Hebreos 12
12
Ri k'ilonic re ri Dios chique ri e ralc'o'al
1Conoje c'u ri' wa' wa ticawex lic xquic'ut ri cubulibal quic'u'x. Lic chirajawaxic c'u ri' chike ri'oj jela' caka'ano. Ma wa oj c'o wi e pacha' jun c'alalem yey e ri'oj ri cojc'alalic. Ec'u rique cojquitzutza' lok, coye'em cojopon pa ri q'uisbal re ri c'alalem oj c'o wi. Ec'u ri' ri'oj kaya'a can ronoje ri na utz taj calatz'an ke, kaya'a can ronoje ri mac ojura'lim y mojcos c'u ri' che ri be c'o chikawach. 2Junok cac'alalic e lic cutzutza' pan ri q'uisbal re pa caraj copon wi. Jec'ula' ri'oj e kaya'a pan ri kawach puwi ri Jesús, ma ruc' Rire cape wi ri cubulibal kac'u'x y e Rire ri catz'akatisan uwach wa'. Xuya c'u ranima' xcam chwa ri cruz tob wa' lic q'uixbal uwach; e xutij ri c'ax ma reta'am we xric'owibej wa', unimal qui'cotemal ri cuc'ulu. Ec'u ri' wo'ora tz'ul puwiquik'ab rutz'ulibal ri Dios.
3E lic c'ola na'oj alak puwi ri xu'an ri Jesús; ma tob na takal ta che Rire, lic xutij c'ax paquik'ab raj maquib. Macos c'u ralak y mapax ne c'u'x alak chwa ri c'axc'obic. 4Ma ralak c'amaja' ne copon alak c'a chwa ri camic#12:4 Cubi'ij wa' ma copon ne ri k'ij catewun ri camic paquiwi ri hermanos ruma na caquesaj ta quib che ri cubulibal quic'u'x ruc' ri Cristo. ruma cach'o'jin alak chirij ri mac. 5Mic'ow c'u chic'u'x alak ri pixabanic re ri Dios, ri cubi'ij pa Ruch'a'tem che alak, ri alak ralc'o'al Rire:
At walc'o'al, mac'ak bi uk'ij ri k'ilonic re ri Dios,
mapax ne ac'u'x che echiri' cuch'a'bej apa.
6Ma ri Dios Kajawxel lic quebuk'il
janipa ri c'ax quebuna'o
y e pacha' cujich' quipa
janipa ri u'anom ralc'o'al chique Pr. 3:11-12
cacha'.
7Lic c'u cuyu alak ri k'ilonic, ma jela' cak'alajinic alak ralc'o'al ri Dios. ¿Na eta'am ta neba alak e rachi c'o ralc'o'al lic chirajawaxic che quebuk'il wa'? 8Jec'uri'la', ri Dios quebuk'il conoje ri e ralc'o'al. No'j we ta ri Dios na cuk'il ta alak, ri' cu'ana pacha' na alak ta sakil ralc'o'al, pacha' na k'alaj taj china ri kaw alak. 9Echiri' oj ac'alab, e ri kachu-kakaw che ruwachulew lic xojquik'ilo y xkanimaj quitzij. ¿Su'chac c'u ri' na cakaya ta kib puk'ab ri Kakaw c'o chila' chicaj cha' jela' cac'oji' kac'aslemal chwach Rire? 10Ma ri kachu-kakaw xa ajilam junab cojquik'ilo, yey ri caqui'an kuc' xa e chirij ri quina'oj rique. No'j ri Kakaw Dios lic cojupixabaj puwi ri cajawax chike cha' ri kac'aslemal cu'ana jela' pacha' ri chomilaj uc'aslemal Rire. 11Pakatzij wi na jinta juna k'ilonic lic cuc'ul kac'u'x echiri' oj c'o chupa, ma wa' cu'an c'ax chike. Pero we xkac'ul ri k'ilonic, lic c'o cutikoj chike, ma cusuc'upij ri kabinic kasilabic cha' cojc'oji' chi utzil chomal.
12Ruma c'u la' lic chuk'ubej ib alak cha' jela' cac'oji' uchuk'ab ri k'ab alak cosinak y cacowir ri ch'ec alak siquirinak. 13E c'ama bi alak ri be jusuc' cha' cu'an alak c'amal quiwach ri na e ta tiquil chi utz y jela' rique na quetzak ta chic y na quebel ta che ri be jusuc'.#12:13 Pa ri ch'a'tem griego cubi'ij “cha' jec'ula' ri jetz' cacunutaj ri rakan y na cujalcatz'ij ta chic”. 14Lic chirajawaxic c'ola alak chi utzil chomal cuc' conoje y tijoj ib alak che ri santowilaj binic chwach ri Dios, ma na jinta junok que'rila uwach ri Dios we na e ta cu'an ri'. 15Lic chajij ib alak cha' na jinta junok che alak cujam bi ri unimal rutzil uc'u'x ri Dios ruma catiqui' oyowal pa ranima', yey jec'ula' ri' cu'an latz'anel che ri q'uiyibal alak y laj ne queretzelaj jujun chic. 16Muc'ulumaj e junok che alak caretz'abej uwa uk'ij ruc' junok chic na uc'ulel taj; mac'ak ne bi alak uk'ij janipa ri cuya ri Dios che alak pacha' ri xu'an ri Esaú echiri' xa ruma jun wa'im, xuc'ayij ri takal che rire ruma atzixel.#Gn. 25:29-34 17Eta'am chi c'u alak ri', ri Esaú tob lic xurayij chic cuc'ul janipa ri takal che rire ruma atzixel, na xya' ta chi che; tob ne lic xrok'ej, na xurik ta chi ujalc'atixic wa'.#Gn. 27:30-40
Ri juyub Sinaí y ri juyub Sion
18Ec'u ralak na oponinak tane alak chwach jun juyub quilitaj wara che ruwachulew pacha' ri juyub#12:18 Wa' e ri juyub Sinaí pa xuya wi ri Dios Rutzij Upixab chique raj Israel. Éx. 19:16-19; 20:18-19 xquil raj Israel ojertan, wa' e ri xjumuw ak' chwach, pa xu'an wi k'eku'm y xu'an cakjik'. 19Na tom tane alak ruch'awibal ri trompeta y rukul ri Dios jela' pacha' ri xquita raj Israel. Ec'u tak ri xetaw re wa', lic xquitz'onoj cha' na e ta chi ri Dios cach'a't cuc'.#Éx. 20:18-21; Dt. 5:22-27 20Ma rique xquixi'ij quib echiri' xya' wa jun takanic chique: «China ri capaki' lo chwa wa juyub, tob ne juna awaj, ri' cacamisax pa'baj o ruc' lanza»#Éx. 19:12-13 xcha'. 21Lic xibibal c'u uwach ri' ri xilitajic, ma jenewa' xubi'ij ri Moisés: «Lic quimbirbotic ruma nuxi'im wib»#Dt. 9:19 xcha'.
22No'j wo'ora alak oponinak chwach ri juyub Sion pa ri tinamit re ri Dios c'aslic, ri tinamit Jerusalem chila' chicaj, pa quimolom wi quib uq'uiyal ángeles re caquilok'nimaj uk'ij ri Dios ruc' qui'cotemal. 23Alak chi bare jun cuc' ri e ralc'o'al ri Dios,#12:23 Pa ri ch'a'tem griego cubi'ij “ri atzixelab”. Chiquixo'l raj judi'ab, ri atzixel lic c'o uwach y lic c'o cuc'ul che rukaw. Jec'ula' conoje ri e re ri Cristo, lic c'o quiwach chwach ri Kakaw Dios y lic c'o caquic'ul che Rire. ri quebopon chila' chicaj ruc' Rire.#12:23 Pa ri ch'a'tem griego cubi'ij “ri tz'ibital chi quibi' chila' chicaj”. Ap. 21:27 Alak oponinak chi chwach ri Dios pa e c'o wi tak ri e jusuc', ri eboquinak chi chila' chicaj, ri 'anom chi chom che ri quic'aslemal ruma ri Dios, ri Aj K'atal Tzij que conoje. 24Yey alak oponinak chi chwach ri Jesús, ri xtiquiban ri c'ac' tzij xu'an ri Dios kuc'; ri Jesús xu'an wa' ruma ruquiq'uel xturuwic, y wa' más c'o cutikoj chwa ruquiq'uel ri Abel.#12:24 Ruquiq'uel ri Abel xa xuc'am lo k'atbal tzij puwi ri jun xcamisan re; no'j ruquiq'uel ri Jesús xuc'am lo colobetajic y cuybal mac chike konoje. Gn. 4:10
25E uwari'che lic mac'ak bi alak uk'ij ri Dios, ri capixaban e alak. Ma we na xecolobetaj ta ri xquic'ak bi uk'ij ri Dios ojertan echiri' Rire xuch'a'bej quipa ruma ri Moisés wara che ruwachulew, mac'uwari' ri'oj na cojcolobetaj taj we e cakac'ak bi uk'ij ri Jun cuch'a'bej lo kapa chila' chicaj.
26Ma ojertan echiri' xch'aw lo Rire, lic xbarbat rulew, yey wo'ora jewa' ujiquibam uwach:
Jumul chi c'ut can'an wa',
pero na xew ta chi c'u ruwachulew cambarbatisaj,
ma canyiquiya' ne ruwa caj Hag. 2:6
cacha'. 27Echiri' cubi'ij: «Jumul chi c'ut can'an wa',» e que'elawi ronoje ri u'anom ri Dios, ri utz casilabisaxic, wa' cajalc'atix bi; xew c'u catiqui' can ri na utz taj casilabisaxic. 28Jec'ula', ri'oj cakac'ul jun luwar pa caya'i' wi chike cojtakanic y wa' lic tiquil chi utz y na casach ta uwach. Ruma c'u wa' chojtioxin chwach ri Dios, kakasaj c'u kamejelem chwach y kalok'nimaj ruc' xi'in ib. 29Ma jela' pacha' ri ak' cuporoj ronoje, jec'ula' cu'an ri ka Dios echiri' cusach uwach ronoje ri na utz taj.#Dt. 4:24
Currently Selected:
Hebreos 12: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.