1 TIMOTEWUS 5
5
Gatta kay boy sa duhulla, sa maariyana hiɗi sa gorvona
1 Kor 7:9-14; Efes 6:5-8
1Sa ma maara naŋ ma lawam hiɗi delaŋ ɗeŋɗi, may naŋ ma gatam ŋali ki nam mi buŋu nala, sa joriyona naŋ ma gatsi ki ɓosiyoŋ nala. 2Boy sa maariyana naŋ ma gatsi ki sumiyaŋ nala, boy sa gurayna naŋ ma gatsi ki ɓosiyoŋ sa boyna nala kaw hay peldetta kaf.
3Slaŋ yam boy sa duhulla kulo'o, sa duhulla sa gasina. 4May la cata duhulta gurona va'a lebo guro-ŋolona va' ka'a, hinsi hat kay nisi li ŋaat tam sa hay jafna visi jewe, a nisi ma hot wurak ŋaata tam sumaysiya, kay kayni ŋaa'a kir Lawna. 5May duhulta ta gasita ta mus va' kepta, na' tun vida va'awa kay Lawna, na'a so tuwa'a hay siɗawta hiɗi gi-deɓta hay falayta hiɗi henjeta kaw, 6may na'a ta poy kuɗ darta vi sliwna, na'a mitawa hay li ma na' ka iriya tuwa. 7kayni mi slen ma naŋ ma gatsiya, kay nisi ma lak bay lawta joota kisiya. 8May la san var kay ŋom ŋil tuw sa falamnaɗi, suw pet sa vo valamna, nam puw vunamawa kay vida, nam joo'o suw sa ma bay-vina kaw.
9A cata duhulta semda va' ɗo jar boy sa duhulla kayni, busata va' ma li coy dok-karkiya, na' ma lin ti cata vi sa kepe; 10semda va' ma tiya kay lop ma ŋaana: la na' wul guronawa, la na' vul tin mi sa pulla, la na' muz sem sum sa peldetnawa, la na' gutawa kuɗ sa maŋayna, la na' gar lop ma ŋaanawa pete kaw.
11May boy sa duhulla sa wayana naŋ ma noysi goyo, kay hay li ma darta vi sliwna visi jasi jarsi goy hiɗi Kristu, nisi min kay yaw jufaya, 12nisi muɗ tuwsi joo'o, kay nisi hin vida visi ta jewta goyo. 13Tapay hiɗi kayni, nisi hat tuwsi kay poy viyuwu, nisi poy vun ziyna ziyna, poy ɦawaɗi kaw, di vun ma tefle'e hiɗi vun ma lawta visi may hayɗina, nisi di sle ma san as dumɗina kaw. 14Nala nan min ala boy sa wayana ma yaw jufaya, vuɗ guro'o kaw, nisi ma ŋom ziyna visi ŋaa'a, hin ma gawta fi va kay di jooɗi kaw. 15Kay segena calay goy vatiya kay tap kuɗ Satan. 16La sa ma viyna lebo cata viyta ka hiɗi cata duhulta vo hay ziyna visiya, nisi kay tuwsi ma ŋomsiya, hin tapna-Kristuna goy hefteŋe, kay ekklesiyana ma ŋoma' ti duhulta ta gasita.
17Sa maariyana sa ŋom tapna ŋaa'a nigi ma ɗuwsi nagaya kay nisi ma fi sli-yamda kulota sem ma', suw pet nisi sa ka mak tuwsi hay hatta hiɗi kusta kaw. 18Kay ɗota di'e: Naŋ ma jun vun putna hay li ma nam to wanaɗi, kay sa ma li lopna nagay kay wurakŋa valamu.#5:18 Ɗuw hay Gsm 25:4. 19La sa di lawta joota kay sa ma maara, bay vun sa di-goyna ma' kla ɦidi kla, naŋ ma hum kuɗ kaynɗi. 20nisi sa li suluku, naŋ ma gatsi kirsi kafe, kay segena kaw ma li nari.
21Nan daŋu vok ir Lawna, vok ir Kristu Yesu hiɗi vok ir sunda-Wuralawna sa vileki-goyna kaw, a naŋ ma li slen kayni bay giriŋi, bay ka-irta kaw. 22Tun baŋ kay sa gosoy witɗi, tap tuwaŋ hay sulukŋa vi sum segenɗi, ŋomaŋ tuwaŋ peldete kaw.
23Naŋ ma ci niy gilayn ɦawaɗi, may naŋ ma ci vin neeɗa kaw kay hayaŋu hiɗi moy ma ka makaŋ dok-dokŋa.
24sulukŋa vi sum segena ɗek tuwam goy haraŋi jew a ka kitat kisi kaw; may tam sum segena, sulukŋa diram pat goy bugolda. 25Nala kaw lop ma ŋaana ɗek tuwam goy haraŋi; may lop ma may ŋaaɗi as mus hay ŋayaytaɗi kaw.
Currently Selected:
1 TIMOTEWUS 5: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001