1 Timoteo 5
5
Ru'anic ca'an pixabanic chiquiwach rutinamit ri Dios
1Echiri' ca'an pixabanic, mayaj juna achi nimalaj winak chic; ri cha'ana e chapixabaj pacha' chi akaw; yey chebapixabaj ralabo pacha' chi e awatz o e achak' 2y rixokib e nimak winak pacha' chi e achu. Yey ruc' sakil ana'oj chebapixabaj ralito pacha' chi e awanab.
Ru'anic queto' rixokib e malca'nib
3Tak rixokib e malca'nib, ri pakatzij wi na jinta cato'w que, chirajawaxic wi queto' ruma rutinamit ri Dios. 4No'j we c'o juna ixok malca'n yey e c'o ralc'o'al o e c'o tak umam, ri' e rique ri lic chirajawaxic quequichajij chi utz ri quifamilia y quequito' ri quichu malca'nib o ri cati' malca'nib, ma wa' e pacha' rajil uc'axel chique ri xeq'uiyisan que, yey wa' e lic utz y e cuc'ul uc'u'x ri Dios. 5No'j chirajawaxic c'ut e riglesia cato'w que rixokib e malca'nib, ri pakatzij wi na jinta chi quifamilia y na jinta c'u junok cato'w que, yey wa' e tak ri lic quicubam pan quic'u'x ruc' ri Dios y lic quiya'om quib che u'anic orar chipak'ij chichak'ab. 6No'j e juna ixok malca'n we xew e que'ec uc'u'x che u'anic ri caraj rire, ri' pacha' caminak chi chwach ri Dios tob ne c'aslic, y na takal ta c'u ri' che cato'ic. 7E chebataka c'u riglesia che u'anic tak wa cambi'ij chawe cha' chom quilitaj ri quibinic quisilabic chiquiwach ri jujun chic. 8Lic c'u chirajawaxic ri' che junok quebuto' tak ri ratz-uchak' e c'o chux che, y más ne chirajawaxic cu'an wa' chique rufamilia.#Éx. 20:12 Ma e junok na cu'an ta wa', ri' na takal ta che cubi'ij e cuq'uil ri e re ri Cristo, yey más ne c'o umac ri' chiquiwa ri na quicojom ta rubi' ri Cristo, ma e ne rique quequichajij ri quifamilias.
9Chupa ri wuj pa tz'ibital wi tak ri bi'aj que rixokib e malca'nib queto'ic, xew catz'ibax rubi' rixok uq'uisom chi sesenta junab, we jusuc' xc'oji' ruc' ri rachijil, 10we chom ruch'a'tibexic ca'an chwi tak ri chac u'anom, wa' e ebuq'uiyisam chi utz ri ralc'o'al, ebuc'ulum chi utz ri hermanos quebopon chirocho y uch'ajom ne ri cakan,#5:10 “Uch'ajom ne ri cakan”: Ojertan caqui'an wa' ruma rulew coc che ri cakan pa be. ebuto'om tak ri e c'o pa c'axc'obic y lic c'u u'anom utzilaj tak chac.
11No'j tak ri malca'nib c'a e c'ac'al, matz'ibax ri quibi' ma c'axtaj ruma ri quirayibal xew caquitzucuj quec'uli' tanchic y caquesaj c'u quib chirij ri Cristo. 12Jec'ula' e caquekelej ri k'atbal tzij paquiwi' ruma na xqui'an taj janipa ri quibi'im caqui'ano.#5:12 “Janipa ri quibi'im caqui'ano”: Ri malca'nib xeto' ruma riglesia, xqui'an jun tzij na quec'uli' taj y caquiya c'u quib chupa ruchac ri Dios piglesia. 13Quebu'an c'u e xepu'ab y xaki quek'e'cot chi'tak ja. Yey na xew ta quebu'an e xepu'ab, ma quebu'an ne e aj molot, xaki caquimin quib che ri na jinta que che y e xaki caquitzijoj ri na takal ta chique caquibi'ij. 14E uwari'che ri'in cambi'ij chique ri e malca'nib c'a e c'ac'al, chec'uli'ok, chequiq'uiyisaj ri calc'o'al y e quila' c'ut janipa ri chirajawaxic ca'an pa cocho cha' jela' ri tzel quebilow re ri Cristo na jinta c'o caquich'a'tibej chiquij rutinamit Rire. 15Ma e c'o ne jujun chique wa' wa malca'nib na quitakem ta chi ri Cristo, ma e quitakem ri Satanás.
16We c'o junok ucojom rubi' ri Cristo yey e c'o ixokib malca'nib chique rufamilia, ri' chirajawaxic che chebuto'o' cha' na cuya ta alc'ayew che riglesia, y jec'ula' riglesia xew quebuto' ri malca'nib pakatzij wi na jinta cato'w que.
Pixabanic paquiwi ri e aj wach re riglesia
17Chique conoje ri e aj wach re riglesia, ri quic'amom uwach chi utz rutinamit ri Dios, chirajawaxic ca'an cuc' janipa ri takal chique ruma ri chac caqui'ano; y e ne más chirajawaxic ca'an wa' cuc' ri ya'tal paquik'ab quetzijonic y quec'utunic. 18Ma jewa' tz'ibital can chupa Rutzij Upixab ri Dios: «Macoj bozal che ri boyex echiri' cukil uwi ri trigo, ma takal che catzukic.»#Dt. 25:4 Y cubi'ij: «E junok cachacunic, lic takal che catojic.»#Jer. 22:13; Lc. 10:7; 1 Co. 9:14
19Echiri' c'o junok cutz'ak uchi' juna aj wach re riglesia; macoj ne wa' we na e jinta ca'ibok o oxibok caquijiquiba' uwach rumac. 20We c'o juna aj wach re riglesia na caraj taj carok'otaj can rumac, chach'a'bej upa chiquiwach conoje cha' jela' coc xi'in ib cuc' riglesia. 21Chwach c'u ri Dios y chwach ri Kanimajawal Jesucristo y chiquiwach ri ángeles re ri Dios ri echa'talic re caquilok'nimaj Rire, cambi'ij c'u chawe cha'ana tak wa' chi jusuc' cuc' conoje tob e chinok y na xa ta catcha'wic. 22Ma'an tan aj wach re riglesia che junok#5:22 Pa ri ch'a'tem griego cubi'ij: “Maya tan rak'ab puwi junok”. 1 Ti. 4:14 we c'amaja' awilom chi utz ri jusuc' ubinic,#1 Ti. 3:6, 10 ma amac c'u ri' ri'at we rire cu'an ri na utz taj chupa ri chac re ri Dios. Lic chachajij c'u awib ri'at chwach ronoje ri na utz taj.
23Ruma c'u lic cuya c'ax pamaj chawe, matij xew jorona', utz we e cach'urij c'ana vino ruc' ri jorona' catijo.
24Lic chirajawaxic caweta'maj chi utz rubinic usilabic china ri cacojo re aj wach re riglesia. Ma e c'o jujun achijab lic k'alaj ri quimac tob c'amaja' ne cak'at tzij paquiwi'; pero e c'o jujun chic c'unaj cak'alajin ri quimac. 25Jec'uri'la', e c'o ri lic cak'alajin ri chomilaj chac caqui'ano; pero e c'o jujun chic caqui'an chomilaj tak chac, yey wa' camayin reta'maxic. Na ruc' ta c'u ri', copon ri k'ij quel lo chi sak.
Currently Selected:
1 Timoteo 5: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.