ያዪቆባ ኪታ 4
4
ሃ ኣላሚያ ኢታቴ ዶሴናን ኣጋናዋ
1ኦላይኔ ዋላሳይ ሂንቴ ጊዱዋ ሃቃፔ ዪ? ኡንቱንቱ ዬዳሳይ ሂንቴ ቦላ ጊዶን ኦሌቲያ ሂንቴ ናሼታናው ዎልቃማ ኣሙዋ ኣሞቲያዋፔ ጊዴኔ? 2ሂንቴ ኣሞቲታ፤ ሺን ዴሚኪታ፤ ዎታ። ሎይ ኮዪታ፤ ሺን ዴማናው ዳንዳዪኪታ፤ ዋላቄቲታኔ ኦሌቲታ። ሺን ፆሳ ዎሴና ዲራው፥ ሂንቴ ኮዪያዋ ዴሚኪታ። 3ፆሳ ዎሲታ፥ ሺን ዴሚኪታ፤ ጋሱካ ባላ ኦጊያን ዎሲታ። ሄዋ ሂንቴና ናሼቺያዋን ፔሻናው ኮዪያ ዲራሳ። 4ሲሚ ዎሹሚያዋንቶ፥ ሃ ኣላሚያና ዳቦቲያዌ ፆሳው ሞርኬ ጊዲያዋ ኤሪኪቴ? ኣዪሲ ጎፔ፥ ሃ ኣላሚያና ዳቦታናው ኮዪያዌ ኦኒኔ ፆሳና ሞርኬቴ። 5ዎይ ፆሳ ማፃፋይ፥ «ፆሳይ ኑናን ዎዳ ኣያናይ ዎልቃማ ኣሙዋ ኑሲ ኣሞቴ» #4፡5 «ፆሳይ ኑናን ዎዳ ኣያናይ ዎልቃማ ኣሙዋ ኣሞቴ»፡ ፆሳይ ኑናን ባሬ ኣያና ዎዳዌ፥ ኑሲ ሎዖ ቆፋ ኣሞቲያዋና። ጊያዋ ሂንቴንቶ ጮ ጊያዋ ማላቲ? 6ሺን ፆሳይ ኣ ኬካቴ ኣዴ ኢሜ። ሄዋ ዲራው፥ ፆሳ ማፃፋይ፥ «ፆሳይ ኦቶሬቲያዋንታ ኢፄ፤ ሺን ባሬና ካዉሺያዋንቶ ኣ ኬካቴ ኢሜ» ያጌ። #ሌም 3፡34
7ሲሚ፥ ሂንቴ ፆሳው ሞዴቲቴ። ያቲዴ ፃላሂያና ኤቄቲቴ፤ ኢ ሂንቴፔ ባቃታና። 8ፆሳኮ ሺቂቴ፤ ኢካ ሂንቴኮ ሺቃና። ሂንቴኖ ናጋራንቻቶ፥ ሂንቴ ኩሺያ ሜጬቲቴ። ላዑ ቆፋይ ዴዒያዋንቶ፥ ሂንቴ ዎዛና ጌሺቴ። 9ቱጋቲቴ፤ ካዮቲቴኔ ዬኪቴ። ሂንቴ ሚቻ ዬኮ ላሚቴ፤ ሂንቴ ናሼቻካ ካዮ ላሚቴ። 10ጎዳ ሲንን ሂንቴ ሁጲያ ቶቺቴ፤ ቃሲ ኢ ሂንቴና ቁ ቁ ኦና።
ኣሳ ቦላ ፒርዴናን ኣጋናዋ
11ታናዳን ፆሳ ካሊያዋንቶ፥ ኢቱ ኢቱዋ ዚጊሮፒቴ። ባሬ ኢሻ ዚጊሪያዌኔ ኣ ቦላ ፒርዲያዌ ሂጊያ ዚጊሬኔ ሂጊያ ቦላ ፒርዴ። ኔኒ ሂጊያ ቦላ ፒርዶፔ፥ ሂጊያ ቦላ ፒርዲያዋ ጊዳሳፔ ኣቲን፥ ሂጌው ኣዛዜቲያዋ ጊዳካ። 12ሂጊያ ኢሚያዌኔ ፒርዲያዌ ፆሳ ፃላላ፤ ኢ ኣሻናዉኔ ዪሳናው ዳንዳዬ፤ ሺን ኔ ሾሩዋ ቦላ ፒርዲያዌ ኔኒ ኦኔ?
ጬቄቴናዳን ኢሜቴዳ ዞሪያ
13ሂንቴኖ፥ «ኑኒ ሃቼ ዎይ ዎንቲ ሄ ካታማ ባና፤ ሄዋን ላይ ኡታና፤ ዛሊዓናኔ ቃሲ ሚሻ ዎሳና» ጊያዋንቶ፥ ቤዒቴ። #ሌም 27፡1 14ዎንቲ ሂንቴ ዴዑ ኣያ ሃናኔንቶኔ ኤሪኪታ፤ ጉ ዎዴው ሂንቴ ቤቲዴ፥ ጉዬፔ ዪያ ፔኑዋ ማላ። 15ሄዋ ኣጊዴ፥ «ጎዳይ ጎፔ፥ ኑኒ ዴዓና፤ ሃዋ ዎይ ሄዋ ኦና» ጋናው ቤሴ። 16ሺን ሂንቴ ሃዒ ሂንቴንቱ ቃቴን ጬቄቲታ፤ ሄዋ ማላ ጬቁ ኡባይ ኢታ።
17ሄዋ ዲራው፥ ሎዖባ ኦናው ኤሪዴ ኦና ኡራው ሄዌ ናጋራ።
Currently Selected:
ያዪቆባ ኪታ 4: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa