GALATENA 4
4
1May nan di ala: Hay li ma sa ma yaw vocota ka goor tuwa, la nam mi mul slen kaw, iram may poŋ goy hiɗi sa ma gorvonɗi. 2May nam ka kuɗ gaŋeraŋa vi sa ma wulumna hiɗi sa ma ŋom slena, ta-ta co tam buur ma bumna kaam jew kana. 3Nay kaw nala, hay li ma nay ka guray tuwa, nay ay juni gaa kuɗ sle ma hatta ma gurayna vi nagata. 4May hay li ma liyna coowa, Lawna gi goora valamiya, vuɗum ti cata, nam vuɗi kuɗ vun-ma-gatna. 5Kay nam ma but nisi sa ay gaa kuɗ vun-ma-gatna goyo, kay nay kaw ma muɗ goy si gurona.
6nigiya si gurona, kay na'ta Lawna gi Ŋusta valam ay hay dikaya, hiɗi na'a nay siwel ala: Baba bunu. 7Nala naŋ mi gorvo loɗi, may mi goora, la naŋ kaw mi goora, naŋ mi ma yaw vocota hay Lawna.
Tiyta vi Paulus kay sa Galatena
8Hay liyn ma jew ɓa-ɓana nigi may wi Lawnɗi, nigi ay sunum mi lawayn ma may laway gasiɗi. 9May wulini, hay li ma nigi wi Lawn wina, hay li ma Lawn kaw wigi nigi wina, wulini nigi min hot bugolgiya tam hatta ta gurayt lo kayn nanige? Nigi min li gorvo kuɗa' lo su? 10Nigi ka li kuɗ buura, kuɗ tilla, kuɗ ŋaɓta vi liyna, kuɗ busata kaw. 11Nan ka li nar ala nan li lop kigi kayn sur waa'a klasige.
12Ɓosiyonna, nan siɗawgiya, muɗgi ki nan nala, kay nan kaw muɗawa ki nigi nala. 13nigi may lan va ma joo'o noŋɗi, nigi wi ala nan kus yoboyn tigi sem ma jewn kayn hiɗi maŋayta hay sliw-tuwanu. 14Lali a va hay sliw-tuwanu as kalgi hay nemda, may nir na'ta kep nigi may ɗuwan birek-cekɗi, tufan goyɗi kaw. May nigi tapan kuɗgiya ki sunda-wuralawna nala, awa, ki Yesu Kristu nala kaw.#4:14 Jaŋ lawta kayni lo hay 2 Kor 12:7-10. 15va ma ɗek ŋaata ŋolda vigi na'ta ka wulin arige? Kay nan li di-goyt kigi ala: hay na'ta kayni, la fi li'e, nigi goboy kay hulot irgi goyo kay vulanti manu. 16Wulini nan muɗi sa ma gawt kigina kuɗ gasita ta nan da' tigita su?
17Ciwerta ta nisi gargi hiɗi na'ta kayni may ŋaaɗi, may nisi min jagi jargi goy hiɗi numa'a kay nigi ma muɗ ciwer kisi nisiya. 18Ŋaa'a kay nigi ma li ciwere kay sle ma ŋaana hay buurta kafe, may hay li ma nan ka jargin tutaɗi. 19Gurona vanu, sa dikan ka tan kigi lo kay vuɗ ma nan vuɗgi hiɗi tuw-tita, ta-ta Kristu ma li dono hay dikgi kalafi, 20may wulini nan min mus jargi dam', muɗ dita vanu kaw, kay nan ka yor ŋolo kigiya.
Ŋra lawt jar Sara hiɗi Hagar
21Danay tige, nigi sa min lak gaa kuɗ vun-ma-gatna, nigi may hum va ma vun-ma-gatna dumnaɗi su? 22Kay ɗot ɗo'ay ala, Abraham fi guron ma', kep vi cata gorvota, kep vi cata vuɗita may. 23Goora vi cata gorvota vuɗi kuɗ sliwna, goora vi cata vuɗita vuɗi kuɗ dita-ŋaɓayta may. 24Hay kayni law ma nir-niramna ka'a, kay hay boyn lakŋi bonota ka ma'; ta kepta vi hiɗiyt Sinay pa, na' vuɗ gurona kay gorvota: kayni ti Hagar. 25Kay Hagar na'a ti hiɗiyt Sinay hay Arabiya, ta ŋray hiɗi Yerusalem ta ka wulini. Kay na' ka hay gorvota hiɗi gurona va'a. 26May Yerusalem ta kulota na' goy butiya, na' ti suya. 27Kay ɗot ɗo'ay ala:
Firiyagu, naku ta getayta
naku ta vu'ɗita, siwelag kulo'o,
naku ta tuw-tit kagɗita,
kay gurona vi cata ta hini goyta ka ŋolo
suw na'a ta ka kuɗ jufa'ta.#4:27 Ɗuw Es 54:1.
28May, ɓosiyonna, ki Isaak nala, nigi si gurona vi dita-ŋaɓayta. 29May ki buura ma kalay jewna nala, goor ma vuɗi kuɗ sliwna las nam ma vuɗi kuɗ ŋusta, kayn ŋray ca ki va ma ka wulini nala kaw.
30Nala ɗota di mige?
Digiɗaŋ cata gorvot zawn goyo,
hiɗi goora va' kaw,
kay goora vi cat ta gorvota fi yaw vocota vi bulum hiɗi goora vi cata vuɗitɗi.#4:30 Ɗuw Ct 21:10.
31Kay na'ta ɓosiyonna, nay mayn si gurona vi cata gorvotɗi, nay si gurona vi cata vuɗita.
Currently Selected:
GALATENA 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001