Juan 16
16
1»Ximb'i'ij k'u ronoje wa' chiwe cha' na kasach ta ri kub'ulib'al ik'u'x wuk'. 2Ma kopon ruq'ijol echiri' kixesax ne b'i ri'ix chupa taq ri sinagogas. Y china ri kakamisan iwe'ix, e chwa rire uchak ri Dios ri ku'ano. 3E kaki'an wa' ma na keta'am ta k'ana uwach ri Nuqaw y na keta'am tane nuwach ri'in. 4Kamb'i'ij wa' chiwe, ma we xopon ruq'ijol wa', k'una chik'u'x nub'i'im chi lo wa' chiwe.
Ri chak ku'an ri Ruxlab'ixel ri Dios
»Na ximb'i'ij ta lo wa' chiwe chwi ri jeqeb'al loq, ma k'a in k'o iwuk'. 5No'j wo'ora kin'ek cha' kine'k'ola ruk' ri taqayom lo we ri'in, yey na jinta chi ne junoq chiwe kutz'onoj chwe pa kin'ek wi. 6Yey ruma ne nub'i'im wa' chiwe, lik xok b'is chik'u'x. 7Pero qatzij wa kamb'i'ij chiwe: Lik utz chiwe ri'ix we kin'ek. Ma we na kin'ek taj, na kak'un ta iwuk' ri To'b'el re kub'ochi'ij ik'u'x.#16:7 Wa To'b'el e ri Ruxlab'ixel ri Dios. Jn. 14:1; 20:22; Hch. 1:8 No'j we xin'ek, kantaq lo chiwe.
8»Echiri' kak'un ri Ruxlab'ixel ri Dios, kuya na chi reta'maxik chike ri winaq re ruwachulew china ri k'o umak, china ri lik jusuk' chwach ri Dios y china puwi' k'o wi ri q'atb'al tzij re ri Dios. 9Kuq'alajisaj k'ut china ri k'o umak: Wa' e ri na kakub'i' ta uk'u'x wuk' ri'in. 10Kuq'alajisaj china ri lik jusuk', ma ri'in kin'ek ruk' ri Nuqaw yey ri'ix na kiwil ta chi nuwach.#16:10 Xew ri Qanimajawal Jesucristo lik jusuk', yey echiri' xe'ek chila' chikaj, e xutaq lo ri Santowilaj Ruxlab'ixel re kojuto'o cha' kojb'in jusuk' chwach ri Dios. 11Yey kuq'alajisaj, ri Dios uq'atom chi tzij puwi ritzel winaq kataqan che ruwachulew.
12»Lik k'o kuaj kamb'i'ij chiwe, pero na kamb'i'ij tana, ma wo'ora na kimaj ta usuk'. 13No'j echiri' kak'un ri Uxlab'ixel re ri Q'ijsaq, ri' kuk'ut chiwach ri'ix ronoje ri lik qatzij. Rire na xa ta pa re kach'a'tik, ma janipa ri kub'i'ij e ub'i'im ri Dios che y jela' kuya chi reta'maxik chiwe taq ri katajin loq. 14Ma e kuq'alajisaj janipa ri kuaj kamb'i'ij ri'in chiwe, y jela' kunimarisaj nuq'ij. 15Ronoje ri k'o ruk' ri Nuqaw, k'o wuk' ri'in; e uwari'che ximb'i'ij ri Ruxlab'ixel e kuq'alajisaj janipa ri kuaj kamb'i'ij ri'in chiwe.
Kopon ri q'ij echiri' ri b'is ku'ana ki'kotemal
16»Na naj ta chi k'u ri' kiwil nuwach, ma ri'in kin'ek chila' pa k'o wi ri Nuqaw; pero chiqawach apanoq ki'wila tanchi nuwach —xcha'.
17Ek'uchiri', jujun chike rutijo'n jewa' xkitz'onoj chikiwach: «¿Sa' ke'elawi wa'? Ma kub'i'ij: “Na naj ta chi k'u ri' kiwil nuwach, ma ri'in kin'ek chila' pa k'o wi ri Nuqaw;#Jn. 16:10 pero chiqawach apanoq ki'wila tanchi nuwach.” 18¿Sa' ke'elawi: “Na naj ta chi k'u ri'”? Na kaqamaj ta usuk' sa' puwi kach'a't wi» xecha'.
19Ri Jesús xuna'b'ej kakaj kaki'an tz'onob'al che. Ruma k'u ri' xub'i'ij chike:
—Ri'in ximb'i'ij chiwe: “Na naj ta chi k'u ri' kiwil nuwach, pero chiqawach apanoq ki'wila tanchi nuwach.” ¿E kitz'onoj sa' ke'elawi wa'? 20Paqatzij wi kamb'i'ij chiwe: Ri'ix kixoq' na y kixb'ison na, tob' ri winaq re ruwachulew keki'kotik. Tob' ri'ix kixb'ison wo'ora, wa b'is ku'ana ki'kotemal.
21»Echiri' kutzir uwach juna ixoq, lik kak'oji' pa k'axk'olil ma xopon ruq'ij. No'j echiri' alaxinaq chi rak'a, na kak'un ta chi ne chuk'u'x ri k'axk'olil ruma ruki'kotemal, ma xalax jun ak'a che ruwachulew. 22Jek'uri'la' ri'ix kapax ik'u'x wo'ora; no'j echiri' kiwil tanchi nuwach, kanoj k'u ri iwanima' che ki'kotemal yey wa' wa ki'kotemal na jinta junoq kesan re chiwe. 23Chupa k'u ri' la' la q'ij na kajawax ta chik ki'an tz'onob'al chwi ri nub'i'im.
»Paqatzij wi kamb'i'ij chiwe: Ronoje ri kitz'onoj che ri Nuqaw pa ri nub'i', Rire kuya chiwe. 24K'a chwi wo'ora ri'ix na jinta k'o itz'onom pa ri nub'i' ri'in. Chitz'onoj y kik'ulu, cha' jela' kanoj ri iwanima' che ki'kotemal.
Ri Jesús uch'ijom uchuq'ab' taq ri na utz taj re ruwachulew
25»Nub'i'im wa' chiwe ruk' k'amb'al na'oj; no'j kopon k'u ri q'ij echiri' na kajawax ta chik kinch'a't iwuk' ruk' k'amb'al na'oj, ma ri' lik q'alaj chiwach ri'ix janipa ri kamb'i'ij chiwe chwi ri Nuqaw. 26Chupa k'u la' la q'ij, utz kitz'onoj che ri Nuqaw chupa ri nub'i' janipa ri kajawax chiwe. Yey na kajawax ta k'u ri' kinelaj chwach ri Nuqaw piwi', 27ma ri Nuqaw lik k'ax kixuna'o ruma k'ax inina'om ri'in yey lik ikojom, ri'in ruk' ri Dios in petinaq wi. 28Ri'in in petinaq ruk' ri Nuqaw y xink'un che ruwachulew; yey wo'ora e wa' kanya kan ruwachulew y kintzelej ruk' ri Nuqaw —xcha'.
29Ek'u rutijo'n xkib'i'ij che:
—Wo'ora lik q'alaj ri kab'i'ij la chiqe, ma na kach'a't ta chi la ruk' k'amb'al na'oj. 30Yey wo'ora kaqamaj usuk' rilal lik eta'am la ronoje. Uwari'che na kajawax taj k'o junoq ku'an tz'onob'al che'la, ma eta'am chi la sa' ri kaqaj kaqatz'onoj echiri' k'amaja' ne kaqa'an ri tz'onob'al. Ruma k'u la', qakojom rilal ruk' ri Dios petinaq wi la —xecha'.
31Ri Jesús xuk'ul uwach:
—¿K'a e wo'ora kikoj wa'? 32Kak'un k'u ruq'ijol y wa' ya xujeqo echiri' ri'ix kixkicher b'i. Chijujunal k'ut kimaj b'i ib'e y kiniya kan nutukel. Pero ri'in na kinkanaj ta kan nutukel, ma ri Nuqaw k'o wuk'.
33»Ximb'i'ij ronoje wa' chiwe cha' wuma ri'in kiriq utzil chomal. Che ruwachulew ri'ix lik kitij k'ax. Pero chinimarisaj k'u ik'u'x, ma ri'in nuch'ijom uchuq'ab' taq ri na utz taj re ruwachulew#16:33 Ri Jesús xuch'ij uchuq'ab' ri mak y ritzel winaq. —xcha'.
Currently Selected:
Juan 16: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.