1 Timoteo 4
4
Tak ri caquesaj quib chirij ri K'ijsak
1Ri Ruxlabixel ri Dios uk'alajisam chi utz copon na ruk'ijol echiri' e c'o jujun ticawex caquiya can ri K'ijsak re ri Dios cha' caquitakej c'utunic petinak cuc' tak ri itzel uxlabixel e socoso'nel. 2Rique e quequitakej ri winak xa queb quipalaj y e aj rak'ul, ri lic u'anom chi ach'i'y ri quina'oj. 3Wa' e ri quequitak tak ri winak cha' na quec'uli' taj y cha' na caquitij ta jujun wa'im tob wa' e ri Dios xu'ano re catijic; ec'u ri'oj, ri keta'am y kacojom ri K'ijsak, utz cakac'ul wa' ruc' tioxibal. 4Ma ronoje ri 'anatal ruma ri Dios, lic chom; na utz ta c'u ri' we cakac'ak bi uk'ij ri cuya ri Dios chike. Ri ka'ana' e kac'ulu ruc' tioxibal. 5Ma Ruch'a'tem ri Dios cubi'ij ronoje ri cuya Rire chike lic chom;#Gn. 1:31; Mr. 7:19 yey echiri' cakatioxij wa' chwach ri Dios, coju'an xa oj jun ruc' Rire che ubi'xiquil: Ronoje lic chom.
Jun utzilaj aj chac re ri Kanimajawal Jesucristo
6We ri'at cac'ut chique rutinamit ri Dios wa cantz'ibaj pan chawe, ri' catu'ana jun utzilaj aj chac re ri Kanimajawal Jesucristo; ma wa Utzilaj Tzij acojom y ri sakil c'utunic atakem e caya'w achuk'ab chwach ri Dios. 7Matoc c'u il che tak ri ojer tzijobal na ruc' ta ri Dios petinak wi, ma wa' xa no'jibal que winak.#1 Ti. 1:4 E chatijoj awib che jun sakil binic silabic chwach ri Dios. 8Ma we cakatij uk'ij cac'oji' uchuk'ab ri kacuerpo, utz c'u ri'; pero wa' xa jok'otaj cojuto'o. No'j we e cakaya kib che jun sakil binic silabic chwach ri Dios, wa' lic utz che ronoje, ma c'o cutikoj che ri kac'aslemal wak'ij ora y chikawach apanok. 9Wa cambi'ij lic katzij y lic takal che caquicoj conoje ri ticawex. 10Ruma c'u wa' cojchacunic y cakatij tak c'axc'obic, ma cubul pan kac'u'x ruc' ri Dios c'aslic, ri cacoloben que tak ri ticawex che ruwachulew; y pakatzij wi, e quebucolobej conoje ri cacubi' quic'u'x ruc' ri Cristo. 11Janipa c'u ri nubi'im chawe, e chac'utu ri' chiquiwach ri quicojom rubi' ri Cristo y chabi'ij chique e lic caquitakej wa'.
12Maya luwar che junok cuc'ak bi ak'ij ruma c'a at ala. E chac'utu ri lic ube chiquiwach ri quicojom rubi' ri Cristo, yey cha'ana wa' ruc' rach'a'tem, ruc' rabinic asilabic, ruc' ri rutzil ac'u'x, ruc' ri cubulibal ac'u'x y ruc' ri sakil ana'oj. 13Xalok' c'u c'amaja' quinoponic, e chaya'a awib che rajilaxic Ruch'a'tem ri Dios y che u'anic pixabanic y c'utunic chiquiwach riglesia. 14Mawok'otaj uya'ic ri ya'tal chawe ruma ri Dios, ri xk'alajisax pawi' ri'at echiri' ri e aj wach re riglesia xquiya ri quik'ab pawi'. 15Chaya'a c'u awib che tak wa': Cha'ana janipa ri amajom chic cha' jela' conoje caquilo jalan utz ri chac cat-tajin che u'anic. 16Lic chachajij awib che rabinic asilabic y che uc'utic ri sakil c'utunic. Chachuk'ubej awib che u'anic tak wa', ma jela' ri'at y ri quetaw awe quixcolobetaj che ri k'atbal tzij re ri Dios.
Currently Selected:
1 Timoteo 4: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.