Hebreos 13
13
Pixabanic chique rutinamit ri Dios
1Mok'otaj alak ri c'ax cana' ib alak chiwach alak, ma ralak chak' ib alak chupa rubi' ri Cristo. 2Mic'ow chic'u'x alak ri quec'ul alak chi utz janipa ri quebopon chi ocho alak, ma e c'o ri xebanaw wa' y na xquina'bej taj e ángeles ri xequic'ulu. 3Memesc'utaj alak ri e c'o pa cárcel, e 'ana alak pacha' c'o alak cuc' pa ri cárcel; yey memesc'utaj ne alak ri e c'o pa c'ax, e 'ana alak pacha' catij alak c'ax junam cuc' rique.
4Lic chu'ana nim uk'ij ri c'ulaniquil chiwach onoje alak y mach'ulaj ne c'ana alak ri tzij 'anom alak chiwach alak; ma conoje ri caquetz'abej uwa quik'ij cuc' jujun chic na quic'ulel taj y conoje ri quemacun chirij ri c'ulaniquil, wa' cak'at tzij paquiwi' ruma ri Dios.
5Me'ec c'u'x alak chwi ri puak. E qui'cota alak ruc' ri c'o uc' alak, ma jewa' ubi'im ri Dios:
Na catinya ta can q'uenok
y na canwok'otaj ta ato'ic Dt. 31:6, 8; Jos. 1:5
xcha'. 6E uwari'che lic cakajiquiba' uwach ri tz'ibital can pa Ruch'a'tem ri Dios:
Ri Nukaw Dios, e Rire ri cato'w we'in;
na canxi'ij tane c'ana wib che ri na utz taj
cu'an juna ticawex chwe Sal. 118:6
cojcha'.
7Chec'una chic'u'x alak ri e aj c'amal wach e alak, ri xetzijon Ruch'a'tem ri Dios che alak. Ch'obo alak rakan janipa ri utz xuc'am lo ri quibinic quisilabic y e c'ama alak re ri cubulibal quic'u'x ruc' ri Cristo.
8Ri Kanimajawal Jesucristo na cajalc'atitaj taj; Rire jela' pacha' rojertan, jela' wo'ora y chikawach apanok. 9Matakej c'u alak juna c'utunic junwi y na usuc' taj. Ma e c'o ri lic queboc il che tak ri takanic puwi sa' ri catijic, yey wa' na jinta c'ana cutikoj che ri quibinic quisilabic chwach ri Dios. Ec'u ri lic cuya kachuk'ab ri'oj e ri catiqui' ri kanima' chupa ri unimal rutzil uc'u'x ri Dios.
10Ri oj re ri Cristo, c'o ri altar ke'oj (wa' e rucamic ri Cristo chwa ri cruz). Ec'u ri quelok'niman pa ri Rocho Dios ruc' awaj ecamisam, na caya'taj ta chique caquic'ul janipa ri ya'tal chike ri'oj ruma rucamic ri Cristo.#13:10 Pa ri ch'a'tem griego cubi'ij “na caya'taj ta chique caquitij re ri altar ke'oj”. 11Ri cu'an ri cajawal raj chacunel pa Rocho Dios e cucoj bi chupa ri Luwar lic Santo ri quiquiq'uel rawaj ecamisam ruma ri mac que ri tinamit, yey ec'u ri quiti'jil quesax bi chupa ri tinamit re caporoxic. 12Jec'ula' ri Jesús xesax bi chupa ri tinamit echiri' xcamisaxic cha' ruc' ruquiq'uel cujosk'ij ri canima' ri ticawex. 13Jo' c'u ri' ruc' ri Jesús, e pacha' junam ruc' Rire chojelubi chupa ri tinamit y kac'ulu ke'oj ri c'akbal bi kak'ij jela' pacha' x'an che Rire. 14Ma wara che ruwachulew na jinta juna tinamit lic cacowinic pa utz coj-jeki' wi; ruma c'u ri', e koye'em ri jun katinamit na casach ta uwach.
15Ruma c'u la', xaki e kaya'a chwach ri Dios ri kakasa'n re yacbal uk'ij ruma ri Kanimajawal Jesucristo. Kayaca c'u uk'ij rubi' Rire, e kabi'ij Rire e Kanimajawal. 16Lic mic'ow chic'u'x alak xaki e 'ana alak ri utz y to'o ib alak chiwach alak. Ma wa' e jun kasa'n lic cuc'ul uc'u'x ri Dios.
17Lic cojo alak quitzij ri e aj c'amal wach e alak y ya'a ib alak chitakic cuma, ma chwiquik'ab rique ya'tal wi ruchajixic ri c'aslemal alak chwach ri Dios. Yey rique caquik'alajisaj chwach ri Dios su'anic xqui'an tak ri quichac uc' alak. Lic chirajawaxic c'u ri' caya ib alak chitakic cuma cha' jela' rique utz caqui'an ri quichac ruc' qui'cotemal y na ruc' ta bis ruma ri cu'an alak alc'ayew chique; ma we e ri', na jinta cutikoj ri quichac uc' alak.
18Lic 'ana c'u alak orar pakawi'. Ri'oj lic cakana' chikac'u'x utz ri ka'anom, y ruc' c'u ri kabinic kasilabic cakaj caka'an chi utz ronoje. 19Yey cantz'onoj co che alak, e 'ana alak orar panuwi' cha' caya'taj tanchi chwe ri'in quinopon tan uc' alak.
Q'uisbal ch'a'tem chique tak riglesias
20Ri Dios, ri aj ya'l utzil chomal, xuc'astajisaj lo ri Kanimajawal Jesucristo chiquixo'l ri ecaminak. Y ri Cristo e ri Nimalaj Aj Chajinel que rutinamit ri Dios; yey ruc' ruquiq'uel Rire, xujiquiba' uwach ri c'ac' tzij na jinta utakexic. 21Cantz'onoj c'u ri' che ri Dios, chuto'o alak cha' ca'an alak ri utz y jela' ca'an c'u alak janipa ri caraj Rire. Chu'ana c'u Rire uc' alak ruma ri Kanimajawal Jesucristo janipa ri rajawal uc'u'x Rire. Che Rire takal wi ri yacbal uk'ij wak'ij ora y na jinta chi utakexic chikawach apanok. Amén.
22Yey cantz'onoj che alak hermanos, lic ya'a ib alak che umajic usuc' wa' wa queb oxib pixabanic xintz'ibaj pan che alak y c'ulu alak chi utz.
23Cuaj queta'maj alak e ri ka hermano Timoteo elinak chi lo pa cárcel, yey we xc'un tan lok, canc'am bi wuc' echiri' qui'nwila alak.
24Ya'a alak rutzil quiwach conoje ri e aj c'amal wach e alak cuc' conoje rutinamit ri Dios. Ri e aj Italia caquiya pan rutzil wach alak. 25C'ulu c'u onoje alak ri unimal rutzil uc'u'x ri Dios. Amén.
Currently Selected:
Hebreos 13: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.