GALATENA 6
6
Gut-tuwta ta jar-tuwayta
Rom 2:3-11; Heb 6:10-12
1Ɓosiyonna, la sulukŋa nem sanawa, nigi sa hay Ŋusta gutgi kuɗumu hiɗi dikga ŋalda, may li ŋal mi tuwaŋu kay naŋ kaw ma kal hay nemdaɗi. 2Ziygi jakŋa vi tuwgiya tuwgiya, ki kayn nala nigi ma hob vun vun-ma-gatna vi Kristu. 3La san var ala nam ŋolo, nam ɗutum kayn mi tuwam ɦawa, nam may mi sa ma ŋolɗi. 4Hin san gigekaw wak lopna valam kay tuwamu, kay na'ta nam ma fi suburta kay tuwam ɗeŋe, may kuɗ sa maraɗi. 5Kay gigekaw ma ziy jakŋa valam kay tuwamu tuwamu.
6Sa ma ka hay hatta vi yoboyna hinim ɓuraw slena valam ma ŋaana kaf hiɗi sa ma ka hatamna.
7Ɗutgi tuwgi goyɗi, Lawna may hin sa ŋulumɗi, kay jaf mige kaw ma san wasam gaana nam ma feɗemu. 8Nam ma was kuɗ sliwna, nam ma feɗ ɓulak-goyta kuɗ sliwna, may nam ma was hay Ŋusta, nam ma feɗ irita vatɗita kuɗ Ŋusta. 9Nay ma mak kay li ŋaatɗi, kay nay ma feɗ hay liyamu, la nay so tuwaya. 10Kay na'ta nay ma li ŋaata tam sumuna kaf hay li ma nay fi hagata, may suw pet tam ɓosiyay sa hay vida.
Vatta
11sargi ɗo ma ɗoy ŋulona ma nan ɗom hiɗi ɓan nanna tige! 12Nisi kaf sa min ala sumun sarsi ŋaa'a hay sliwna ka ligi dono'o ala nigi ma ka gosaya, kayni hiɗi varta ta ala nisi min ci lasi hiɗi gu-ma-grakŋa vi Kristuɗi tuta. 13Kay nisi sa kaay gosayna kaw may li kuɗ vun-ma-gatnaɗi, may nisi min ala nigi ka gosaya kayni kay nisi min subur tuwsi hiɗi nigiya. 14May nanu, kay subur tuwanu kayni gine'e kanu. May nan as subur tuwan kayni kay gu-ma-grakŋa vi Yesu Kristu Bum-Sumuna vaya kepe. Hay namu nagata ɓalay goy kay gu-ma-grakŋa vok-iranu, nanu ɓalay kat gu-ma-grakŋa vok ir nagata kaw. 15Kay ka-gosayta kayni may li vaɗi, bay-gosayta li vaɗi kaw, may va ma ŋolla ti vu'da wulita. 16Nisi kaf sa hum kuɗ gatta kayni, sle'ta hiɗi lamanda ka kisiya, kay sa Israyella vi Lawna kaw.
17Tun caw wulin pa, sa may makan tuwan loɗi, kay ɦuɗukŋa vi Yesu ka tumi tam tuwan vatiya.
18Ɓosiyonna, slugota vi Bum-Sumuna vaya Yesu mus hiɗi Ŋusta vigi musge. Amen.
Currently Selected:
GALATENA 6: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001