Luke 24
24
1နွို့ခေါင်း ရှိတနင်္ဂနွေ၊ ချန်ငွမ်းခါစောစောနွို့ ကမြနွို့နောင်း ဘာ့ဖျောင်ပွို့မဲ့ အွူအမွေးဆီဘိုဘက်နွို့ အွေပိုတွို့ထာ တာအလောင်းကိုယ်တော်ယေရှုနွို့ တာ့တောင်းခြိုင်းဂူနွို့ ကု့လောက်ကြဘို့နွို့နဲ့။ 2ခွို့နွို့နောင်း တာ့လွက်နွို့နု့ သု့ပေါက်တောင်းခြိုင်းဂူနွို့ ဘာ့ဘက်ပိုမဲ့ ဘာ့ကစန်းလွန်းမဲ့ သန်းမှုနွို့နား အာ့်ကွက်အာ့်ကွက်နွို့နား ကွေတောဝ်းဗွို့နွို့ခေါင်း တာ့လွက်အ့်ငှာနွို့ လောက်မဲ့နွို့နား ရင်ဟောက်နွို့နဲ့။ 3စနွို့နား ကောင်တောင်းခြိုင်းဂူနွို့ ဆောင့်ကွက်ကြဘို့နောင်း ရက်ကြဘို အလောင်းသိုလ်ကိုယ်တော်ယေရှုနွို့နဲ့။ စနွို့လဲ တာလွက်နွို့ အလောင်းသိုလ်ကိုယ်တော်ယေရှုနွို့ ထွိကောနွို့နဲ့။ 4ခွိုနွို့နောင်း ကလုဲင်စမွှားနွို့ စဉ်းစားဗင်ကောနွို့ခေါင်း တရုတ်ရုတ် ခရိုန်းကို့ဖွီးန ဗါ့ဗွို့ယော့ ခရိုန်းအမ်ဝေါင်းဝါမဲ့ လို့အဲဉ်ကွက်နောင်း ကစာ့ခွို့နွို့ တရုတ်တရုတ်ပေါ်လေးပိုတွို့ထာ ကစာခွို့နွို့ မုဲင်မနခေါင်း 5ကမြနွို့နောင်းလဲဉ်း ကဒိုက်ကဒယော့တွို့ကြဘို့ထာ ကွေကသေ့ကုန်းနွို့ ထောက်မဲ့ဘို့တောင်ဂို့နွို့နဲ့။ စနွို့လဲ လို့နွို့အဲဉ်ကွက်နွို့နား “လို့ဘာဗီးနွို့စယ် ဘာ့ဗွို့ပို့မဲ့ တောင်ခြိုင်းဂူနွို့ ရွား လို့အထက်ပလုဲင်းနွို့ ရက်ကြဘို့နောင်း။ 6ကိုယ်တော်ယေရှုနောင်း တာလွက်နွို့နု့ လာ့ဟိုကော။ အမ်နောင်း ဘာ့ဗီးနွို့မှ အ့်ထက်ပလုဲင်းဘက်တွို့။ ဖြိုင်ဂါလိလဲပြည်နွို့ အမ်နအနုဲင်နုဲင် ဘာ့ဟိုချန်နွို့နု့ ပွို့နွို့နု့ အမ်ဘာ့ဟောဖြိုပွို့နွို့နု့ နောင်ထွိကြဘို့နေ။ 7‘ကွန်ဖြားနောင်း ကောင်တိလို့ယို့အပြစ်ဒုစရိုက်နွို့ မင်အပ်ခံဟောက်နွို့ထာ ကွေလက်ဝါးကပ်တိုင်နွို့ ဒံတွို့ထာ မင်ဗီခံဟောက်နွို့နဲ့။ စနွို့လဲ အမ်နောင်း အွီရှိမြောက်နွို့ အထက်ပလုဲင်လဘက်လောက်ဟောက်’ နွို့ ဟောဖြိုကက်ကောဟား” နွို့ဖြိုမဲ့ကြဘို့နဲ့။ 8ချန်နွို့နု့ ကမြနွို့နောင်း ကိုယ်တော်ယေရှုဟောဖြိုဗွို့ဘို့ဘက်နွို့ နောင်ထွိတွို့ကြဘို့ထာ 9ခွို့နွို့နောင်း တာ့တောင်ခြိုင်ဂူနွို့မှ ဆောင့်ရန်းယော့နွို့ သာဝကမာကျိဉ်နအာ်ကွက်န တပည့်တော်အခြားဘို့ဘက်နောင်း အကြောင်းအရာမေ့မေ့နွို့နား ဖြိုပလေကြဘို့နွို့နဲ့။ 10သာဝကနွို့နား အကြောင်အရာဇာ့နွို့နု့ ဘာ့ဖြိုပလေကမြနွို့နား မိတ်တဘို မာဂဒလ မေရိ၊ ယောဟန္န၊ ဘာ့ကလုဲင်မွေးယာကုပ် မာရိန ကမြအခြားတောင်ခိုင့်နွို့ ကိုးနဲ့။ 11စနွို့လဲ ပေတရုနောင်း ဘာဖြိုအွမ် ဘ့ာအွမ်ကမြနွို့ပနောင်း အစိပ္ပာယ်ဟိုကောနွို့ ထုန်ကြဘို့နွို့ခေါင်း ခွိုနွို့နောင်းယံနိုင်းကြကောကြဘို့နွို့နဲ့။ 12စနွို့လဲ ပေတရုနောင်း အောက်အိုတွို့ထာ တာတောင်းခြိုင်းနွို့ ကံကု့ကူးအ့်ဗီးတွိုန်းနွို့နဲ့။ အမ်နောင်း တောင်ခြိုင်းဂူနွို့ ရေစ်တွို့ထာ အလောင်းကိုယ်တော်နောင်း ဘာ့ပတ်ပွို့မဲ့ ပတ်တီးဘို့ဘက်နွို့စယ် ရင်ဟောက်နွို့နဲ့။ စနွို့နား အမ်နောင်း အဖြစ်အပျက်ဘို့ဘက်နွို့ အံ့သြတွို့ထာ ရန်းကု့ညာ့အမ်နွို့နု့နဲ့။ 13ရှိနွို့နု့ ကောင်တပည့်တော်ကိုယ်တော်နွို့ အဲဉ်ကွက်နွို့နောင်း မြိုဂျေရုဆလင်နွို့မှ ဘက်မုဲင်နဘာ့တာငှာမဲ့ တဘိုဧမောက်နွို့ ကု့ကူးကြဘို့နွို့နဲ့။ 14ခွို့နွို့နောင်း ခံကိုယ်တော်ယေရှု ဘာ့ဖြစ်ပျက်မဲ့ အကြောင်အရာနွို့နု့ ဆွေးနွေးတွို့ထာ ကု့ကြဘို့နွို့နဲ့။ 15ဇာနွို့ အာ့်ကွက်နအာ့်ကွက် တန်းဘာ့ကု့ဆွေးနွေးတွို့အပြန်အလှန်ထာ ကိုယ်တော်ယေရှုနောင်း တာဗောက်တွို့ထာ ခွို့နအနုဲင်နုဲင် ကု့တွို့ကညွမ်းထာ ကြွကု့ကူးဟောက်နွို့နဲ့။ 16ဖြားနောင်း ခွို့နွို့နု့ ကိုယ်တော်နောင်ထွိအောင် တားပွို့နွို့ခေါင်း ခွို့နွို့နောင်း ကိုယ်တော်နွို့ ရင်ဟောက်နွို့လဲဉ်း ငန်းမှတ်ကောကြဘို့နွို့နဲ့။ 17ကိုယ်တော်နွို့ “ပွို့နွို့နောင်း ကညွမ်းခရီးနွို့ အကြောင်းအရာမာ့မားနွို့နု့ ဖြိုကြဘို့နောင်း” နွို့မားမနနဲ့။ ခွို့နွို့နောင်း လာ့ငါးဘေ့ဘေ့န တာ့လွက်နွို့နု့ မုဲင်မဲ့ကြဘို့နွို့နဲ့။ 18နွို့ခေါင်း ကောင်ခွို့နွို့ လို့မာတ်ဘာဟို ကလောဖနား ကိုယ်တော်နွို့ “ကောင်ရှိသို့အနည်းငယ်နီး မြိုဂျေရုဆလင်နွို့ ကမွှာ့မား ဘာ့ဖြစ်ပျက်မဲ့နွို့ မို့နောင်း ငန်းကောဟား” နွို့ ဖြိုကြဘို့နွို့နဲ့။ 19ကိုယ်တော်နား “အဖြစ်ပျက်မွှာ့မား ကလုဲင်ဟောက်နောင်း” နွို့မားကြဘို့နွို့နဲ့။ လို့နွို့နား “လို့မြိုနာဇရက် အဖြစ်အပျက် ကိုယ်တော်ယေရှုဘို့ဘက်နွို့စယ်ကိုး။ အမ်နောင်း ဘာ့ကုန်းမြတ်မဲ့ အံ့ဖွယ်အမှုအရာနွို့နု့ ယို့အာယော့တွို့ထာ ခမ်းနွက်တူးပနောင်မင်္ဂလာကတမ်းဖြားနွို့ ဘာ့ဟောဖြိုမဲ့ ပရောဖက်အပါးကိုးနွို့နဲ့။ အမ်ဘာ့ဟောဖြိုနွို့နောင်းလဲဉ်း တန်ခိုးကုန်လွန်းလန်းဟောက်နွို့ လို့အများနား ထုန်ကြဘို့နွို့နဲ့။ 20စနွို့လဲ ပုရောဟိတ်အကုန်းအပေ့အေ့ဘို့က်န ခေါင်းဆောင်ဘို့ဘက်နား စက်တွို့ထာ ကောင်တိအာဏာပိုင် အပ်ဗွို့ကြဘို့နွို့နဲ့။ အာဏာပိုင်နွို့နောင်း ကိုယ်တော်ယေရှုနွို့ အာကြဘို့သေဒဏ်နွို့ခေါင်း အမ်နောင်း ကွေလက်ဝါးကပ်တိုင်နွို့ ပေါ်တွို့နနာထာ ဘာ့ဗီနွို့နောင်းမင်ခံဟောက်နွို့နဲ့။ 21ကိုယ်တော်ယေရှုနောင်း လို့မျိုးအစ္စရေးအေ့မေ့မေ့နွို့နောင်း လို့ဘာ့ရွီးတော်မူပွို့မဲ့နွို့ ကလုဲင်မေရှိယကိုးနဲ့။ ရွားနွို့ပဒေကား ကိုယ်တော်န ဘာ့ကလုဲင်အဖြစ်ပျက်ဘို့ဘက်နွို့နား ဟိုတွို့အွီရှိရှိနွို့ကိုး။ 22စနွို့လဲ ကောင်အေ့နွို့နု့ ကမြတောင်ခိုင်နောင်း ငွမ်းနီးစောစောနွို့ တာ့တောင့်ခြိုင်းနွို့ ကု့ကူးကြဘို့နွို့နဲ့။ 23နွို့ခေါင်း ခွို့နွို့နောင်း အလောင်းသိုလ်ကိုယ်တော်ယေရှုနွို့ ထွိကောကြဘို့နွို့နား ကနံကလို့တောင်ခိုင့်နောင်း ပေါ်လေးပိုတွို့ထာ ကိုယ်တော်ယေရှုနောင်း အထက်ပလုဲင်းဘက်တွို့နွို့ ခွို့နွို့နား ဖြိုပလေဗွို့ကိုးနွို့ အံ့သြဖွယ်ပနောင်ကတမ်းနွို့နု့ အေ့နွို့နား ဗွို့ဖြိုပလေပို့ကိုးနွို့နဲ့။ 24စနွို့နား ကောင်အေ့နွို့မှ လို့တောင်ခိုင့်နောင်းလဲဉ်း တာ့တောင်းခြိုင်ဂူနွို့ ပွို့ပိုတွို့ထာ ဆောင်ကု့ရေစ်ကြဘို့နောင်း နာ့ကမြနွို့ဖြိုအတွိုန်း ကလုဲင်မနနား အလောင်းကိုယ်တော်နွို့ လာထွိဗွို့ကော” နွို့ဖြိုမနနဲ့။ 25နွို့ခေါင်း ကိုယ်တော်ယေရှုနား ကိုယ်တော်နား တပည့်တော်အဲဥ်ကွက်နွို့ “ပွို့နွို့နောင်း အပန်တတ်ထား နားလည်ကောပွို့နောင်း။ ကောင်လိတ်ကျမ်းပရောဖက်နွို့ ဘာတဲင်းပို့မဲ့ မေရှိယန ဘာ့ပတ်သက်မဲ့ အကြောင်းအရာဇာ့နွို့နား အပန်တတ်ထား ယုံကြည်ကောကြဘို့နား။ 26မေရှိယနောင်း ဖုန်းတန်ခိုးတော်ခါထင်ရှားကောနွို့ ဒုက္ခဆန်းရဲနွို့ မင်ခံစွေတွို့ထာ မင်ဗီးဟောက်နွို့ ပရောဖက်ဘို့ဘက် ဘာတဲင်းဘို့မဲ့ လိတ်ကျမ်းနွို့ ဆန်းဆန်းလန်းလန်း ဘာဖော်ပလေစ်ပွို့နွို့ ပွို့ငန်းကြကောဘို့ဟား” နွို့ဟောဖြိုမနနဲ့။ 27နွို့ခေါင်း ကိုယ်တော်နောင်း မောရှေန ပညက်ကျမ်းပရောဖက်နွို့ဘိုဘက်မှ ခံမ့်ကိုဘ်တော်နွို့ ဘာ့ဖော်ပလေအနက်အဓိပ္ပာယ်နွို့ ခွို့နွို့နား ဆန်းပလေမနနွို့နဲ့။ 28နွို့ခေါင်း ခွို့အဲဉ်ကွက်ဘာ့ကု့မဲ့ တာမေ့တဘိုဧမောက်နွို့ ဆောင့်လောက်ကြဘို့နွို့ ကိုယ်တော်နောင်း အ့်ငှာနွို့ ဆက်ကု့မဲ့ ခရီးကိုးနဲ့။ 29စနွို့လဲ ခွို့နွို့နား ကိုယ်တော်နွို့ “ကနိုကော ရှိကွက်တွို့ထာ သေ့မောင်ကက်တွို့နွို့ခေါင်း အေ့နအနုဲင်နုဲင် ဗွို့တွို့ထာ ပွို့မန်းစေး” နွို့ ကိုယ်တော်နွို့ ဟက်မနကိုးနဲ့။ စနွို့နား ကိုယ်တော်ယေရှုနောင်း ခွို့နအနုဲင်နုဲင် ကောင်ညာ့နွို့ ကွက်ကု့ဟောက်နွို့နဲ့။ 30နွို့ခေါင်း ဘာ့ထုစ်မဲ့ပွို့နွို့နု့ ကိုယ်တော်နောင်း ကုဲင်တွို့ချိထာ ကျေးဇူးဖြားနွို့ ချီးမွမ်းယော့နွို့ထာ ချိနွို့ဖာ့တွို့ထာ ခွို့နွို့နု့ အာဝဲ့နွို့နဲ့။ 31နွို့ခေါင်း နိအခေါက်အတိတွမ်ဖြားကြုင်ဟခမ်းခွိုအမ်အိုမက်ဟနက်။ လဘလ်ဖြားဘာပွမ်ဟနက်။ 32ဖြားအွိုနီနွတ် တညောင်းလိတ်ကျမ်းနွို့ တဖြိုကု့န အွို့နိနကောဝ်နွတ်နလုံးနော် တိုမ်တိုမ်ကမုဲက်မုဲက်ငမ်းမနကျဘို့ မှဘည်ခံစားမှည့်ကွလ်ကဒွေ့ခွတုချမ်းချမ်းဖြိုကျဘို့ 33နွို့ခေါင်း ခွို့နွို့နောင်း အတိတွိုန်းအောက်တွို့ထာ မြိုဂျေရုဆလင်နွို့ ဘာ့ရန်းကြဘို့နွို့ သာဝကမာ့ကျိဉ်အဲဉ်ကွက်နွို့နောင်း အခြားလို့ဘို့ဘက်နအနုဲင်နုဲင် စုတွို့ထာ ဟိုမဲ့ကြဘို့နောင်း ထွိဟောက်နွို့နဲ့။ 34လို့ဘာ့စုဝေးနွို့မေ့မေ့နွို့ ဘာ့လောက်ရန်းပိုလို့အဲဉ်နား ကိုယ်တော်ယေရှုနောင်း ဘာဗီးနွို့မှ အ့်ထက်ပလုဲင်းဘက်တွို့ခါလောလောနွို့ ရှိမုန်နား ခံမ်အမ်ဘာ့မင်ဥရင်နွို့ ဖြိုပလေမဲ့ကြဘို့နွို့နဲ့။ 35ချန်နွို့နု့ တဘိုဧမောက်နွို့မှ ဘာ့ရန်ပို့လိ့အဲဉ်ကွက်နွို့နောင်းလဲဉ်း တာကညွမ်းနွို့ ဇာ့ဘာ့ကြံနွို့န ဆောင့်ဖာ့ချိနွို့နောင်း ကလုဲင်ကိုယ်တော်ယေရှုကိုးနွို့ ငန်းမှတ်ဟေက်နွို့ခေါင်း ဖြိုပလေကြဘို့နွို့နဲ့။ 36တပည့်တော်နွို့နောင်း အဖြစ်အပျက်နာဇာ့နီးမေ့မေ့နွို့ တန်းဘာ့ဖြို လို့စေ့ကွက်နွို့နား ကိုယ်တော်နောင်း ကောင်ဗလခွို့နွို့မေ့မေ့နား အောက်အိုတွို့ထာ “ဖြားနောင်း ပွို့နွို့နား ဘာ့ငြိမ်းချမ်းနွို့ တာ့အာသနာလဲ” နွို့ဟောဖြိုမနနဲ့။ 37စနွို့လဲ တပည့်တော်နွို့နောင်း စောက်ဆေနွို့ ခြောက်ဟောက်ကိုးနွို့ ထုန်ကြဘို့နွို့နား ရကြဘို့ဒိတ်ဒနနွို့နဲ့။ 38စနွို့နား ကိုယ်တော်ယေရှုနား “ရွား ပွို့နွို့နား ရကြဘို့နောင်း။ ရွား အို့အထက်ပလုဲင်းဟောက်နွို့ပဒေနား သံသယကွက်မနကြဘူးဟား။ 39တိအို့ ကောပ်အို့နီးရေစ်စေးနေ။ အို့အမှန်ကိုး။ ကုဲင်ရေစ်စမ်းစဲ အို့နေ။ စောက်ဆေနွို့နား ကနံန ညှုံန် လာ့ဟိုကော။ စနွို့လဲ အို့နွို့ ကနံန ညှုံန်ဟိုဟောက်နွို့နား ပွို့ရင်ကြမန” နွို့ဟောဖြိုအနနဲ့။ 40ဆောင်ဖြိုယော့စနွို့နား ကိုယ်တော်နောင်း တိအမ်န ဗဟိုကောက်နွို့ ဒဏ်ရာဘို့ဘက်နွို့ ပလေဟောက်နွို့နဲ့။
41တပည့်တော်နွို့နောင်း အထက်ဘာ့ပလုဲင်နွို့ ယံနိုင်းကြကောပွို့နွို့လဲဉ်း ကိုယ်တော်နွို့ မင်ရင်ဟောက်နွို့ခေါင်း အံ့သြယော့ နွက်တူးကြဘို့နွို့နဲ့။ နွို့ခေါင်း ကိုယ်တော်ယေရှုနား ခွိုနွို့နု့ “ခမ်းစွေ အာ့်မာ့မာ့နွို့ အာကြဘို့နေ” နွို့ဟောဖြိုမနနဲ့။ 42စနွို့နား ခွို့နွို့နောင်း ကိုယ်တော်နွို့ ဖျောင်အာ့်အထန့်နွို့ ဆောင်အာနွို့ 43ကိုယ်တော်နောင်း အွေတွိုထာ ငွမ်းခွို့နွို့နု့ ထုံးဆောင်မနနွို့နဲ့။ 44နွို့ခေါင်း ကိုယ်တော်နား “ပညက်တရားကျမ်းမောရှေ၊ ပရောဖက်ဘာတဲင်းဗွို့ကျမ်းဘို့ဘက်န ကျမ်းဆာလံဘို့ဘက်နွို့နု့ ခံမ့်အို့နွို့ပတ်သတ်တွို့ထာ ဖော်ပလေပို့အကြောင်းအရာဘို့ဘက်နောင်း ကလုဲင်ပိုလောက်ဟောက် အမှန်ခါလောလောနွို့ နွို့ ပွို့နွို့နား အို့ဘာ့ဟောဖြိုဗွို့နွို့အတွိုန်း အခွပ် အမှန်ခါလောလော ဖြစ်ပျက်ဗွိုတွို” နွို့ဟောဖြိုမနနဲ့။ 45နွို့ခေါင်း လိတ်ကျမ်းနွို့ နားလည်နိုင်နွို့အောင် ကိုယ်တော်နား တပည့်တော်ဘို့ဘက်နွို့ ကရီပလေမဲ့ကိုးနဲ့။ 46ကိုယ်တော်နား တပည့်တော်ဘို့ဘက်နွို့နု့ “လိတ်ကျမ်းနွို့ ဘာ့တဲင်းပွို့နွို့နောင်း မေရှိယနောင်း ဆန်းရဲဒုက္ခနွို့နု့ မင်ခံစွေယော့နောင်း မင်ဗီးခံဟောက်နွို့လဲဉ်း အွီရှိမြောက်နွို့ ဘာဗီးနွို့မှ အထက်ပလုဲင်ဘက်ပိုလောက်ဟောက်။ 47တပည့်တော်မေရှိယနောင်း အပြစ်ဒုစရိုက်ဘို့ဘက်နွို့မှ ဗင်တွို့နောင်တထာ ဖက်ဖြားနွို့ လို့ဘာ့လှည့်ဘက်ကြဘို့မေ့မေ့နောင်း မင်ကယ်တင်ခံဟောက် နွို့ မင်္ဂလာကတမ်းကလို့နွို့ စတွိုမြိုဂျေရုဆလင်နွို့ ထာ ကွေကမ္ဘာ တာ့လို့မျိုးအမာ့မာ့နွို့ ကု့တွို့ထာ ဟောဖြိုလောက်ဟောက်နွို့ လိတ်ကျမ်နွို့ တဲင်းဗွို့ကိုးနဲ့။ 48စနွို့ခေါင်း ပွို့နွို့နောင်းလဲဉ်း အို့ဘာ့ကြံထွိမဲ့ အဖြစ်အပျက်ဘို့ဘက်နောင်း ကလုဲင်အမှန်ကိုးနွို့ လို့ဘာ့ရင်ဘို့ဘက်နွို့နု့ခေါင်း အကြောင်အရာနွို့နု့ သက်သေပလေတွို့လို့ထာ မင်ဟောဖြိုဟောက်နွို့နဲ့။ 49အို့နောင်း အဖဖြားဘာ့အာပွို့မဲ့ ကတိတော်နွို့အတွိုန်း တာပွို့နွို့ ဉာဏ်အလင်းတော်နွို့ ပလွတ်ကု့ဟောက်နွို့နဲ့။ စနွို့နား ပွို့နွို့နောင်း ရွှေမြို့တော်နွို့မှ လောက်အချန်ဘာ့လက်ခံ တန်ခိုးနွို့လောက်အောင် မြိုဂျေရုဆလင်နွို့ စယ် ဆုန့်ကြဘို့နေ” နွို့ဟောဖြိုမနနဲ့။ 50နွို့ခေါင်း ကိုယ်တော်ယေရှုနောင်း တပည့်တော်ဘို့ဘက်နွို့ ဗဟိုဖက်ပလန်းမြို တမေ့တဘိုဗေသနိနွို့ ဆောင့်ဟက်ကု့ယော့နွို့နု့ ကိုယ်တော်နောင်း မြှုတ်တွို့တိထာ တပည့်တော်နွို့နု့ အာမဲ့ကောင်းကြီးကိုးနဲ့။ 51ကိုယ်တော်ယေရှုနောင်း တန်းကောင်ဘာ့အာမဲ့ကောင်းကြီးနွို့ နု့ တခွို့နွို့နု့ လေးပါန်တွို့ထာ ရွှေမြို့တော်နု့ ကြွကု့ကူးဟောက်နွို့နဲ့။ 52တပည့်တော်နွို့နောင်းလဲဉ်း ကိုယ်တော်ယေရှုနွို့ ထောက်တွို့တောင်ဂို့ထာ နွက်တူးတူးန မြိုဂျေရုဆလင်နွို့ ရန်းကု့ဟောက်နွို့နဲ့။ 53ခွို့နွို့နောင်း မြိုဂျေရုဆလင်နွို့ ဆောင်လောက်နွို့နောင်း ကောင်ဗိမာန်တော်နွို့ကု့တွို့ထာ ကျေးဇူးတော်ဖြားနွို့ မတိတ်မတန်း ချီးမွမ်းမနနွို့နဲ့။
Currently Selected:
Luke 24: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.