1 Juan 4
4
Equie cuendaꞌ Espírituꞌ Diose cuna espíritu enu rriꞌi condra Jesucristo
1Bee saꞌa enu chiquiꞌ seꞌca, liꞌá nia luhua nú la chili arquiꞌhua titse bee bene enu rni nú rni Stichiaꞌ Diose, rluti uriꞌinzeꞌcahua beyaꞌ tunu neli nú rnilla Stichiaꞌ Diose urre lia rnilla, xne lu iliulabe enzee huaxi bee bene enu niquichiaꞌ, nu rnibeei nú rnibeei Stichiaꞌ Diose. 2Nee, para nú riꞌihua beyaꞌ ta enu neli rni Stichiaꞌ Diose: neca beella enu neli nzeli arquiꞌ nú ubeꞌta Jesucristo lu iliulabe xi neca tucu bene, enu nzeli arquiꞌ scua nzu Espíritu Santoꞌ Diose cuna liꞌilla. 3Pero bee bene enu la chili arquiꞌ nú neca Jesucristo Lliꞌñi Diose enu ubeꞌta lu iliulabe, la nzu Espíritu Santoꞌ Diose cuna liꞌibeei, nu liꞌibeei neca beei enu rlee lu Jesucristo. Liꞌihua ubeneꞌhua nú rquiꞌña nu nzeꞌta tucu enu rlee lu Jesucristo lu iliulabe quieꞌ, nu desde nee nucuaꞌala huaxi enu rana arquiꞌ Jesucristo lu iliulabe quieꞌ.
4Pero liꞌihua bee lliꞌñia, necalahua Lliꞌñi Diose, nu bee enu rana arquiꞌ Jesucristo la riaꞌ bee nzeꞌe ana luhua, xne máse llene neca lunú rnibiyaꞌ liꞌinu enu nzu cuna liꞌihua luquela nú rnibiyaꞌ bee enu nchiñi lu inziu nú necha neca. 5Bee enu rlee lu Jesucristo rriꞌitsia beei elliebacuꞌ lunú nuꞌ lu iliulabe, nu puro beenú nuꞌ lu iliulabe rnibeei nu bee enu la chili arquiꞌ Jesucristo rriꞌi caso lunú rnibeei. 6Pero liaꞌahua necalaꞌahua bee beneꞌ Diose. Nu bee bene enu nuꞌlu Diose rieneꞌ lunú rniaꞌahua; nu bee bene enu la chulu Diose ni temeꞌ la riꞌibeei caso lunú rniaꞌahua. Scua rriaꞌahua beyaꞌ nú ta enu nehuañi cuna Espíritu Santo nu seteꞌ nú neli neca, cuna enu nehuañi cuna espíritu nú seteꞌ puro lunú la neli neca.
Diose seca bee bene
7Bee saꞌa enu chiquiꞌ seꞌca, rquiꞌña nú zecaꞌahua bee saꞌahua, xne eluseca quieꞌ nzeꞌta lu Diose. Ye bee bene enu seca bee saꞌ liꞌibeella neca beella Lliꞌñi Diose nu nuꞌlu beella liꞌinu. 8Nu bee bene enu la zeca bee saꞌ la chululla Diose, xne lu Diose nzeꞌta eluseca. 9Ulubeꞌ Diose nú secanu liaꞌahua, enzeꞌe añinzuca nú tucutsia Lliꞌñinu Jesucristo pero uxeꞌlanu Lliꞌñinu lu iliulabe para nú luꞌcuaꞌahua elunehuañi lunu equie cuendaꞌ Lliꞌñinu. 10Diose seca liaꞌahua: nu la necane nú rlutiaꞌahua seꞌcaꞌahua Diose, liꞌinu rlutinu secanu liaꞌahua enzeꞌe uxeꞌlanu Lliꞌñinu Jesucristo para nú ungutinu equie cuendaꞌ stulaꞌahua, nu scua nuꞌ nú rriꞌi Diose perdona liaꞌahua.
11Bee saꞌa enu chiquiꞌ seꞌca, liꞌá nia luhua tucu nú seca Diose liaꞌahua, leꞌca scua rquiꞌña nú zecaꞌahua bee saꞌahua. 12Añinzuca nú lecati lañiꞌ Diose, pero tunu seꞌcaꞌahua bee saꞌahua rlubeꞌ nucuaꞌ nú nehuañiaꞌahua cuna Diose, nu neli seꞌcaꞌahua liꞌinu. 13Liaꞌahua nediyaꞌahua nú nehuañiaꞌahua cuna Diose nu liꞌinu nzunu cuna liaꞌahua, xne uliquiꞌlanu Espíritu Santoꞌnu luaꞌahua. 14Nu liꞌiru bee apóstol ulañiꞌru Jesucristo Lliꞌñi Diose, nu rixiuleꞌeru luhua nú Diose Paꞌahua uxeꞌlanu Lliꞌñinu para nú tsilaꞌanu ye bee bene. 15Tatse bee enu rni nu nzeli arquiꞌ nú Jesucristo neca Lliꞌñi Diose nehuañilla cuna Diose, nu nehuañinu cuna liꞌilla.
16Liaꞌahua rriaꞌahua beyaꞌ nu nzeli arquiaꞌahua nú seca Diose liaꞌahua. Nu equie cuendaꞌ liꞌinu nzeꞌta nú seꞌcaꞌahua bee saꞌahua nu enu nehuañi cuna eluseca cuaꞌ nehuañilla cuna Diose, nu nehuañinu cuna liꞌilla. 17Tunu neli nú nediyaꞌahua nú seca Diose liaꞌahua lu iliulabe quieꞌ, la luꞌcuaꞌahua niꞌ tucu nú lliquiaꞌahua para bichia chenu hualunue lu cuendaꞌ bee bene equie nú neca tucutsiaꞌahua cuna Diose, tucu nú neca tucutsia Jesucristo cuna Diose. 18Elu nuꞌ elusecaꞌ Diose lecaꞌ nú lliqui bee bene. Xne enu neli nzequiee elusecaꞌ Diose lecaxi lliquilla, pero enu la chequiee eluseca cuaꞌ xiquilla, xne rriꞌitsialla elliebacuꞌ xi castiya riala nú zecalla. Enzeꞌe tunu nuꞌ enu xiqui rlubeꞌ nucuaꞌ nu neli la chequiella elusecaꞌ Diose. 19Liaꞌahua seꞌcaꞌahua Diose xne liꞌinu rlutinu secanu liaꞌahua. 20Tunu nuꞌ bene enu rni: “Nu secalla Diose”, nu rana arquiꞌlla bee saꞌlla, necatsialla tucu enu niquichiaꞌ. Xne tunu la zecalla bee saꞌlla enu rlañiꞌlla, ¿xa modo zecalla Diose enu la lañiꞌlla? 21Leꞌca liꞌi Jesucristo uninu: nú enu seca Diose rquiꞌña nú leꞌca zecalla bee saꞌlla.
Currently Selected:
1 Juan 4: zpl
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.