-ma-ɗifinna vi Ma-Vatɗina ma ka vok ziyna valamna goyo kayni gine kuma'a.
30Hay li ma mul-ma-ɗifinna Fineyas hiɗi sa ŋulona vi vuɗna, hiɗi sa ŋulona vi vokŋa sa ka kuɗumna hum labara kayni, ma jafna vi Ruben, jafna vi Gad hiɗi jafna vi Manase disitna, diksi sleɗ gaa'a. 31Nala Fineyas goora vi mul-ma-ɗifinna Eliyazar di tam jafna vi Ruben, jafna vi Gad hiɗi jafna vi Manase ala: Numa wi vaydi ala Ma-vatɗina ka jaraya, kay nigi lum kayni, mi law ma bay-ɗigere kat Ma-Vatɗinɗi, ki kayn nala nigi but sum sa Israyellawa goy hay ɓam Ma-Vatɗina. 32Fineyas goora vi mul-ma-ɗifinna Eliyazar hiɗi sa ŋulona yaway hay Galaad hay nagata vi jafna vi Ruben hiɗi Gad pa, nisi hotay hay nagat Kanaan kat sa Israyella, nisi visi labara. 33Labar namna sleɗ dik sa Israyella; sum sa Israyella subur Lawna, varta kay tuɗ dur jafna vi Ruben hiɗi jafna vi Gad nisi hina' goyo. 34Jafna vi Ruben hiɗi jafna vi Gad tun semda tam giwin-ma-ɗifin namna ala Ed, min di ala namu mi ma li di-goyta jaray hiɗi Ma-Vatɗina Lawna.
Currently Selected:
YOSUWA 22: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001